وسى قۇجاتقا سايكەس جىلجىمالى جانە جىلجىمايتىن م ۇلىك تۇرىندەگى قايتارىلعان اكتيۆتەر قايتارىلعان اكتيۆتەردى باسقارۋ كومپانياسىنا بەرىلەدى. سايكەسىنشە اقشالاي قاراجاتتىڭ ءتۇسىمىن جيناقتاۋ ءۇشىن قارجى مينيسترلىگىنىڭ قولما-قول اقشانى باقىلاۋ شوتى رەتىندە ارناۋلى مەملەكەتتىك قور قۇرىلدى.
رەسمي دەرەكتەرگە سۇيەنسەك, 2024 جىلدىڭ 20 جەلتوقسانىنداعى جاعدايعا سايكەس ارناۋلى مەملەكەتتىك قورعا بارلىعى 220,3 ملرد تەڭگە تۇسكەن. شىعىستاردىڭ كولەمى – 11,5 ملرد تەڭگە. قالعان 208,84 ملرد تەڭگەنىڭ ىشىندە 13 ملرد تەڭگە سوماسى باسقارۋشى كومپانيادان اۋدارىلعان. ونىڭ ىشىندە 12,6 ملرد تەڭگە اكتيۆتەردى ساتۋدان, سول سەكىلدى 0,5 ملرد تەڭگە اتالعان اقشانى باسقارۋعا بايلانىستى قىزمەتتەن (جالداۋ, سەنىمگەرلىك باسقارۋ, ديۆيدەندتەر جانە ت. ب.) جينالعان.
وسىلايشا قۇزىرلى ورگاندار قايتارىلعان اكتيۆتەردى ءتيىمدى باسقارۋ ارقىلى قوسىمشا قارجىلاي رەسۋرستاردى الەۋمەتتىك ماسەلەلەردى شەشۋگە باعىتتاپ وتىر.
ءتيىستى زاڭعا سايكەس اتالعان قوردىڭ شوتتارىنداعى اقشا دەنساۋلىق ساقتاۋ, ءبىلىم بەرۋ, بۇقارالىق سپورت جانە ت.ب. سالالارداعى الەۋمەتتىك جانە ينفراقۇرىلىمدىق نىسانداردى سالۋعا باعىتتالادى. بارلىق جوبا ەكونوميكالىق ساراپتامادان ءوتىپ, ودان ءارى قاجەتتى قارجىلاندىرۋ ماسەلەسى رەسپۋبليكالىق بيۋدجەت كوميسسياسىنىڭ قاراۋىنا جىبەرىلىپ, ءتيىستى شەشىم شىعارىلادى.
ماسەلەن, ربك شەشىمى بويىنشا قوردا جيناقتالعان قاراجات كەلەسىدەي جوبالاردى جۇزەگە اسىرۋعا جۇمسالادى:
- اقتوبە قالاسىندا 300 ورىنعا ەسەپتەلگەن ەرەكشە بالالارعا ارنالعان ارنايى بالاباقشانى سالۋ.
- الماتى وبلىسىندا 50 ورىندىق سپورت كەشەنىن سالۋ.
- اتىراۋ وبلىسىنداعى مەكتەپ-ينتەرنات.
- شىمكەنت قالاسىنداعى قوسالقى مەكتەپ-ينتەرنات كوللەدجى ءۇشىن 300 ورىنعا شاقتالعان جاتاقحانا سالۋ.
- پەتروپاۆل قالاسىندا 280 ورىندىق بالاباقشا سالۋ.
- تۇركىستان وبلىسىندا اۋداندىق بالالار مۋزىكا مەكتەبىنىڭ قۇرىلىسى.
- ۇلىتاۋ وبلىسىندا 80 ورىنعا ەسەپتەلگەن 2 قاباتتى مەكتەپ سالۋ.
- جەتىسۋ وبلىسىندا 30 ورىندى قاراستىراتىن مەكتەپكە دەيىنگى شاعىن ورتالىعى بار 200 ورىندىق مەكتەپ سالۋ.
- اقمولا وبلىسىندا سپورت زالى بار سپورت كەشەنىن سالۋ.
-شىعىس قازاقستان وبلىسىنداعى اۋرۋحانا كەشەنى.
جىلىستاتىلعان اكتيۆتەردى قايتارۋ ەلىمىزدەن كاپيتالدى زاڭسىز شىعارۋدىڭ الدىن الۋعا كومەكتەسەدى. ال وسى اكتيۆتەرمەن جۇرگىزىلىپ جاتقان جۇمىستى اشىق كورسەتۋ قازاقستاندىقتاردىڭ سەنىمىن ارتتىرادى. سوندىقتان بارلىق قاراجات الەۋمەتتىك ينفراقۇرىلىمدى دامىتۋعا جۇمسالادى. ونىڭ ەسەبىنەن سالىنىپ جاتقان مەكتەپتەر, بالاباقشالار, سپورت كەشەندەرى, جاتاقحانالار وڭىرلەردىڭ ەكونوميكالىق ءوسىمىن نىعايتىپ, حالىقتى جۇمىسپەن قامتۋدا سەپتىگى مول. سونىمەن قاتار قالالار مەن اۋىلدى جەرلەردە جايلى ورتانى قۇرۋدى ارتتىرادى.
