بەس كىتاپتان تۇراتىن «قازاق چەمپيوندارى» كوميكسى پاريج-2024 وليمپيا ويىندارىنىڭ جۇلدەگەرلەرىنە ارنالعان. سونىڭ ىشىندە دزيۋدوشى ەلدوس سمەتوۆ, بوكسشى نازىم قىزايباي مەن ايبەك ورالباي, پالۋان دەمەۋ جادىراەۆ, گيمناست ناريمان قۇربانوۆ, دزيۋدوشى عۇسمان قىرعىزباەۆ, مەرگەندەر الەكساندرا لە مەن يسلام ساتباەۆ جانە داڭقتى بوكسشى, ۇلتتىق وليمپيادا كوميتەتىنىڭ پرەزيدەنتى گەننادي گولوۆكين دە بار.
«ماقساتىمىز, كوميكس ارقىلى قازاق بالاسىنا ەل نامىسىن قورعاپ جۇرگەن سپورتشىلاردىڭ ناعىز باتىر ەكەنىن جانە سول باتىرلاردىڭ ارامىزدا ەكەنىن كورسەتۋ. ءار ۇلكەن ارماننىڭ ارتىندا قاجىرلى ەڭبەك تۇرعانىن ءتۇسىندىرۋ», دەيدى اۆتورلار.
كىتاپتا ەل نامىسىن قورعاعان سپورتشىلاردىڭ بالالىق شاعى, العاشقى دودالارىنان ۇلكەن سايىستارعا دەيىنگى كاسىبي جولى بالاعا تۇسىنىكتى تىلدە ۇسىنىلعان.
ءىس-شارانىڭ العاشقى قۇتتىقتاۋ لەبىزىن كىتاپحانا باسشىسى عازيزا قۇدايبەرگەنقىزى ءبىلدىردى. ول كوميكس جانرى قازاق وقىرماندارىنا العاش رەت جۇسىپبەك ايماۋىت ۇلىنىڭ «جامان تىماعى» ارقىلى جەتكەنىن اتاپ ءوتىپ, بۇگىنگى جارىق كورىپ جاتقان كىتاپتار سونىڭ ءداۋىر ديدارىنا ساي جاندانعان جالعاسى ەكەنىن ايتتى.
كەلەسى كەزەكتە ءسوز العان «حابار» اگەنتتىگىنىڭ باسقارما توراعاسى كەمەلبەك ويشىباەۆ قوس اۆتوردىڭ بۇل تاقىرىپقا ۇلكەن ىزدەنىسپەن كەلگەنىن جەتكىزدى. «قازاق كوميكسىنىڭ تاقىرىپ اياسى كەڭەيىپ كەلەدى. بۇعان دەيىن تاريحتاعى باتىر بابالارىمىزدىڭ ونەگەلى ءومىرى كوميكس بەتتەرىنە بەدەرلەنگەنىن بىلەمىز. ال بۇگىنگى جارىق كورگەن كوميكستەر توپتاماسى وسى زامان قاھارماندارىن تانىستىرادى. سول ارقىلى كەشەگى قابانباي مەن بوگەنبايلار قازىر دە ارامىزدا جۇرگەنىن تۇسىندىرەدى. جاڭا دۇنيەنىڭ جارناماسىن ارتتىرا بىلسەك, بۇل قازاق بالالارى مەن جاسوسپىرىمدەرىنىڭ, ءتىپتى تۇتاس ۇلتتىڭ وركەندەۋىنە ىقپال ەتەتىن الەۋەتتى قۇرال بولا الادى», دەدى ك.ويشىباەۆ.
ايتا كەتەيىك, كوميكستەر تۋريزم جانە سپورت يندۋسترياسى قورىنىڭ قولداۋىمەن جارىق كورىپ, ەلىمىزدىڭ بارلىق سپورت مەكتەپتەرىنە تەگىن تاراتىلاتىن بولادى.
