قىزىلجار اۋدانىنداعى بەسكول اۋىلىنىڭ تۇرعىنى ماقپال جاعىپاروۆانىڭ ءۇيىن وتكەن جىلدىڭ 12 ساۋىرىندە سۋ باسقان. سۋ ءۇش جىل بۇرىن عانا سالىنعان ءۇيدىڭ تەرەزە جاقتاۋلارىنىڭ دەڭگەيىنە دەيىن كوتەرىلىپ, بۇكىل م ۇلىك جارامسىز بولىپ قالعان.
ءۇيدى رەتكە كەلتىرۋ ءۇشىن شاتىر, قابىرعالار مەن تەرەزەلەردەن باسقانىڭ بارلىعىن اۋىستىرۋعا تۋرا كەلدى. قازىر قابىرعالاردا جارىقتار پايدا بولىپ, ولار كەڭەيىپ جاتىر.
«سۋ تاسقىنى تۋرالى حابارلانعاندا, 11 ساۋىردە ۇيىمىزدەن كەتۋگە ءماجبۇر بولدىق. ىرگەتاسىن بيىك قويدىق, بىراق سۋ 2 مەترگە دەيىن كوتەرىلەدى دەپ ويلامادىق. سۋ دەڭگەيى تومەندەگەن كەزدە ونىڭ سالدارىن 5 مامىردا جويۋعا كىرىستىك. ءۇي جاڭا, گاز بلوكتارىنان تۇرعىزىلعاندىقتان, تۇرۋعا جارامدى بولدى. ءتيىستى اقشانى الدىق, تۋىستارىم, دوستارىم, اۋىلداستارىم, ءتىپتى وقۋشىلارىم دا قارجىلاي كومەك كورسەتتى. جاز بويى جوندەۋ جۇمىستارىن جۇرگىزدىك, ەندى بۇل جۇمىستىڭ ناتيجەسىز قالۋ قاۋپى بار. ۋايىمداپ وتىرمىز», دەيدى بەسكول اۋىلىنىڭ تۇرعىنى.
قارت تۇرعىندار ەسىلدە كوكتەمدە بۇرىن-سوڭدى مۇنداي سۋ تاسقىنى بولماعانىن ايتادى. سوندىقتان تابيعات اپاتىنا تۇرعىندار عانا ەمەس, ارنايى قىزمەت وكىلدەرى دە دايىن بولمادى.
سالدارىنان وبلىستا 4 مىڭعا جۋىق ءۇيدى سۋ باسقان. ونىڭ تەڭ جارتىسى قىزىلجار وڭىرىندە. ۇلكەن سۋ تاسقىنىنىڭ جولىندا 22 ەلدى مەكەن بولدى. قاۋىپسىز جەرگە جەتكىزىلگەن 8,6 مىڭ ادامنىڭ 1,5 مىڭى ەۆاكۋاتسيالىق ورتالىقتارعا ورنالاستىرىلعان.
سونداي-اق, تەك وسى اۋداندا 29 شاعىن جانە ورتا بيزنەس, 13 اۋىل شارۋاشىلىعى نىسانى, 7 مەملەكەتتىك جانە الەۋمەتتىك نىسان زارداپ شەككەن.
كوميسسيا 415 ءۇيدى قاۋىپتى دەپ تانىسا, ونىڭ 314-ءىنىڭ يەلەرىنە پەتروپاۆلدان باسپانا ساتىپ الىنعان, قالعاندارى جاڭادان سالىنعان «بىرلىك» شاعىن اۋدانىندا قونىستانعان.
«اۋداندا 971 ءۇي قالپىنا كەلتىرىلدى. ونىڭ ىشىندە 71 ءۇيدى مەحانيكالاندىرىلعان بريگادالار, قالعانىن تۇرعىنداردىڭ وزدەرى جوندەگەن. 900 ءۇيدى قالپىنا كەلتىرۋ ءۇشىن تۇرعىندارعا 5 ملرد تەڭگە ءبولىندى. بارلىق زارداپ شەككەن تۇرعىندار باسپانامەن قامتاماسىز ەتىلدى. مالى قىرىلعاندار مەن كاسىپكەرلەرگە جاردەماقى تولىعىمەن تولەندى», دەيدى قىزىلجار اۋداندىق ىشكى ساياسات ءبولىمىنىڭ باسشىسى گۇليا سالتىقوۆا.
