فوتو: قر وقۋ-اعارتۋ مينيسترلىگى
عاني بەيسەمباەۆتىڭ ايتۋىنشا, 2024 جىلى ەلىمىزدە ەرەكشە ءبىلىم بەرۋدى قاجەت ەتەتىن بالالاردىڭ سانى 230 مىڭنان اسقان. بۇل مالىمەت بارلىق ءبىلىم بەرۋ ۇيىمدارىندا بىردەي ينكليۋزيالىق ءبىلىم بەرۋدىڭ قاجەتتىلىگى مەن ماڭىزدىلىعىن كورسەتەدى. وسىنى ەسكەرە وتىرىپ, مينيسترلىكتىڭ قۇرىلىمىندا العاش رەت ينكليۋزيۆتى جانە ارنايى ءبىلىم بەرۋ دەپارتامەنتى قۇرىلعان.
«وتكەن جىلى عىلىمي قاۋىمداستىق جانە ۇكىمەتتىك ەمەس ۇيىمدارمەن بىرلەسىپ قىرۋار جۇمىس اتقارىلدى. ينكليۋزيالىق جانە ارنايى ءبىلىم بەرۋ سالاسىنداعى بارلىق نورماتيۆتىك قۇجاتقا تالداۋ جۇرگىزىلىپ, ناتيجەسىندە 15 ءنورماتيۆتى-قۇقىقتىق اكت قابىلداندى. وسىعان وراي بالانىڭ دۇنيەگە كەلگەن ساتىنەن باستاپ وقۋ وقىپ, ماماندىق العان كەزىنە دەيىن پسيحولوگيالىق-پەداگوگيكالىق سۇيەمەلدەۋدىڭ ءۇش دەڭگەيلى ۇلگىسى ەنگىزىلدى, قولداۋ كابينەتتەرى ءۇشىن جاڭا تالاپتار بەكىتىلدى, ەرەكشە ءبىلىم بەرۋدى قاجەت ەتەتىن بالالارمەن جۇمىس ءۇشىن جەكە باعدارلامالار ازىرلەندى, ودان بولەك پەداگوگ-اسسيستەنت, ارنايى پەداگوگ, جەكە كومەكشى سەكىلدى جاڭا لاۋازىمدار پايدا بولدى», دەدى مينيستر.
سونداي-اق مينيسترلىكتە ۇلتتىق ۇزدىكسىز ينكليۋزيۆتى ءبىلىم بەرۋ ورتالىعىن قۇرۋ تۋرالى شەشىم قابىلدانعان. ونىڭ ماقساتى پەداگوگتەرگە ادىستەمەلىك سۇيەمەلدەۋ كورسەتۋ, ءبىلىم بەرۋدەگى قيىندىقتاردى انىقتاۋ جانە الدىن الۋ بويىنشا عىلىمي زەرتتەۋلەر جۇرگىزۋ, سونداي-اق پسيحولوگيالىق-پەداگوگيكالىق سۇيەمەلدەۋ قىزمەتىن ۇيلەستىرۋ جۇمىستارىن جۇزەگە اسىرۋ.
«اسىرەسە, بالالاردىڭ الەۋمەتتىك بەيىمدەلۋىنە ەرەكشە كوڭىل بولىنۋدە. مىنە, ءدال وسى ماقساتتا الماتى قالاسىنداعى ارنايى جانە ينكليۋزيۆتى ءبىلىم بەرۋ ورتالىعىن ترانسفورماتسيالاۋ قولعا الىنۋدا. ماڭىزدىلىعىنا باسا نازار اۋدارار تاعى ءبىر جاڭالىق — بىلتىردان باستاپ تەحنيكالىق جانە كاسىپتىك ءبىلىم ۇيىمدارىندا مۇمكىندىگى شەكتەۋلى بالالار ءۇشىن كۆوتا سانى ءوستى. ونىمەن قوسا «ەرەكشە ءبىلىم بەرۋ قاجەتتىلىكتەرى بار بالالارعا كەشەندى قولداۋ كورسەتۋ تۋرالى» جاڭا زاڭ جوباسى ازىرلەنۋدە. ءبىلىم بەرۋ ۇيىمدارىندا جايلى ورتا قالىپتاستىرۋ بارلىق ءبىلىم الۋشىلار ءۇشىن تەڭ مۇمكىندىكتەردى قامتاماسىز ەتەتىن نەگىزگى فاكتور», دەپ قورىتىندىلادى مينيستر.
ەستەرىڭىزگە سالا كەتەيىك, ەلىمىزدە بۇگىنگى تاڭدا 500-گە جۋىق ارنايى ءبىلىم بەرۋ ۇيىمى جۇمىس ىستەيدى. 2024 جىلدىڭ قورىتىندىسى بويىنشا ەل اۋماعىنداعى مەكتەپتەردىڭ 90%-دا ينكليۋزيۆتى ءبىلىم الۋعا جاعداي جاسالدى, ال بالالاردى ارنايى پسيحولوگيالىق-پەداگوگيكالىق قولداۋمەن قامتۋ 80%-عا جەتكەن.
