قازاقستاندا ءبىلىم بەرۋ ءتۋريزمى دامىپ كەلەدى

شەتەلدىك سەرىكتەستىك جوعارى وقۋ ورىندارىندا ءبىلىم الۋ ءۇشىن 2 090 گرانت ءبولىندى

ەلىمىزدە ۇلىبريتانيا, يتاليا, قىتاي, رەسەي, اقش, فرانتسيا جانە وڭتۇستىك كورەيانىڭ 23 سەرىكتەس جوعارى وقۋ ورىندارى بار. بيىل وسى باعىتتا 11 كەلىسىمدى ىسكە اسىرۋ جوسپارلانعان. 

«بۇگىنگى تاڭدا مىڭداعان ستۋدەنت 34 ماماندىق ءبويىنشا بىلىم الادى.  ونىڭ ىشىندە پەداگوگيكالىق, ينجەنەرلىك-تەحنيكالىق جانە جاساندى ينتەللەكت سياقتى نەگىزگى باعىتتار بار. بۇل ماقساتتارعا مەملەكەتتىك ءبىلىم بەرۋ گرانتتارى (بىرلەسكەن ءبىلىم بەرۋ باعدارلامالارى جانە قوس ديپلوم باعدارلامالارى) جانە مەملەكەتتىڭ قولداۋىمەن ولارعا جاعداي جاساۋ ارقىلى ينۆەستورلاردىڭ قاراجاتى بولىنەدى. شەتەلدىك سەرىكتەس جوو-لاردى ىرىكتەۋ جەكەلەگەن سالالارداعى كادرلىق قاجەتتىلىككە جانە وڭىرلەردىڭ سۇرانىستارىنا نەگىزدەلەدى», دەلىنگەن عىلىم جانە جوعارى ءبىلىم مينيسترلىگىنىڭ حابارلاماسىندا.

شەتەلدىك جەتەكشى جوعارى وقۋ ورىندارىمەن ىنتىماقتاستىق اتوم ونەركاسىبى, «جاسىل» سۋتەكتى ازىرلەۋ, قازاقستاندا بالاماسى جوق سۋ قاۋىپسىزدىگىن قامتاماسىز ەتۋ سياقتى اسا سۇرانىسقا يە جانە تاپشى ماماندىقتار بويىنشا ماماندار دايارلاۋعا باعىتتالعان.

پرەزيدەنت تاپسىرماسىن ورىنداۋ شەڭبەرىندە ق.جۇبانوۆ اتىنداعى اقتوبە وڭىرلىك ۋنيۆەرسيتەتى بازاسىندا مۇناي ينجەنەرياسى, ەلەكتر ەنەرگەتيكاسى جانە كومپيۋتەرلىك ينجەنەريا باعدارلامالارى بويىنشا بريتاندىق Heriot Watt ۋنيۆەرسيتەتىنىڭ فيليالى اشىلعان.

حيميا جانە حيميالىق تەحنولوگيالار سالاسىندا كادرلار دايارلاۋ ءۇشىن م.دۋلاتي اتىنداعى تاراز وڭىرلىك ۋنيۆەرسيتەتى بازاسىندا د.ي.مەندەلەەۆ اتىنداعى رەسەي حيميا-تەحنولوگيالىق ۋنيۆەرسيتەتىنىڭ, پەداگوگيكالىق كادرلاردى دايارلاۋ ماقساتىندا وڭتۇستىك قازاقستان پەداگوگيكالىق ۋنيۆەرسيتەتى بازاسىندا گازي ۋنيۆەرسيتەتىنىڭ (تۇركيا) فيليالدارى ءبىلىم بەرۋدە.

بەيجىڭ ءتىل جانە مادەنيەت ۋنيۆەرسيتەتىنىڭ (قحر) فيليالى استانا حالىقارالىق ۋنيۆەرسيتەتى بازاسىندا, كۆينس ۋنيۆەرسيتەتىنىڭ فيليالى (يرلانديا) نارحوز ۋنيۆەرسيتەتى بازاسىندا جۇمىس ىستەيدى.

2025 جىلعا دەيىنگى جوعارى ءبىلىم بەرۋدى ينتەرناتسيونالداندىرۋ ستراتەگياسى شەڭبەرىندە شەتەلدىك ازاماتتارعا, سونىڭ ىشىندە قازاقستان رەسپۋبليكاسىنىڭ ازاماتتارى بولىپ تابىلمايتىن قازاق دياسپوراسىنىڭ وكىلدەرىنە ارنالعان ستيپەنديالىق باعدارلاما ىسكە قوسىلدى.

«2024-2025 وقۋ جىلىندا شەتەلدىك ازاماتتارعا ارنالعان ستيپەنديالىق باعدارلاما بويىنشا قازاقستاننىڭ 37 جوو-دا 550 ءبىلىم الۋشى قابىلداندى (باكالاۆريات - 490, ماگيستراتۋرا - 50, دوكتورانتۋرا - 10). ستيپەنديالىق باعدارلاما تەگىن ءبىلىم الۋدى جانە اي سايىنعى ستيپەنديانى قامتيدى», دەلىنگەن مينيسترلىك مالىمەتىندە. 

12 727 ەل ازاماتى الەمنىڭ جەتەكشى جوعارى وقۋ ورىندارىندا ءبىلىم الدى

«بولاشاق» حالىقارالىق ستيپەندياسى 30 جىل بويى جۇزەگە اسىرىلىپ كەلەدى. مەملەكەت باسشىسىنىڭ تاپسىرماسى بويىنشا «بولاشاق» حالىقارالىق ستيپەندياسى تەحنيكالىق, ينجەنەرلىك, مەديتسينالىق جانە پەداگوگيكالىق باعىتتارعا قايتا باعىتتالدى.

وسى جىلدار ىشىندە ستيپەنديا 12 727 ەل ازاماتىنا الەمنىڭ جەتەكشى جوعارى وقۋ ورىندارىندا ءبىلىم الۋعا مۇمكىندىك بەردى. ونىڭ ىشىندە 55% گۋمانيتارلىق, 36% ينجەنەرلىك-تەحنيكالىق, 7% مەديتسينالىق, 2% مادەنيەت جانە ونەر باعىتى بويىنشا ءبىلىم العان.

تۇلەكتەر الەمنىڭ 30-دان استام ەلىندە 400-دەن استام جەتەكشى شەتەلدىك جوعارى وقۋ ورىندارىندا وقىپ, تاعىلىمدامادان وتكەن.

2024 جىلى باعدارلاما تۇلەكتەرى 213 مىڭ مەديتسينالىق وتا جاساپ, 145 مىڭ ءبىلىم الۋشى مەن ستۋدەنتتەردى وقىتىپ, مىڭنان استام عىلىمي ەڭبەكتەرىن جاريالادى.

2024 جىلى جوو كونتينگەنتىندەگى شەتەلدىك ستۋدەنتتەردىڭ ۇلەسى 15%-دى قۇرادى, الەمنىڭ 23 ەلىنەن 97 ۋنيۆەرسيتەتتەرمەن 245 قوس ديپلوم باعدارلاماسى ىسكە اسىرىلدى.

شەتەلدىك ستۋدەنتتەر سانى 93 ەلدەن 31 400 ادامدى قۇرادى, بۇل 2023 جىلعى 82 ەلدەن 26 800 ستۋدەنتكە قاراعاندا 4 600 ادامعا كوپ.

قازاقستاننىڭ جوعارى وقۋ ورىندارىنا وقىتۋشىلىق قىزمەتكە 1600-دەن استام شەتەلدىك ساراپشى تارتىلدى.

2024 جىلعى ءبىلىم بەرۋ باعدارلامالارىنىڭ ناتيجەسىندە QS World University Rankings 2024 الەمنىڭ ۇزدىك ۋنيۆەرسيتەتتەرىنىڭ حالىقارالىق رەيتينگىنە 21 قازاقستاندىق جوو كىردى.

«ۋنيۆەرسيتەت پاندەرىن وقىتۋدىڭ مازمۇنى مەن ءادىسىن ايتارلىقتاي جاڭارتۋ قاجەت. بولاشاق مۇعالىمدەر, دارىگەرلەر, اگرونومدار, زاڭگەرلەر جانە سالالىق ماماندار جاساندى ينتەللەكت بويىنشا بازالىق ءبىلىمدى مىندەتتى تۇردە مەڭگەرۋى كەرەك», دەپ اتاپ ءوتتى قاسىم-جومارت توقاەۆ.

مەملەكەت باسشىسىنىڭ تاپسىرماسىن ىسكە اسىرۋ ماقساتىندا ەلىمىزدىڭ عىلىمي ۇيىمدارى مەن جوو-نا حالىقارالىق دەرەكقورلارعا تەگىن قولجەتىمدىلىك قامتاماسىز ەتىلدى.

Google كومپانياسىمەن بىرلەسىپ ەلىمىزدىڭ 15 جوعارى وقۋ ورنىنىڭ 5000 ستۋدەنتىنە ارنالعان جاساندى ينتەللەكت بويىنشا كۋرستار ىسكە قوسىلدى.

Coursera ونلاين ءبىلىم بەرۋ پلاتفورماسى جوباسى اياسىندا قازاقستاندىق ستۋدەنتتەرگە 40 مىڭ ليتسەنزيا بولىنىپ, 93 جوعارى وقۋ ورنىنان 153 مىڭ سەرتيفيكات بەرىلگەن.

كورەيا مەن قىتايدىڭ جەتەكشى جوعارى وقۋ ورىندارىمەن بىلىم بەرۋ جانە مامانداردى بىرلەسىپ دايارلاۋ بويىنشا ۋاعدالاستىقتارعا قول جەتكىزىلگەن.