ءسابيدىڭ جەتىلۋىنە مۇمكىندىك بەرەتىن مەديتسينالىق جابدىقتار ماڭعىستاۋ وبلىستىق اكىمدىگىنىڭ جانە «DUNGA OPERATING GMBH» كومپانياسىنىڭ قولداۋىمەن الىندى. قۇرىلعىنى تابىستاۋ راسىمىنە ايماق باسشىسىنىڭ ورىنباسارى ا.ورىسباەۆ, ماڭعىستاۋ وبلىستىق دەنساۋلىق ساقتاۋ باسقارماسىنىڭ باسشىسى ب.ءىزباساروۆ, دەمەۋشى كومپانيانىڭ باس ديرەكتورى ن.ءابدىراحمانوۆ, كوپبەيىندى اۋرۋحانانىڭ ديرەكتورى ر.بەكىباەۆ قاتىستى.
پەريناتالدىق ورتالىقتىڭ جانساقتاۋ ءبولىمىنىڭ مەڭگەرۋشىسى, نەوناتولوگ-دارىگەر ۋ.ءراشيدوۆتىڭ ايتۋىنشا, گيپوتەرميا اپپاراتى اۋىر اسفيكسيامەن تۋعان ءسابيدىڭ ءومىرىن قۇتقارىپ, باس-مي ىسىگىنىڭ الدىن الۋعا قاجەت. اپپارات جاڭا تۋعان نارەستەنىڭ دەنە قىزۋىن اۆتوماتتى تۇردە 34 گرادۋسقا دەيىن تومەندەتەدى, 72 ساعات بويى ونى قاجەتتى دەڭگەيدە ۇستايدى, سودان كەيىن بالانى بىرتىندەپ جىلىتادى. بالا اعزاسىنداعى مەتابوليزمدى وزگەرتۋگە, ميدى گليۋكوزامەن قامتاماسىز ەتە وتىرىپ, ورتالىق جۇيكە جۇيەسىنىڭ جاسۋشالارىن قايتىمسىز زاقىمدانۋلاردان قورعاۋعا مۇمكىندىك بەرەدى.
سونداي-اق شالا تۋعان نارەستەگە ارناپ ساتىپ الىنعان 8 ينكۋباتوردا نارەستەلەر سالماق قوسقانعا دەيىن جاتادى. قۇرالداردىڭ ىلعالدىلىعى, تەمپەراتۋراسى ساقتالىپ, اۆتوماتتى تۇردە بالاعا قاجەتتى جاعداي جاسايدى, قوسىمشا فوتولامپاسى مەن مونيتورى بار.
وكپەنى جاساندى جەلدەتۋ زاماناۋي اپپاراتى دا اۋرۋحانا يگىلىگىنە بەرىلدى. قۇرىلعى ءۇش رەجىمدە كومەك كورسەتۋگە قاۋقارلى. ۋميد ءراشيدوۆتىڭ ايتۋىنشا, العاشقى رەجىم CPAP – شالا تۋعان بالالارعا دەمالۋعا كومەكتەسسە, SIMV بالانىڭ ورنىنا تىنىس الادى. ال جوعارى جيىلىكتەگى جاساندى جەلدەتۋ وكپەسى دامىماعان, وكپەسىندە اقاۋى بار نارەستەلەردىڭ جاعدايىن جاقسارتۋعا قولدانىلادى.
پەريناتالدىق ورتالىقتا 6 بالاعا ارنالعان جانساقتاۋ ءبولىمى بىلتىر اقپان ايىندا اشىلعان بولاتىن. قازىردە جانساقتاۋ بولىمىندە 8 نارەستە ەم الىپ, ونىڭ ەكەۋى وتتەگى قابىلداپ جاتىر. 1 نارەستە CPAP اپپاراتىنا, 1 نارەستە ءوجج قۇرىلعىسىنا قوسىلعان. قالعان بالالار اۋىر جاعدايدان شىعىپ, وزدىگىمەن دەمالىپ, ەمدەلىپ جاتىر.
ماڭعىستاۋ وبلىسى
