بۇل – مەملەكەت باسشىسى قاسىم-جومارت توقاەۆتىڭ تاپسىرماسىمەن باستاۋ العان «جايلى مەكتەپ» ۇلتتىق جوباسى اياسىندا ماڭعىستاۋ وبلىسى بويىنشا اشىلعان 13-ءبىلىم ورداسى. بۇعان دەيىن وڭىردە اقتاۋ قالاسىنىڭ 17, 19 جانە 33-شاعىن اۋداندارىندا, سونداي-اق مۇنايلى اۋدانىنىڭ باتىر اۋىلىنداعى حازار شاعىن اۋدانىندا
4 500 ورىندىق 4 مەكتەپتىڭ قۇرىلىسى اياقتالعان ەدى.
قازىرگى تاڭدا 825 وقۋشى ءبىلىم الىپ جۇرگەن جاڭا مەكتەپ زاماناۋي 66 ءپان كابينەتىمەن, ونىڭ ىشىندە STEM-زەرتحانالار, قىش ونەرى, ۆيزۋالدى ديزاين, حورەوگرافيا سياقتى شىعارماشىلىق باعىتتارعا ارنالعان كابينەتتەرمەن جابدىقتالعان. ەرەكشە ءبىلىم بەرۋدى قاجەت ەتەتىن بالالار ءۇشىن سوڭعى ۇلگىدە جاساقتالعان سەنسورلىق كابينەت, لوگوپەد, دەفەكتولوگ جانە پسيحولوگ كابينەتتەرى بار.
– وڭىرىمىزدە مەملەكەت باسشىسىنىڭ تاپسىرماسىمەن باستاۋ العان «جايلى مەكتەپ» ۇلتتىق جوباسى ءساتتى جۇزەگە اسىپ جاتىر. بالالاردىڭ ساپالى ءبىلىم الۋى ءۇشىن مەكتەپتەر زاماناۋي جانە جايلى بولۋعا ءتيىس. بۇل – ءبىزدىڭ بولاشاعىمىزدىڭ كەپىلى. پرەزيدەنتىمىز اتاپ وتكەندەي, ورتا ءبىلىم بەرۋ دەڭگەيىنىڭ ساپاسىن ارتتىرۋ – ۇلتتىق بولاشاعىمىز ءۇشىن ماڭىزدى قادام. وسىنداي مەكتەپتەردىڭ ىسكە قوسىلىپ جاتقانى ءبىزدى قۋانتادى. جاس ۇرپاققا ءبىلىم جولىندا ساتتىلىك تىلەيمىن! – دەدى جاڭا مەكتەپتىڭ اشىلۋ سالتاناتىندا ماڭعىستاۋ وبلىسى اكىمىنىڭ ورىنباسارى اببات ورىسباەۆ.
ماڭعىستاۋ وبلىسى
