فوتو: استانا اكىمدىگى
قالادا وتاندىق جانە شەتەلدىك ينۆەستورلار قارجى قۇيعان زاۋىت پەن ءوندىرىس ورىندارى جىل سايىن اشىلىپ جاتىر.
«بۇگىنگى تاڭدا اەا-تاعى ونەركاسىپتىك وبەكتىلەرىنىڭ ينۆەستيتسيالىق پورتفەلى 130 جوبادان قۇرالعان. ونىڭ ىشىندە بۇگىنگە دەيىن 5 700-دەن استام تۇراقتى جۇمىس ورنىن قامتيتىن 70 جوبا پايدالانۋعا بەرىلدى. ال الداعى 3 جىل ىشىندە 3 200 جۇمىس ورنىن قۇراتىن 60 جوبا ىسكە اسىرىلادى. سونداي-اق وسى №1 يندۋستريالىق پاركتە لوكوموتيۆتەر, ەلەكتروۆوزدار شىعاراتىن, ارنايى كيىمدەر تىگەتىن, وپتيكالىق قۇرىلعىلار, قۇرىلىس ماتەريالدارىن شىعاراتىن ۇلكەن زاۋىتتار جۇمىس ىستەپ تۇر. اتالعان بارلىق كاسىپورىندا ينجەنەر-مەحانيك, سلەسار, دانەكەرلەۋشى, ەلەكتريك, ساندىق باعدارلامالىق باسقارۋ وپەراتورلارى, ءوندىرىس مەنەدجەرلەرى سياقتى ءوز سالاسىنا جەتىك ماماندار جۇمىس ىستەيدى», دەيدى استانا قالاسىنىڭ ينۆەستيتسيالار جانە كاسىپكەرلىكتى دامىتۋ باسقارماسىنىڭ اەا, ونەركاسىپ جانە ەكسپورتتى ىلگەرىلەتۋ ءبولىمىنىڭ باسشىسى ايدىن قيىلىمبەكوۆ.
ءبولىم باسشىسىنىڭ سوزىنشە, بىلتىر مۇندا 770-تەن استام جۇمىس ورنىن قۇرۋعا قاۋقارلى 13 جوبا پايدالانۋعا بەرىلگەن. ال وسى جىلى 1300-دەن استام جۇمىس ورنىنان تۇراتىن 21 جوبانى ىسكە قوسۋ جوسپارلانىپ وتىر.
ايتا كەتەيىك, №1 يندۋستريالىق پارك رەسپۋبليكالىق كورسەتكىشتەر بويىنشا ەلدەگى بارلىق پارك اراسىندا كوشباسشى بولىپ وتىر. جۇمىس ىستەۋ كەزەڭىندە بۇل پارك 8,6 ترلن تەڭگە ءوندىرىس كولەمىنە جەتتى. سونداي-اق اتالعان پاركتىڭ تابىستى تاجىريبەسى №2 يندۋستريالىق پاركتى ىسكە قوسۋدى دا جەدەلدەتەتىنى انىق.
