باتىس قازاقستاندا جاستاردىڭ 60 پايىزى اسكەرگە جارامسىز

ورال. 30 ءساۋىر. باتىس قازاقستان وبلىسىندا كوكتەمگى اسكەرگە شاقىرتۋ ناۋقانى ناتيجەسى بويىنشا ءاربىر ەكىنشى جەتكىنشەك دەنساۋلىعىنا بايلانىستى اسكەري قىزمەتكە جارامسىز بولىپ شىقتى. بۇل تۋرالى egemen.kz ءتىلشىسى حابارلادى. ورال قالالىق قورعانىس ىستەرى جونىندەگى ءبولىمنىڭ مەڭگەرۋشىسى مارات تۇقپاەۆتىڭ ايتۋىنشا, سوڭعى ءۇش جىلدىڭ ىشىندە اسكەرگە شاقىرىلۋشىلار اراسىندا كوز كورۋ جۇيەسىنىڭ ناشارلاۋى كوپتەپ كەزدەسۋدە. «شامامەن اسكەرگە شاقىرىلۋشىلاردىڭ 60 پايىزى اسكەري قىزمەتكە جارامسىز. سوڭعى ءۇش جىلدا دارىگەرلىك كوميسسيانىڭ ايقىنداۋىنشا, جاستار اراسىندا كوز كورۋ جۇيەسىنىڭ السىرەگەنى بايقالادى. ماماندار ونىڭ سەبەبىن مونيتورعا نەمەسە سمارتفون مەن پلانشەت ديسپلەيىنە كوپ ۇڭىلۋمەن تۇسىندىرەدى. ۋاقىت وتكەن سايىن دەنساۋلىعىنا بايلانىستى اسكەرگە جارامسىزدار قاتارى كۇرت كوبەيۋدە. بۇل جان تۇرشىگەرلىك ديناميكا», – دەيدى مارات تۇقپاەۆ. سونداي-اق, ول كوز كورۋ جۇيەسىمەن قاتار, جۇرەك, قان اينالىم اۋرۋلارى دا جاستار اراسىندا كوپ كەزدەسەتىنىن ايتتى. بۇل جونىندە ول: «بۇعان سەنۋ قيىن, الايدا, جاستاردىڭ قاتارىندا قان قىسىمى 140-تان 180-گە دەيىن  جەتكەندەرى جەتىپ ارتىلادى. ەڭ باستى قاۋىپ, بۇل كەلەڭسىزدىكتىڭ جاپپاي كورىنىس تابۋىندا. مەنى وسى جاعى قاتتى قوبالجىتادى. بۇل جاي عانا ستاتيستيكا ەمەس, وسىنداي كورسەتكىش جىلدان جىلعا ارتىپ كەلەدى. جاس جىگىتتەرىمىزدىڭ دەنساۋلىعى – ۇلتتىڭ دەنساۋلىعى! بولاشاق ۇرپاققا ەلىمىزدى امان-ەەن اماناتتاۋ ءۇشىن وسى ماسەلەگە اسا ءمان بەرۋىمىز قاجەت», – دەيدى مارات باقىتجان ۇلى. تەمىر قۇسايىن. دەرەك: egemen.kz. سۋرەت: newskaz.ru.