اقتوبە. 1 مامىر. اقتوبە قالاسىندا قازاقستان حالقىنىڭ بىرلىگى كۇنى ايرىقشا اتالىپ ءوتىلدى. بۇل تۋرالى egemen.kz ءتىلشىسى حابارلادى.
ابىلقايىر حان ەسكەرتكىشى الدىنداعى الاڭعا كۇن كوتەرىلمەي-اق قاراقۇرىم حالىق جينالىپ قالىپتى. بۇلار – مەرەكەگە وراي ۇيىمداستىرىلعان «سەنىڭ مارافونىڭ – سەنىڭ جەڭىسىڭ» اتتى مارافونعا قاتىسۋشىلار. قالانىڭ كاسىپورىندارى مەن ۇيىمدارىنان جانە جوعارى وقۋ ورىندارى مەن كوللەدجدەردەن, مەكتەپتەردەن بارلىعى 4,5 مىڭ ادام قاتىسقان مارافوندا ەرلەر 21, ايەلدەر 10, ال, بۇقارالىق مارافونشىلار 3 شاقىرىمعا جۇگىرىپ ءوتىپ, قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان نازارباەۆ اتىنداعى ورتالىق ساياباققا جينالدى.
مۇندا دا مەرەكە الدەقاشان باستالىپ كەتكەن. تۇرلەنىپ, تۇلەپ كەتكەن ساياباق ورتاسىنداعى ۇلكەن ساحنادان سان ۇلتتىڭ اۋەزدى ءۇنى اسقاقتايدى. مەرەكەلىك شارانىڭ سالتاناتتى اشىلۋىندا وبلىس اكىمىنىڭ ورىنباسارى سارا نۇرقاتوۆا قۇتتىقتاۋ ءسوز سويلەپ, ەلىمىزدەگى ۇلتارالىق دوستىق پەن بىرلىكتىڭ تەرەڭنەن تامىر تارتاتىنىن, وعان ەلباسى ۇستانعان سارابدال ساياساتتىڭ بەرىك ىرگەتاس قالاپ وتىرعانىن جەتكىزدى. سودان كەيىن ەلىمىزدەگى تاتۋلىق پەن تۇراقتىلىققا ەلەۋلى ۇلەس قوسىپ جۇرگەن ەتنومادەني بىرلەستىكتەر توراعالارى مەن مۇشەلەرىنە «قازاقستان حالقى اسسامبلەياسىنىڭ 20 جىلدىعى» مەرەكەلىك مەدالىن تاپسىردى.
شارا بارىسىندا مارافون جەڭىمپازدارى دا ماراپاتتالىپ, ولارعا اقشالاي جانە ەسكەرتكىش سىيلىقتار تاپسىرىلدى. سوڭىندا جينالعاندارعا «دوستىق» وبلىستىق جانە «قازاقستان – دوستىقتىڭ مەكەنى» اتتى ايماقتىق فەستيۆال لاۋرەاتتارىنىڭ گالا-كونتسەرتى ۇسىنىلدى.
ساتىبالدى ءساۋىرباي.
دەرەك, سۋرەت: egemen.kz.
