ىنتالىعا بەرەكە بار

بىلتىر قولعا الىنعان ينۆەستي­تسيالىق جوبا كەزەڭ-كەزەڭىمەن جۇزەگە اسىپ, 400 باس ءىرى قاراعا شاقتالعان فەرما قۇرىلىسى اياقتالدى. قۇرىلتايشىلار جوبانى تولىق اياقتاپ شىعۋ 700 ملن تەڭگە قاراجات جۇمسادى. قازىر كومپانيا «كوكشە» الەۋمەتتىك-كاسىپكەرلىك كورپوراتسياسىنان 1 ملرد 87 ملن تەڭگە نەسيە الىپ, ەكىنشى فەرمانىڭ قۇرىلىسىن باستاپ كەتتى. جاڭا فەرما دا 400 باسقا لايىقتالعان.

كاسىپورىن ءسۇت ونىمدەرىن وڭدەۋدى جولعا قويۋ ءۇشىن جاڭا تەحنولوگيانى پايدالانادى. ءتورت ت ۇلىك مالدىڭ ءتىلىن تابۋ جەرگىلىكتى جۇرت ءۇشىن تاڭسىق شارۋا ەمەس. ال ءونىمىن وڭدەۋ – ايرىقشا ماڭىزدى ماسەلە. باعزى زامانداعىداي «قويىن قۇرتتاپ, ايرانىن ۇرت­تاپ» جۇرە بەرۋگە بولمايدى. بار دۇنيەنى ۇقساتا بىلگەن ءجون. ادىرلى, تاستاق, ءشوبى قۇنارلى ولكە قارا مال ءۇشىن مەيلىنشە قولايلى. ايتسە دە, تىڭعا تۇرەن سالعان انە ءبىر جىلدارى قۇيقالى ءوڭىردىڭ قۇتى قاشقانى دا شىندىق. سوندىقتان مال ازىعىن مەي­لىنشە تۇرلەندىرىپ, مول دايىن­­داماي, قىر اسۋ قيىنداي بەر­مەك­شى. ماسەلەنىڭ ءمانىسىن جاق­سى تۇسىنگەن سەرىكتەستىك «سيىر­دىڭ ءسۇتى تىلىندە» ەكەنىن جاقسى بىلەدى. مال باعۋ ءادىسىن دە عىلى­مي نەگىزدە جەتىلدىرىپ, تولىمدى ەتىپ جاتىر.

سەرىكتەستىك سەنىمدى قادام جاساپ, الدىنا بيىك ماقسات قويىپ وتىر. ناتيجەگە قول جەتكىزەتىنى دە ءسوزسىز. سەبەبى سەرىكتەستىك باسشىسى ەرلان الين ىسكەرلىگىمەن تانىلعان ازامات. تاجىريبەلى باسشى بىلىكتى مامان عانا ەمەس, تۋعان جەردىڭ ءتۇتىنىن ءتۇزۋ ۇشىرۋعا ايانباي اتسالىسىپ جۇرگەن جاناشىر جان. جارقايىڭدىقتار ءۇشىن ەرلان ءاليننىڭ جانقيارلىق ەڭبەگى ادەمى ۇلگىگە اينالعان. بۇل توڭىرەكتە شارۋاشىلىق تۋرالى سۇراي قالساڭىز, حالىقتىڭ دەنى وسى سەرىكتەستىكتى ماقتانا اۋىزعا الارى ءسوزسىز. اۋا رايى كۇرت وزگەرىپ, كەي جىلدارى قىرىن قاباق تانىتسا دا, جۇرت­­تى جاقسى­لىققا باستاپ ءجۇر. ادال ەڭبەككە ۇيىم­داس­تىرىپ, قاجىر-قايراتىن ءبىر ارنادا توعىس­تى­را بىلەتىن جانە بولا­شاعىن بولجاپ, كەلەشەگىن كەمەل ەتۋگە تىرىساتىن ەڭبەككەر جاننىڭ بەينەسى ناعىز بۇگىنگى كۇننىڭ قاھارمانى كەيپىندە. ءبىر قىزىعى, سەرىكتەستىك باسشى­سىنىڭ ماماندىعى وزگە تاراپتان ەكەن. اۋەلى دەنە تاربيەسىنىڭ مۇعالىمى بولعان, شاڭعى سپورتىمەن بەلسەندى اينالىسقان. اسكەري بورىشىن وتەپ كەلگەننەن كەيىن جاتتىقتىرۋشى بولىپ ەڭبەك ەتكەن. الدە قيىندىقتان قايىسپاۋ, جول-جونەكەي كەزدەسكەن بوگەسىندى بۇزىپ-جارىپ, العا ۇمتىلۋ سپورتتا قالىپتاسقان مىنەز بە ەكەن؟

اۋەلى «سايان» شارۋا قوجا­لىعىن قۇرىپتى. مالدى ءوز تولى­نەن ءوسىرىپ, قاجەتتى تەحنيكانى جيناقتاپ, ەسكىنى جاماپ-جاسقاعان. ءتورت قۇبىلاسىن تۇگەل­دەگەن سوڭ «تەمىرلان» جاۋاپ­كەرشىلىگى شەك­­­تەۋلى سەرىك­تەستىگىن قۇرعان. بۇگىن­گى بوساعاسىنا بەرەكە بىتكەن ۇجىم­­نىڭ العاشقى باستاۋى وسىلاي قالىپتاسقان. كەيىن ەرلان قينۋاربەك ۇلى ءىستىڭ كوزىن تابا بىلگەن ىلكىمدىلىگىنىڭ ارقاسىندا شارۋاسىن مىعىمداي تۇسكەن. يگى­لىگىن ەل كورىپ وتىر. سەرىكتەستىك ونىمدەرى ساپاسى جاعىنان جوعارى باعالانادى. تۇتىنۋشىلار تاراپىنان وكپە-ناز ايتىلعان ەمەس.

جالعىز ءتورت ت ۇلىك مال ەمەس, تىڭ دالا توسىندە اقىق ءدان دە وسىرەدى. ەگىستىك القابى 45 مىڭ گەكتاردى قۇرايدى. كەشەگى كەڭەس زامانىنداعى ەكى كەڭشاردىڭ جەرى. وسىنشاما جەردى وڭدەۋ ءۇشىن قۋاتتى تەحنيكا, قاجىرلى جۇمىس كۇشى كەرەك ەكەنى بەلگىلى. بولاشاقتىڭ جايىن ويلاعان شارۋاشىلىق باسشىسى اۋىل شارۋاشىلىعىنا قاجەتتى تەحنيكانى تولىق جاڭعىرتقان.

«تەمىرلان» سەرىكتەستىگى قا­زىر بەرى قويعاندا اۋدانداعى, ءارى قوي­عاندا وڭىردەگى ەتەك-جەڭى كەڭ پىشىلگەن ءىرى اۋىل شارۋا­شىلىعى كاسىپورنى ساناتىندا. سەرىكتەستىك ءوز شارۋاسىن ىجداعاتتاۋمەن قاتار, اۋداننىڭ الەۋمەتتىك-تۇر­مىس­تىق جاعدايىنىڭ جاق­سارۋىنا كوپ كومەك كورسەتەدى. ەلدى مە­كەندەردىڭ جولىن جون­دەۋ­گە, ءبىلىم جانە مادەني نىسانداردى جاڭعىرتۋ جولىندا دا ايانىپ قالعان ەمەس.

بيىل ءتورت بىردەي ينۆەستي­تسيا­لىق جوبانى قولعا الىپ, جۇزەگە اسىرىپ جاتىر. ەگىن شارۋا­شى­لى­عىندا تابىسقا قول جەتكىزۋ ءۇشىن 340 گەكتار القاپتى سۋارمالى ەگىستىككە كوشىرۋ ماقساتىندا يتالياندىق قۇرىلعى ساتىپ العان. جەلىلىك ەلەۆاتورعا ساپاسى مىقتى تۇرىك قۇرىلعىسىن ورناتقان. شيىرا ايتقاندا, سەرىكتەستىك تابىسقا قول جەتكىزۋمەن قاتار, ءوز اۋىلىمەن بىرگە تۇتاس اۋداننىڭ دا احۋالىن جاقسارتۋعا سەپتىگىن تيگىزىپ كەلەدى.

اقمولا وبلىسى,

جارقايىڭ اۋدانى