مەكەمتاس مىرزاحمەت ۇلى دۇنيەنىڭ ىزگى ءبىلىمىن جان مەن جۇرەكتىڭ يگىلىگىنە اينالدىردى, ەلدىڭ وسەر وركەنىنە جان مەن جۇرەكتەگى وسى يگىلىكتىڭ, اقىل مەن ويداعى قازىنانىڭ كىلتىن ۇستاتتى, ۇدايى شىعارماشىلىق ىزدەنىس, ۇدايى شىعارماشىلىق ويلاۋ, ۇدايى شىعارماشىلىق ەڭبەك ۇستىندە بولدى. عۇلاما-ۇستازدىڭ عىلىم مەن بىلىمگە تالپىنعان, عىلىم مەن ءبىلىمنىڭ قادىرىن بىلەتىن جاس پەن كارىنى بىردەي سۇيىندىرگەن, ريزا ەتكەن قاسيەتىنىڭ جارقىن جارىعى وسىندا ەدى.
ادامنىڭ ومىرىندە ءبارى دە وتپەلى: جاستىق وتەدى; اجار تايادى; كۇش قايتادى. ادامنىڭ ءوزى وتسە دە, وشپەيتىن, توزبايتىن, ازبايتىن اسىل بايلىعى – ءتاڭىرى سىيلاعان شىعارماشىلىق ويلاۋى مەن شىعارماشىلىق ويى. بىراق مۇنداي اسىل بايلىقتى عىلىمدا اركىم ەمەس, ناعىز شىعارماشىلىق تۇلعا, كەمەل ادام دەڭگەيىنە كوتەرىلگەن عۇلاما ۇستاز عانا ۇستاي الادى, سول عانا ەل يگىلىگىنە جاراتا الادى. تەك سول عانا شىعارماشىلىق ويلاۋى مەن شىعارماشىلىق ويىن بۇكىل عۇمىر بويى عانا ەمەس, قابىردەن ءارى وتكەندە دە سەرىك ەتەدى. شىعارماشىلىق ويلاۋى مەن ويىن كەمەلىنە كەلتىرىپ, سودان تاپقان ءبىلىمىن, جالپى عىلىمي-شىعارماشىلىق ەڭبەگىن ەل يگىلىگىنە جۇمساۋعا اسىققان, ايانباي جۇمساعان كىسى عانا كامىل ۇستاز, تولىق عالىم قاسيەتىنە لايىقتى. مەكەمتاس مىرزاحمەت ۇلى بوتەن ىسكە الاڭداماي, بوگدە سوزگە ارالاسپاي, اقىرىن ءجۇرىپ, انىق باسىپ وتكەن كامىل ۇستاز, تولىق عالىم, دەگدار عۇلاما, ءبىلىمى مەن ءىلىمىن, جالپى عىلىمي-شىعارماشىلىق جانە ۇستازدىق ەڭبەگىن ەل يگىلىگىنە ەرىنبەي, ەسەپسىز جاراتقان ابزال جان, اياۋلى ازامات, قايراتكەر تۇلعا ەدى.
ء«ومىردىڭ جولى – تار سوقپاق...» دەيدى اباي. عىلىمنىڭ جولى ودان دا تار. ال ادەبيەت تۋرالى عىلىم – ەڭ ءبىر بەينەتى اۋىر عىلىم. ونىڭ تەرەڭىنە بويلاپ, بيىگىنە شىعۋ وڭاي ەمەس. ادەبيەتتانۋ عىلىمىندا شىن عالىمعا اۋىردىڭ ۇستىمەن, جەڭىلدىڭ استىمەن ءجۇرۋ جوق. شىن عالىمنىڭ ءوزى سالىپ, ءوزى جالعايتىن ءبىر-اق جول بار. ول – ماڭداي تەرى مونشاقتاپ اققان ادال ەڭبەك پەن اقيقات جولى. ءبىزدىڭ زايىرلى ومىرىمىزدە بۇل جول حاق جولىمەن پارا-پار.
كەلەر ۇرپاعىنا, وسەر وركەنىنە: «مەن – ءبىر جۇمباق اداممىن», دەپ تىلەگىن, ءوتىنىشىن قالدىرعان ابايدىڭ جۇمباعىن شەشۋ وڭاي ەمەس. اباي جايىندا ەڭبەك جازعان, زەرتتەۋ جۇرگىزگەن عالىمداردىڭ ءبارى دە وسى جۇمباقتىڭ شەشۋىن ىزدەگەن جانە ءبارى دە ىشتەي سول جۇمباقتى شەشتىم دەپ مارقايادى. ورىندى. ويتكەنى ءار عالىم ابايدى ءوز كوزىمەن كورىپ, ءوز كوڭىلىمەن تانيدى. ۇلى اقىننىڭ جۇمباعىن دا ءار عالىم تەك وزىنشە شەشەدى. جۇمباق بىرەۋ بولعاندا, ونىڭ شەشۋى الدەنەشە. جانە سول شەشۋلەردىڭ ءبارى دە دۇرىس. اباي جۇمباعىنىڭ, ۇلىلىعىنىڭ سىرى وسىندا. مەكەمتاس مىرزاحمەت ۇلى ابايدىڭ جۇرەگىنە, ابايدىڭ اقىندىق الەمىنە ءوز زامانداستارىنان تەرەڭ بويلادى, ءسويتىپ اقىننىڭ جۇمباعىن دا اقيقاتىنا جەتىپ, بۇگىنگى عىلىمي ويدىڭ, بۇگىنگى ابايتانۋدىڭ ۇشار بيىگىنە شىعىپ شەشتى. ءبىزدىڭ زامانىمىزدىڭ ابايتانۋىندا ول بيىككە ازىرگە مەكەڭنەن باسقا ەشكىم كوتەرىلگەن جوق.
مەكەمتاس مىرزاحمەت ۇلى ءوزى ءومىرىن ارناعان عىلىمعا وزگەلەردى دە ىنتالاندىرىپ, سولار ارقىلى كەلەر ۇرپاقتىڭ, وسەر وركەننىڭ جولىنا ساۋلە شاشىپ, جارىق ءتۇسىردى. ۇستاز بالا كۇيىندە قابىلداپ, مامان دارەجەسىنە جەتكىزىپ تاربيەلەپ شىعارعان مىڭداعان شاكىرتىنىڭ قازىرگى شاقتا ءبارى بىردەي پىراق بولماعانىمەن, ارقايسىسى – ءبىر شىراق. ولاردان ۇستاز ءومىرىنىڭ جارىعى مەن قىزۋى تارايدى.
ادەبيەت – ءسوز ونەرى. ءسوز ونەرىنەن ارداقتى ونەر جوق. ويتكەنى ول – ۇلتىمىزدىڭ اقىل-ويى, ار-وجدانى, ابىرويى. ءسوز ونەرى تۋرالى عىلىمنان اياۋلى عىلىم جوق, ويتكەنى ول – ۇلتىمىزدىڭ اقىل-ويى, ار-وجدانى, ابىرويى تۋرالى عىلىم. مەكەمتاس مىرزاحمەت ۇلى وسى اقىل-ويىمىزدىڭ ابايتانۋداعى ۇشار بيىگى, وسى ار-وجدانىمىزدىڭ اۋەزوۆتانۋداعى ساڭلاق ساراپشىسى, وسى ابىرويىمىزدىڭ باۋىرجانتانۋداعى بيىك بايتەرەگى ەدى.
اللا الدىڭىزدان جارىلقاسىن, ارداقتى ۇستاز!
جانعارا دادەباەۆ,
ءال-فارابي اتىنداعى قازۇۋ اباي عىلىمي-زەرتتەۋ ينستيتۋتىنىڭ ديرەكتورى,
پروفەسسور
