فوتو: ufa.tts.ru
ءتارتىپ ساقشىلارى جول قوزعالىسىنا قاتىسۋشىلارعا ەرەجەلەردى قاتاڭ ساقتاۋدى, سونىڭ ىشىندە جول-كولىك وقيعالارى سالدارىنان بولاتىن جاراقاتتاردى ازايتۋ ءۇشىن ارنايى بالالاردى ۇستاۋ قۇرالدارىن پايدالانۋ قاجەتتىگىن ەسكەرتتى.
«جىل باسىنان بەرى الماتى جولدارىندا بالالاردىڭ قاتىسۋىمەن 1511 جول-كولىك وقيعاسى تىركەلىپ, سالدارىنان ءتورت بالا كوز جۇمعان, تاعى 1600-دەن استام بالا جاراقات العان. بالالاردى اۆتو ورىندىقتارعا وتىرعىزۋ اۋرە-سارساڭ ەمەس, بۇل جول قوزعالىسىنىڭ ەڭ جاس قاتىسۋشىلارىنىڭ قاۋىپسىزدىگىنە كەپىلدىك بەرەتىن تالاپتار ەكەنىن ءتۇسىنۋ وتە ماڭىزدى», دەدى الماتى قالاسى پد جەرگىلىكتى پوليتسيا قىزمەتى باسقارماسى باستىعىنىڭ ورىنباسارى تيمۋر نوعايباەۆ.
پروفيلاكتيكالىق ءىس-شارالار بارىسىندا پوليتسيا قىزمەتكەرلەرى كولىك جۇرگىزۋشىلەرىنە تاقىرىپتىق جادىنامالار تاراتىپ, بالالار قاۋىپسىزدىگى ماسەلەسىنە ەرەسەكتەردىڭ نازارىن اۋداردى.
«بالالاردىڭ جولداعى قاۋىپسىزدىگى ەڭ الدىمەن وزىمىزگە بايلانىستى. كوپتەگەن اتا-انا بالاسىن تاسىمالداۋ ءۇشىن اۆتو ورىندىقتىڭ قاجەتى جوق دەپ ەسەپتەيدى, سەبەبى بالالار تەز ءوسىپ كەتەدى. بىراق بالالاردى تاسىمالداۋعا ارنالعان ترانسفورماتسيالاناتىن ورىندىقتى ساتىپ الۋعا بولادى. بالالارىڭىزعا قامقور بولىڭىزدار», دەدى تيمۋر نوعايباەۆ.
