Almaty.tv ارناسىنىڭ حابارلاۋىنشا, بويجەتكەن جۇمىسىنان شىعىپ, ۇيىنە جاياۋ قايتقان. سول كەزدە بىرنەشە ەر ادام ونى اۆتوكولىككە كۇشپەن وتىرعىزىپ, بەلگىسىز جاققا الىپ كەتكەن. فيتنەس جاتتىقتىرۋشى بولىپ جۇمىس ىستەگەن الينا ولارمەن قارسىلاسپاق بولادى, بىراق ونىسىنان تۇك شىقپايدى. مارقۇمنىڭ ءىنىسى باۋىرجان جولجان «زىڭگىتتەي جىگىتتەر قىزدى كولىككە تيەپ, كوزىن بايلاپ, بەلگىسىز باعىتقا الىپ كەتكەن» دەيدى.
«ەگەر دە ايتقانىمدى ىستەمەسەڭ, تىر جالاڭاش شەشىندىرىپ, ءتورت ەركەكتىڭ اراسىنا سالىپ جىبەرەم دەگەن. ماشينادا قورلاعان. ولاردىڭ بارلىعى دا مەفەدرون ەسىرتكىسىنىڭ كۇشىمەن جۇرگەن», دەدى مارقۇمنىڭ ءىنىسى باۋىرجان جولجان.
باستى كۇدىكتى جاس قىزدى كولىك ىشىندە زورلاپ بولعان سوڭ دا جابىرلەنۋشىنى ەركىنە جىبەرمەگەن. كەرىسىنشە, ونى گاز قۇيۋ بەكەتىنىڭ كۇزەتشى وتىراتىن بولمەسىندە قاماپ ۇستاعان.
«بىزدەن قۇتىلۋ ءۇشىن اقشا بەرۋىڭ قاجەت» دەيدى. سول جەردە ءموبيلدى قوسىمشا ارقىلى اپكەمنىڭ اتىنا 2 ملن تەڭگە نەسيە راسىمدەيدى. جانارماي بەكەتىنىڭ ارتىنا كولىگىن قويىپ, تاڭ اتقانعا دەيىن وسىندا ۇستايدى. سوسىن اپكەمدى ساعات 11:00-دە ءۇي جاعىنان ءتۇسىرىپ كەتەدى. «ەگەر سەن بۇل جاعدايدى ايتاتىن بولساڭ, اكە-شەشەڭدى, سەنىڭ دە قايدا تۇراتىنىڭدى بىلەمىز, بارلىعىن ولتىرەمىز دەپ قورقىتقان», دەيدى مارقۇمنىڭ ءىنىسى.
وسى وقيعادان ءتورت كۇن وتكەن سوڭ, ياعني 18 مامىردا الينا سەرىكوۆا 9-قاباتتان سەكىرىپ, كوز جۇمادى. تۋىستارى ونىڭ بۇل ارەكەتىنە «بەس جىگىتتىڭ قورلىق كورسەتكەنى سەبەپ بولدى» دەپ وتىر. ال مارقۇمنىڭ ءىنىسى سوت ۇكىمىمەن كەلىسپەيدى. باستى كۇدىكتى سانالعان 33 جاستاعى ازامات قىلمىستىق كودەكستىڭ 8-بابى بويىنشا 20 جىلعا باس بوستاندىعىنان ايرىلعان. باسقا ەكى جىگىت – 7 جىلعا, ال قالعان ەكەۋى 8 جىلعا جازا ارقالعان. ىلە-شالا وبلىس پروكۋراتۋراسى دا سوتتىڭ ۇكىمىنە اپەللياتسيالىق شاعىم ءتۇسىردى. قازىرگى تاڭدا ءىس اپەللياتسيالىق ساتىدا قارالۋدا.
