100-گە كەلگەن ميللياردەر دەۆيد روكفەللەر 6-رەت جۇرەگىن اۋىستىردى

استانا. 1 مامىر. بەلگىلى ميللياردەر, الداعى شىلدەدە 100 جاسقا تولاتىن دەۆيد روكفەللەر ومىرىندە 6-رەت جۇرەك ترانسپلانتاتسياسىن جاساتتى. بۇل تۋرالى Word News Dally Report باسىلىمى حابارلادى. 6 ساعاتقا سوزىلعان وتانى نيۋ-يوركتەگى روكفەللەر اۋلەتىنە تيەسىلى پوكانتيكو-حيلل سارايىندا ميللياردەرلەردىڭ جەكە حيرۋرگتارىنان قۇرىلعان توپ جاسادى. وتادان كەيىنگى قايتا قالپىنا كەلۋ كەزەڭى تىنىق مۇحيتىنىڭ ورتاسىنداعى ۆانۋاتۋ ارالىندا وتەدى. وپەراتسيادان كەيىن 36 ساعات ۋاقىت وتكەندە دەۆيد روكفەللەر جۋرناليستەرگە وزىنە بىرنەشە سۇراق قويۋعا رۇقسات بەرگەن. «جۇرەگىمدى اۋىستىرعان سايىن, بۇكىل دەنەمە قان جۇگىرىپ, ءومىردىڭ ءبىر تامشىسىنداي بولعان تىلسىم كۇش بويىما قۋات بەرگەنىن سەزىنەمىن. سول كەزدە ءوزىمنىڭ ءتىرى جانە بەلسەندى ەكەنىمدى بىلەمىن», – دەيدى ميللياردەر. ۇزاق ءومىر ءسۇرۋدىڭ قۇپياسى تۋرالى سۇراققا روكفەللەر: «ماعان بۇل سۇراق ءجيى قويىلادى. بارىنە بەرەر جاۋابىم بىردەي. ياعني, ۇزاق جاساۋداعى بار سىرىم – مەنىڭ ومىرگە دەگەن ماحابباتىم, ونى شەكسىز ءسۇيۋ. قاراپايىم ءومىر ءسۇرۋ, جاس بالالارمەن بالا بولىپ ويناۋ, قولىڭدا بار دۇنيەگە قاناعات ەتۋ, ۋاقىتىڭدى سىر بولىسەر دوستارىڭمەن وتكىزۋ. مىنە, مەنىڭ ءومىرىمنىڭ نەگىزگى فورمۋلاسى وسىنداي», – دەدى. ول ءوز ومىرىندە وتە كوپ اقشا تاۋىپ, بايلىققا كەنەلگەنىن, الايدا, دۇنيەسىنىڭ كوپ بولىگىن قايىرىمدىلىققا بەرگەنىن ايتتى. «بايلىعىڭدى وزگەلەرمەن ءبولىسۋ مۇمكىندىگىنە يە بولا تۇرا, ونى وزىڭدە قالدىرۋ – ماعىناسىز تىرلىك», – دەيدى دەۆيد روكفەللەر. ايتا كەتەيىك, ميللياردەر العاش رەت جۇرەگىن 1976 جىلى اۋىستىرعان. ول كەزدە كولىك اپاتىنا ۇشىراۋى سەبەپ بولعان. اتالعان اپاتتان كەيىن 24 ساعات ۋاقىت وتكەندە روكفەللەرگە جۇرەك ترانسپلانتاتسياسى جاسالدى. ال ءبىر اپتادان كەيىن ول باياۋ بولسا دا جۇگىرە الاتىن حالگە جەتكەن. سونىمەن قاتار, 1998 جانە 2004 جىلدارى ميللياردەر بۇيرەگىن اۋىستىرعانىن ايتا كەتەيىك. بۇگىندە 100-گە كەلگەن دەۆيد روكفەللەر ءوزىن جاقسى سەزىنەتىنىن جانە دەنساۋلىعىنا ەشقانداي شاعىمى جوعىن ايتتى. ءتىپتى ول مۇنداي دەنساۋلىقپەن 200 جاسقا دەيىن ءومىر سۇرەتىنىنە ءۇمىتتى ەكەنىن دە ازىلمەن استارلاپ جەتكىزدى. دەۆيد روكفەللەر 1915 جىلدىڭ 12 شىلدەسىندە نيۋ-يورك قالاسىندا تۋعان. ول - الەمدەگى ەڭ العاشقى ميللياردەر دجون روكفەللەردىڭ نەمەرەسى. ەلامان قوڭىر. دەرەك: Word News Dally Report. سۋرەت: bloomberg.com.