تاسقىن سۋدان زارداپ شەككەندەردىڭ قاتارىندا اسقار تولىباەۆ تا بار. ول جىلىوي اۋدانىنىڭ ورتالىعى – قۇلسارى قالاسىندا ومىرگە كەلگەن. وسى شاھاردا ەڭبەك جولىن باستاپ, وتباسىن قۇرعان. ايەلى امانگۇل قالەنوۆامەن بىرگە 1 ۇل, 1 قىز تاربيەلەپ, كىندىك كەسكەن مەكەنىندە ءالى دە تۇرىپ جاتىر.
«ايەلىم ەكەۋمىز «تەڭىز» كەن ورنىندا ۆاحتالىق تاسىلمەن جۇمىس ىستەيمىز. جۇمىس ىستەيتىن كومپانيالارىمىز بولەك بولعانىمەن, ۆاحتاعا ءبىر مەزگىلدە بارامىز. سۋ تاسقىنىنان 5 كۇن وتكەن سوڭ ۇيىمىزگە كەلدىك. اۋلانىڭ ىشىندە تەرەڭدىگى تىزەگە جاقىن سۋ تۇردى. تاسقىن سۋ ءۇي مەن سارايدىڭ دا, گاراجدىڭ دا ىشىنە كىرگەن. مۇنى كورىپ, ءىشىمىز «ورتەنىپ-اق» كەتتى. بۇل ادامدى كۇيزەلىسكە تۇسىرەتىن جايت عوي. بىراق جەم وزەنىنىڭ تاسىعانىنا نە ىستەي الاسىڭ؟ وعان كىمدى كىنالايسىڭ؟», دەيدى ا.تولىباەۆ.
تاسقىن سۋ باسقان ءۇيىن كورىپ, ابدىراپ جۇرگەندە ءىنىسى تەلەفون شالىپتى. احۋالدان حاباردار بولعان سوڭ «ەندى نە ىستەپ جۇرسىڭدەر؟» دەپ سۇرادى.
«مۇندايدا نە ايتارىڭدى بىلمەيسىڭ. ايەلىم ەكەۋمىز اۋلاعا شىعىپ, تاسقىن سۋدى كەشىپ ءجۇرمىز. سول ساتتە ۇيلەنۋ تويلارىندا كوپ ايتىلاتىن مىنا ءبىر تىلەك ەسىمە تۇسە كەتتى. ءبىزدىڭ تويىمىزدا دا ايتىلعانىن ۇمىتقان جوقپىن. «ۇيلەنىپ جاتقان كەزدە قوس اققۋداي كولدە قاتار جۇزىڭدەر دەپ ەدى. مىنە, سول تىلەك 34 جىلدان كەيىن قابىل بولىپ, ءبىر-ءبىرىمىزدى جەتەكتەپ, قوس اققۋداي كولدە ءجۇرمىز» دەپ, ءازىل-شىنى ارالاس بەينەجازبا ءتۇسىردىم. ونى ءىنىمنىڭ سۇراعىنا جاۋاپ رەتىندە جىبەرگەن ەدىم», دەيدى ول.
كەيىن سول جازبا الەۋمەتتىك جەلىگە جۇكتەلىپ, كوپشىلىككە تارالعان. جەلى قولدانۋشىلارى ەرلى-زايىپتىلارعا جىلى پىكىرلەرىن ءبىلدىردى.
«سۋ باسقان ۇيىمىزگە ساراپشىلار مەن باعالاۋشىلاردى شاقىردىق. ماماندار ساراپتاۋ, باعالاۋ قورىتىندىسىن شىعاردى. سوعان سايكەس وتەماقى قارجىسىن الدىق. كەيبىر تۇرعىندار وزگە قالالارعا قونىس اۋدارىپ جاتتى. ال ءبىز كىندىك قانىمىز تامعان مەكەنىمىز – قۇلسارى قالاسىنان كەتكىمىز كەلمەدى. ونىڭ ۇستىنە تالاي قۋانىشىمىزدى اتاپ وتكەن ءۇيىمىزدى قيمادىق. ءسويتىپ, مەملەكەتتىڭ قولداۋىمەن ۇيىمىزگە كۇردەلى جوندەۋ جۇمىسىن جۇرگىزدىك. مامانداردىڭ قورىتىندىسىنا بايلانىستى گاراج بەن جازعى سارايىمىزدى بۇزىپ تاستادىق. قازىر سول ىستىق ۇيامىزدا تۇرىپ جاتىرمىز», دەيدى ا.تولىباەۆ.
جاڭا جىل قارساڭىندا ەرلى-زايىپتىلاردى «قىزىق Times» جوباسىنا شاقىردى. جوبانى ۇيىمداستىرۋشىلار «قوس اققۋ» اتانعان اسقار تولىباەۆ پەن امانگۇل قالەنوۆاعا «جىل جۇبى» اتالىمىن, دۋبايدا دەمالۋعا جولداما تاپسىردى.
ء«دال بۇلاي ەلگە تانىمال بولامىز دەپ ويلاماپ ەدىك. سۋ كەشىپ جۇرگەندەگى جازبا تانىمالدىلىق ءۇشىن ەمەس, سول كەزدەگى باسىمىزداعى جاعدايدى كورسەتۋ ءۇشىن تۇسىرىلگەن ەدى. دۋبايدا دەمالۋعا ءالى جينالا قويعان جوقپىز. ۆاحتالىق جۇمىسقا بارا جاتىرمىز. دەمالىستى كەيىن ويلاستىراتىن بولارمىز», دەيدى ا.تولىباەۆ.
اتىراۋ وبلىسى
