فوتو: akorda.kz
بۇل تۋرالى جۋرناليست جانبولات اۋپباەۆ قالي سارسەنبايعا بەرگەن سۇحباتىندا بىلاي باياندايدى:
«2004 جىلدىڭ 14 جەلتوقسانى ەدى. پرەزيدەنتتىڭ ءباسپاسوز قىزمەتىندەگى جىگىتتەردەن حابار الدىق. ولار ەلورداداعى وزدەرى وتىرعان ورتالىق الاڭداعى عيماراتتان ەسىلدىڭ سول جاعاسىندا سالىنىپ بىتكەن ۇلكەن رەزيدەنتسياعا كوشە باستاپتى. جيىلىپ-تەرىلۋ 10 كۇنگە سوزىلادى ەكەن. ال جاڭا قونىستىڭ سالتاناتتى تۇردەگى رەسمي اشىلۋى 24 جەلتوقسانعا بەلگىلەنىپتى», دەپ اڭگىمەسىن باستاعان ج. اۋپباەۆ گازەت ۇجىمى بۇل ايتۋلى ىسكە وراي كوشى-قونعا جاۋاپتى لاۋازىم يەلەرىنەن سۇحبات الۋ ۇسىنىسىمەن, سول كەزدەگى باسىلىم باسشىسى ساۋىتبەك ابدراحمانوۆقا كىرگەنىن ايتتى. باسشى بۇل باستامانى قۇپ كورىپ, ينتەرۆيۋگە سول تۇستاعى پرەزيدەنت كەڭسەسىنىڭ باستىعى ماحمۇت قاسىمبەكوۆتى لايىق كورىپ وتىرعانىن ايتادى. ال سۇحبات الۋشى – قۋات بوراش.
سول كەزدەن ءۇش كۇن وتكەندە دايىن سۇحبات ساۋىتبەك ابدراحمانوۆتىڭ نازارىنا قايتا ۇسىنىلادى.
ء«بىر كۇن...ەكى كۇن ءوتتى. حابار جوق. مازاسىزدانىپ, تىقىرشي باستادىق. ويتكەنى جوعارىداعى جاڭالىقتى وزگە گازەتتەر بىزدەن بۇرىن بەرىپ قويۋى مۇمكىن عوي. ءوستىپ دەگبىرسىزدەنىپ جۇرگەنىمىزدە, ساكەڭ (ساۋىتبەك ابدراحمانوۆ – رەد.) وزىنە شاقىردى-اۋ ايتەۋىر».
ء«سات سالىپ قاراڭىزدارشى... جاڭا استانا. جاڭا پرەزيدەنت اكىمشىلىگى ءۇيىنىڭ عيماراتى. ونداعى جاڭا ادامدار, جاڭادان باستالعان جوبا. جۇمىستار. وسىنى پايدالانىپ: «جاڭالىق بولسىن, الماتىدا دا, استانادا دا ارتىمىزدان قالماي كەلە جاتقان «رەزيدەنتسيا» ءسوزىن ەل كوپتەن بەرى ءسوز عىپ جۇرگەن «اقوردا» اتاۋىمەن الماستىرساق دەپ ەدىم. وسىنى ماحمۇتقا ايتقانىما ءۇش كۇن بولدى. باسىندا بۇل وعان كەلىسپەدى. سوندا وعان مەن: «قاي ەلدىڭ دە مەملەكەت باسشىسى قول قويعان جارلىق, وكىم, قاۋلىلاردىڭ استىندا «رەزيدەنتسيا» ءسوزى جوق. اقش-تا ماسەلەن «ۆاشينگتون. اق ءۇي», رەسەي فەدەراتسياسىندا «ماسكەۋ. كرەمل», فرانتسيادا «پاريج. ەليسەي سارايى» دەپ جازىلادى. ال ءبىز نەگە «استانا. اقوردا» دەمەسكە؟!», دەگەن ءۋاج ايتتىم. وسىدان سوڭ ول پرەزيدەنت اپپاراتىنىڭ باسشىسى جانە مەملەكەتتىك حاتشىمەن سويلەسە كەلە بۇگىن: «كورەيىك, دەگەنگە كەلدى. دەمەك ءۇمىت بار. وسى ۇستانىمنان تايمايىق. ەگەر ول جاقتان ءبىزدىڭ يدەيامىزعا ىستەيتىندەي ءبىر حابار, جاڭالىق بولىپ جاتسا ماعان ايتىپ وتىرىڭىزدار. بۇعان بايلانىستى بارلىق الەۋەتتىك رەسۋرستى ايانباي ىسكە قوسۋىمىز كەرەك», دەگەن ەستەلىكپەن ءسوزىن جالعاعان جانبولات اۋپباەۆ 24 جەلتوقسان, سالتاناتتى جينالىستىڭ اشىلۋىنا ورايلاستىرا قۇلشىنا دايارلانعان ماتەريال «ارقاداعى اقوردا – الاشتىڭ ايبىنى» دەگەن اتپەن جارىق كورگەنىن ايتادى.
وسى سالتاناتتى اشىلۋدا ءسوز سويلەگەن ەل اعالارى دا «بۇل – ەلىمىزدىڭ اقورداسى!» دەگەندى باسا ايتقانىن دا تىلگە تيەك ەتەدى.
«سودان نە كەرەك, ەستۋىمىزشە سول كۇنى كەشكە ساكەڭە (ساۋىتبەك ابدراحمانوۆ – رەد.) ماحمۇت حابارلاسىپ: «ەكى-ءۇش كۇندە پرەزيدەنت قول قويعان جارلىق نە وكىم ارقىلى قۋانىشتى جاڭالىق بولىپ قالۋى مۇمكىن», دەپتى. ال كەپ كۇتەيىك. ەلەگىزەمىز. الاڭدايمىز. جوق. مىنە 27 جەلتوقسان كۇنى ء«شارىپ وماروۆتى چەحوسلاۆاكياعا ەلشى ەتىپ تاعايىنداۋ جونىندە» ءبىر جارلىق كەلدى. بىراق وزگەرىس جوق. ءماتىننىڭ استىندا باياعى «استانا. پرەزيدەنت رەزيدەنتسياسى» دەگەن جاتتاندى سويلەم تۇر. ودان كەيىن تاعى ءبىر قۇجات. ول دا سولاي. ال 29 جەلتوقسان كۇنى... ءيا, سول كۇنى كەشكە!.. «ورالمانداردىڭ 2005-2007 جىلدارعا ارنالعان كوشىپ كەلۋ كۆوتاسى تۋرالى» جارلىقتىڭ كەلگەنى... قارايمىز, ونداعى ءماتىننىڭ اياق جاعىندا «استانا. اقوردا. № 1508» دەگەن جاڭا ءسوز تىركەسى تۇر! مۇنداي قۋانباسپىز», - دەيدى جانبولات اۋپباەۆ. ول سول ساتتەن مەملەكەتتىك ماڭىزعا يە قۇجاتتار «استانا. اقوردا» اتاۋىمەن شىعىپ, جاريالانىپ كەلە جاتقانىن تەرەڭ تەبىرەنىسپەن ءسوز ەتەدى.
قالي سارسەنباي «جۋرناليست – ءومىر بارلاۋشىسى. جۋرناليستيكا – ءومىر مەكتەبى». «استانا. اقوردا. № 1508» تاقىرىبىمەن جارىق كورگەن ەستەلىگىنەن ءۇزىندى. 90-94 ب.
