ماجىلىسمەندەر «جايلى مەكتەپ» ۇلتتىق جوباسى اياسىندا سالىنعان جاڭا ۇلگىدەگى مەكتەپتە بولدى. دەپۋتات سەرگەي پونومارەۆ بۇل مەكتەپ پارتيانىڭ سايلاۋالدى ۋادەلەرىن ءىس جۇزىندە ورىنداپ جاتقانىنىڭ ايقىن كورىنىسى ەكەنىن ايتتى. جوبا اياسىندا الماتىدا بىرنەشە جاڭا مەكتەپ اشىلدى, ول وقۋشىلاردىڭ ساپالى ءبىلىم الۋ مۇمكىندىگىن ارتتىرا تۇسپەك.
– مەملەكەت باسشىسى «انا ءتىلى» گازەتىنە بەرگەن سۇحباتىندا اتاپ وتكەندەي, ەلىمىز بويىنشا 460 مىڭ وقۋشىعا ارنالعان 217 جايلى مەكتەپ سالۋ جوسپارلانىپ وتىر. ونىڭ 105-ءى سالىندى. مەكتەپ – بولاشاق ۇرپاقتىڭ بەرىك نەگىزىن قالايتىن جەر. ءبىزدىڭ مىندەتىمىز – ءار بالانىڭ ساپالى ءبىلىم الۋىنا قولايلى جاعداي جاساۋ. سوندىقتان مۇعالىمدەردىڭ كاسىبي الەۋەتى عانا ەمەس, ۇستازدار مەن وقۋشىلارعا قولايلى جاعداي جاساۋ دا ماڭىزدى. بۇل مەكتەپتەر بالالارىمىزدىڭ ءبىلىم الۋى ءۇشىن بارلىق مۇمكىندىكتى بەرىپ وتىر, – دەدى ايدوس سارىم.
جالپى قالا بويىنشا بارلىعى 21 جاڭا ۇلگىدەگى مەكتەپ سالىنۋدا. قۇرىلىس جۇمىستارى ءماجىلىستىڭ جانە قالالىق ءماسليحات دەپۋتاتتارىنىڭ ەرەكشە باقىلاۋىندا.
سونىمەن قاتار ماجىلىسمەندەر «AMANAT» پارتياسىنىڭ باستاماسىمەن سالىنعان وتباسىلىق-دارىگەرلىك امبۋلاتوريانىڭ جۇمىسىمەن تانىستى. مەديتسينالىق مەكەمە ازاماتتارعا ساپالى مەديتسينالىق قىزمەت كورسەتۋگە, سونداي-اق ەمحانالار جۇكتەمەسىن ازايتۋعا باعىتتالعان.
– ەندى الاتاۋ ءوڭىرىنىڭ تۇرعىندارى ءوز ۇيلەرىنە جاقىن جەردەن مەديتسينالىق كومەك الاتىن بولادى. ءبىز ءار پاتسيەنتكە جەكە كوڭىل بولۋگە, اۋرۋلاردىڭ الدىن الۋعا جانە زاماناۋي قۇرال-جابدىقتارمەن ءتيىمدى ەمدەۋگە باسا نازار اۋدارىپ وتىرمىز. مۇنداي جوبالار قوعامىنىڭ ءال-اۋقاتىن ارتتىرۋدا ماڭىزدى ءرول اتقارادى. جالپى العاندا, دەنساۋلىق ساقتاۋ, دارىگەرلەردى جان-جاقتى قولداۋ ماسەلەلەرى پرەزيدەنت پەن پارتيامىزدىڭ ەرەكشە باقىلاۋىندا, - دەدى قالالىق ءماسليحات دەپۋتاتى جاندوس ءنادىروۆ.
سونداي-اق, دەپۋتاتتار جەرگىلىكتى تۇرعىنداردى تولعاندىرعان ماسەلەلەردى ورتاعا سالىپ, ماجىلىستە قابىلدانعان زاڭنامالىق قۇجاتتار تۋرالى مالىمەت بەردى.
دەپۋتاتتاردىڭ ساپارى الماتى قالاسىنداعى الەۋمەتتىك جوبالاردىڭ ورىندالۋ بارىسىن باقىلاۋعا, سونداي-اق تۇرعىنداردىڭ وزەكتى ماسەلەلەرىن زەردەلەپ, جۇيەلەۋگە باعىتتالعان ماڭىزدى قادام بولدى. «AMANAT» پارتياسى سايلاۋ الدىنداعى مىندەتتەمەلەرىن ورىنداۋدى جالعاستىرىپ, ەلىمىزدىڭ تۇراقتى دامۋىنا ۇلەس قوسۋدا.
