فوتو: ءماجىلىستىڭ ءباسپاسوز قىزمەتى
كەزدەسۋ بارىسىندا سپورت ماماندارىمەن سالانىڭ جەتىستىكتەرى مەن كەمشىلىكتەرى تالقىلاندى. وبلىستىق سپورت باسقارماسىنىڭ باسشىسى ەربولات سارابەكوۆتىڭ ايتۋىنشا, پرەزيدەنتتىڭ سپورت سالاسىن رەفورمالاۋ جونىندەگى تاپسىرماسىنا سايكەس بىرقاتار شارالار جۇزەگە اسىرىلىپ جاتىر. بۇقارالىق, ۇلتتىق جانە وليمپيادالىق سپورت تۇرلەرىن دامىتۋ بويىنشا ناقتى جۇمىستار قولعا الىنعان.
«جاستاردىڭ بوس ۋاقىتىن ءتيىمدى ۇيىمداستىرۋ جانە سالاۋاتتى ءومىر سالتىن ناسيحاتتاۋ ماقساتىندا شالعاي اۋىلداردا سپورت زالدارى اشىلىپ جاتىر. ماسەلەن, بىلتىر شەلەك, نارىنقول جانە قاراكاستەك اۋىلدارىندا ءتورت سپورت كەشەنى پايدالانۋعا بەرىلدى. الداعى ۋاقىتتا حالىق تىعىز قونىستانعان ەلدى مەكەندەردە وسىنداي نىساندار سالۋ جوسپارلانعان. تۇرعىندارمەن كەزدەسۋدە «سپورت كەشەندەرى قاجەت» دەگەن ماسەلە ءجيى كوتەرىلەدى. جالپى, الماتى وبلىسىنداعى سپورت سالاسىنىڭ دامۋىنا وڭ باعا بەرۋگە بولادى. وتكەن جىلى پاريج وليمپياداسىندا وڭىردەن بەس سپورتشى ليتسەنزيا الىپ, دەمەۋ جادىراەۆ گرەك-ريم كۇرەسىنەن كۇمىس مەدال جەڭىپ الدى. بۇل وتە جاقسى كورسەتكىش. دەگەنمەن, وسى جەتىستىكتەرمەن توقتاپ قالماي, بولاشاقتا 1,7 ميلليون حالقى بار الماتى وبلىسىنان وليمپيادا مەن الەم چەمپيوندارى شىعاتىنىنا سەنەمىز», دەدى دانيار قاسقاراۋوۆ.
سونىمەن قاتار دەپۋتات الماتى وبلىسى قاراساي اۋدانىنداعى مەكتەپ ماسەلەلەرىنە دە نازار اۋداردى. اۋداندا 2024 جىلى «جايلى مەكتەپ» باعدارلاماسى اياسىندا سەگىز ءبىلىم وشاعىنىڭ قۇرىلىسى جۇرگىزىلگەن. ەلتاي, قوشمامبەت, دولان, كەمەرتوعان, كوكوزەك اۋىلدارى مەن قاسكەلەڭ قالاسىنداعى مەكتەپتەردىڭ قۇرىلىسى اياقتالىپ, پايدالانۋعا بەرىلدى.
«پرەزيدەنت تاپسىرماسىمەن سالىنعان بۇل ءبىلىم بەرۋ مەكەمەلەرى زاماناۋي ۇلگىدە سالىنىپ, تولىق جابدىقتالعان. وقۋشىلاردىڭ ساپالى ءبىلىم الۋىنا بارلىق جاعداي جاسالعان. سونىمەن قاتار المالىباق پەن بۇلاقتى اۋىلدارىندا تاعى ەكى مەكتەپتىڭ قۇرىلىسى ءجۇرىپ جاتىر. ولار جاڭا وقۋ جىلىنا دەيىن پايدالانۋعا بەرىلەدى دەپ جوسپارلانىپ وتىر. وسىنداي اۋقىمدى جۇمىستاردىڭ ارقاسىندا اۋدانداعى ءۇش اۋىسىممەن وقىتۋ ماسەلەسى تولىعىمەن شەشىلىپ, 15 مىڭ وقۋشى جاڭا مەكتەپتەرمەن قامتىلادى», دەپ اتاپ ءوتتى دەپۋتات.
