ەسكى جىلدى قورىتار تۇستا اقتاۋ قالاسى ماڭىندا بولعان ۇشاق اپاتى ءدۇيىم ەلدى ءدۇر سىلكىندىردى. اۋە كەمەسى اپاتىنان 30-عا تارتا جولاۋشىنىڭ ءتىرى قالۋى – الدىمەن تاعدىردىڭ سىيى, سوسىن ۇشقىشتاردىڭ شەبەرلىگى مەن ەرلىگىنىڭ ناتيجەسى بولسا, جەرگە قۇلاعان ساتتەن باستاپ جانقيارلىقپەن جاردەم قولىن سوزعان ماڭعىستاۋلىقتاردىڭ ەڭبەگىنىڭ جەمىسى. جول بويىنداعى جولاۋشىدان باستاپ سول ماڭدا جۇمىس ىستەپ جۇرگەن مەكەمەلەر, مەديتسينا, توتەنشە جاعداي, جەدەل جاردەم, اۋەجاي قىزمەتكەرلەرى جۇدىرىقتاي جۇمىلدى. ءتىرى قالعان ادامداردىڭ بارلىعى امان-ساۋ ەلدەرىنە جىبەرىلدى. مەيىرىمدى, ۇيىمشىل قازاقتىڭ, كيەلى ماڭعىستاۋدىڭ داڭقى الەمگە جايىلدى.
مەملەكەت باسشىسى قاسىم-جومارت توقاەۆ اقتاۋداعى ۇشاق اپاتى كەزىندە زارداپ شەككەن ازاماتتاردى قۇتقارىپ, كومەك كورسەتكەن ازاماتتاردىڭ جانقيارلىق ارەكەتىن ايرىقشا اتادى. «قۇتقارۋشىلار, دارىگەرلەر مەن ءتارتىپ ساقشىلارى شۇعىل ءارى ۇيلەسىمدى ارەكەت ەتتى, كاسىبي دەڭگەيى مەن ازاماتتىق جاۋاپكەرشىلىگى جوعارى ەكەنىن كورسەتتى. جاقىن جەردەگى ماڭعىستاۋ وڭىرلىك ەلەكتر تورابى كومپانياسىنىڭ جۇمىسشىلارى بىردەن كومەككە كەلدى. توڭىرەكتەگى تۇرعىندار دا زارداپ شەككەندەردى قۇتقارۋعا اتسالىستى. ازاماتتارىمىزدىڭ جانقيارلىعى ارقاسىندا بارىنشا كوبىرەك ادامنىڭ ءومىرىن ساقتاپ قالدىق. مەن قۇتقارۋ جۇمىستارىنا قاتىسقان ءاربىر ادامعا شىن كوڭىلدەن ريزاشىلىعىمدى بىلدىرەمىن. قازاق حالقىنىڭ اپاتتان زارداپ شەككەندەرگە جاناشىرلىعى مەن تىلەۋلەستىگى ازاماتتارىمىزدىڭ جاپپاي قان تاپسىرۋعا اسىققانىنان دا ايقىن بايقالدى», دەدى پرەزيدەنت.
سالتاناتتى شارا بارىسىندا باۋىرجان مومىش ۇلى اتىنداعى II دارەجەلى «ايبىن» وردەنىمەن «قر ىشكى ىستەر مينيسترلىگى ماڭعىستاۋ وبلىسىنىڭ پوليتسيا دەپارتامەنتى» مم مامان-كريميناليسى ايبەك الىباەۆ ماراپاتتالدى. كريميناليست ا.الىباەۆ وقيعا بارىسىندا قازا تاپقان جانداردىڭ دەنەلەرىن تانىپ, تۋىستارىنا تاپسىرۋ جۇمىسىمەن اينالىستى.
– قازا تاپقان 38 ادامنىڭ تۋىستارى ءار ەلدەن كەلىپ, تانىتۋ جۇمىستارى جۇرگىزىلدى. تۇرلەرىنەن انىقتاۋ مۇمكىن بولمادى. سوندىقتان تۋىستارىنان سۇراي وتىرىپ, دەنەلەرىندەگى ەرەكشە بەلگىلەرمەن ىزدەي باستادىق. كوپشىلىگى مەڭىنە, تىرتىعىنا, تاتۋيروۆكاسىنا, التىن تىسىنە قاراپ تانىدى. تۋىستارىنا وتە اۋىر بولدى. تانۋ كەزىندە جۇرەگى شىداماعاندارعا ءبىزدىڭ مەديتسينا ماماندارىمىز كومەك كورسەتتى, – دەدى ايبەك تاحير ۇلى.
راحىمجان قوشقارباەۆ اتىنداعى III دارەجەلى «ايبىن» وردەنىمەن ماڭعىستاۋ وبلىسى توتەنشە جاعدايلار دەپارتامەنتى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى №12 ءورت ءسوندىرۋ ءبولىمىنىڭ ءورت ءسوندىرۋشىسى-قۇتقارۋشىسى ولجاس بايتورە, قورعانىس مينيسترلىگى 30153 اسكەري ءبولىمى الىس راديوماركەرلىك پۋنكتىنىڭ بولىمشە باستىعى بوتاعارين نۇرلان, ماڭعىستاۋ وبلىسىنىڭ توتەنشە جاعدايلار دەپارتامەنتى باسقۇدىق اۋىلى №2 ءورت ءسوندىرۋ ءبولىمىنىڭ بولىمشە كومانديرى سەرىبولات وڭعار, ماڭعىستاۋ وبلىسى توتەنشە جاعدايلار دەپارتامەنتى ءورت ءسوندىرۋ جانە اۆاريالىق-قۇتقارۋ جۇمىستارى قىزمەتى №1 مامانداندىرىلعان ءورت ءسوندىرۋ ءبولىمىنىڭ اعا ءورت ءسوندىرۋشى-قۇتقارۋشىسى مارلەن ساركەنوۆ ماراپاتتالدى. «قۇرمەت» وردەنى «اقتاۋ حالىقارالىق اۋەجايى» اق مەديتسينالىق پۋنكتىنىڭ مەڭگەرۋشىسى يرينا كوچەرگيناعا, «ماڭعىستاۋ وبلىستىق كوپبەيىندى اۋرۋحاناسى» مكك ورتالىعىنىڭ مەڭگەرۋشىسى باقىتجان قويبەكوۆكە تابىستالدى.
– قايعىلى وقيعا كەزىندە قول قۋسىرىپ قاراپ وتىرماي, كومەك كورسەتۋگە جۇمىلدىق. العان ماراپاتىم – ءتيىستى ورىندار ازاماتتارىمەن بىرگە امان قالعانداردى قۇتقارىپ, ولاردىڭ ءوز ەلدەرىنە ورالۋىنا ەڭبەگى سىڭگەندەردىڭ اراسىندا بولعانىما جاسالعان قۇرمەت, بەرىلگەن سىي. پرەزيدەنتكە, وبلىس باسشىلىعىنا, بارشا قۇتقارۋشىلارعا العىس ايتامىن, – دەدى ي.كوچەرگينا.
جالپى, 70-كە جۋىق ازامات ءتۇرلى ماراپاتتارعا يە بولدى. ولاردىڭ ىشىندە جاراقاتتانعاندارعا وتا جاساعان دارىگەر ب.قويبەكوۆتىڭ, پسيحولوگيالىق كومەك كورسەتكەن «اپاتتار مەديتسيناسى ورتالىعى» مم ماڭعىستاۋ وبلىسى بويىنشا فيليالىنىڭ پسيحولوگى ج.ەسەننىڭ ەڭبەكتەرى ەرەن.
سونداي-اق وڭىردە وقيعا كەزىندە ءار سالادا ەڭبەك ەتكەن ماماندارعا, بىرقاتار بۇقارالىق اقپارات قۇرالدارى وكىلىنە ماڭعىستاۋ وبلىسى اكىمىنىڭ ماراپاتتارى تابىستالدى.
ماڭعىستاۋ وبلىسى
