فوتو: gov.kz
تەحنيكالىق جانە كاسىپتىك ءبىلىم بەرۋ جۇيەسىن رەفورمالاۋدى جۇزەگە اسىرۋ ماقساتىندا ۇكىمەتپەن جۇمىسشى ماماندىقتار جىلىن ۇيىمداستىرۋ جونىندەگى رەسپۋبليكالىق جوسپار بەكىتىلدى, سونداي-اق مينيسترلىكپەن كاسىپتىك-تەحنيكالىق ءبىلىم بەرۋدى ترانسفورماتسيالاۋدىڭ 2025-2027 جىلدارعا ارنالعان جول كارتاسى قابىلداندى.
وقۋ-اعارتۋ مينيسترلىگىنىڭ ءمالىم ەتۋىنشە, بۇگىندە قازاقستاندا كاسىپتىك-تەحنيكالىق ءبىلىم بەرۋ جۇيەسىندە 772 كوللەدج جۇمىس ىستەيدى, وندا 565 مىڭ ستۋدەنت وقيدى. 2024 جىلدىڭ قورىتىندىسى بويىنشا تەحنيكالىق جانە كاسىپتىك ءبىلىم بەرۋدەگى مەملەكەتتىك تاپسىرىس كولەمى 143 مىڭ ورىندى قۇرادى, ال ستۋدەنتتەردىڭ ستيپەندياسى ەكى ەسەگە وسكەن.
ءىس-شارالار جوسپارىندا وڭىرلىك ەرەكشەلىكتەر ەسكەرىلە وتىرىپ جاسالعان جاڭا كاسىپتەر مەن قۇزىرەتتەر اتلاسى, تەحنيكالىق جانە كاسىپتىك ءبىلىم بەرۋدى ترانسفورماتسيالاۋ, حالىقارالىق دەڭگەيدەگى سەرتيفيكاتتالعان مامانداردى دايىنداۋ, جۇمىسشى ورىندارىن قۇرۋ, جۇمىسشى مامانداردىڭ قۇقىقتارىن قورعاۋ جانە مارتەبەسىن كوتەرۋ قامتىلعان. كاسىپورىندارمەن بىرلەسىپ ەل مەكتەپتەرىندە 1000 بەيىندى سىنىپ اشىلادى.
«كاسىپتىك باعدار بەرۋدىڭ رەفورماسى وقۋشىلارعا ەڭبەك نارىعىنداعى جاڭا تالاپتار تۋرالى بىلۋگە, ەكونوميكانىڭ ناقتى سەكتورلارىنداعى مانساپ پەرسپەكتيۆالارىن باعالاۋعا جانە ماماندىقتاردى دۇرىس تاڭداۋعا مۇمكىندىك بەرەدى. بۇل ءۇشىن مەكتەپتەردەگى كاسىبي باعدارلاۋ قىزمەتى كۇشەيتىلەدى, وسى ارقىلى وقۋشىلار تولىعىمەن كاسىبي دياگنوستيكامەن قامتىلادى. جوعارى سىنىپ وقۋشىلارىن پراكتيكالىق داعدىلارعا جانە كوللەدجدەر بازاسىندا العاشقى جۇمىس كاسىبىنە وقىتۋ تاجىريبەسى ەنگىزىلەدى», دەپ اتاپ ءوتتى وقۋ-اعارتۋ ءمينيسترى عاني بەيسەمباەۆ.
مەملەكەت كوللەدجدەردى جان باسىنا شاققانداعى قارجىلاندىرۋدىڭ جاڭا ءنورماتيۆىن قابىلدادى. قازىرگى ۋاقىتتا ءبىر ستۋدەنتتى وقىتۋعا بولىنەتىن قاراجاتتىڭ ورتاشا مولشەرى 437 مىڭ تەڭگەنى قۇراسا, كەلەسى وقۋ جىلىنان باستاپ ناقتى كورسەتكىشتەرگە جەتكەن كوللەدجدەر ءۇشىن ول ورتاشا ەسەپپەن 912 مىڭ تەڭگەنى قۇرايتىن بولادى.
«باسەكەگە قابىلەتتى ماماندار دايارلاۋ, ءبىلىم ۇيىمدارىن زاماناۋي ماتەريالدىق-تەحنيكالىق قۇرالدارمەن جابدىقتاۋ جانە پەداگوگتەردىڭ بىلىكتىلىگىن ارتتىرۋ - باستى باسىمدىق», دەدى مينيستر.
دۋالدى وقىتۋ جۇيەسىن دامىتۋ جانە كاسىپورىنداردىڭ ماقساتتى تاپسىرىسى نەگىزىندە ماماندار دايارلاۋ ءۇشىن بيزنەس-قۇرىلىمدار مەن ينۆەستورلاردى بەلسەندى تۇردە تارتۋ جوسپارلانىپ وتىر.
قازىرگى ۋاقىتتا كوللەدجدەرگە 518 كاسىپورىن شەفتىك قامقورلىق كورسەتەدى, ولاردىڭ سانىن 4 مىڭعا دەيىن جەتكىزۋ جوسپارلانعان, كاسىپتىك ستاندارتتاردىڭ, مجمبس جانە WorldSkills ستاندارتتارىنىڭ تالاپتارىن ەسكەرە وتىرىپ, 8 مىڭعا جۋىق ءبىلىم بەرۋ باعدارلاماسى ازىرلەندى. بيىل كوللەدجدەر مەن جۇمىس بەرۋشىلەر 2 مىڭنان استام ءبىلىم بەرۋ باعدارلاماسىن دايىندايدى, سونداي-اق وندىرىستىك بازادا 1,5 مىڭ پەداگوگتىڭ تاعىلىمدامادان ءوتۋى جوسپارعا الىنعان.
تەحنيكالىق جانە كاسىپتىك ءبىلىم بەرۋدى ترانسفورماتسيالاۋ بارىسىندا قازاقستاننىڭ 10 كوللەدجى ينتەرناتسيونالداندىرىلادى.
شەتەلدىك كوللەدجدەرمەن تاجىريبە الماسۋ پەداگوگتەردىڭ كاسىبي قۇزىرەتتىلىكتەرىن ارتتىرۋعا, سونداي-اق ستۋدەنتتەردىڭ اكادەميالىق ۇتقىرلىق شەڭبەرىندە ءوز بىلىمدەرىن جەتىلدىرۋىنە مۇمكىندىك بەرەدى.
مەملەكەت باسشىسى باستاماشىلىق ەتكەن جۇمىسشى ماماندىقتارىنىڭ جىلى اياسىندا استانادا تەحنيكالىق جانە كاسىپتىك ءبىلىم بەرۋ ستۋدەنتتەرىن قولداۋ جانە دامىتۋ ءۇشىن ۇلتتىق قۇزىرەتتىلىك ورتالىعى قۇرىلادى.
«ورتالىق ستۋدەنتتەردىڭ كاسىبي قۇزىرەتتىلىكتەرى مەن داعدىلارىن دامىتۋعا ىقپال ەتەدى, سونداي-اق مامانداردى قايتا دايارلاۋ, ولاردىڭ بىلىكتىلىگىن ارتتىرۋ جانە WorldSkills چەمپيوناتتارىن وتكىزۋ بازاسىنا اينالادى», دەپ اتاپ ءوتتى عاني بەيسەمباەۆ.
جۇمىسشى ماماندىقتار جىلىنداعى ماڭىزدى ءىس-شارالاردىڭ ءبىرى – اقتاۋ قالاسىندا تۇركىتىلدەس ەلدەر اراسىندا Turkiskills-2025 العاشقى كاسىبي شەبەرلىك چەمپيوناتىنىڭ ۇيىمداستىرىلۋى.
