فوتو: اشىق دەرەككوز
ءمينيستردىڭ ايتۋىنشا, قازىرگى كۇنى جان باسىنا شاققانداعى نورماتيۆتىك قارجىلاندىرۋدىڭ قولدانىستاعى ادىستەمەسىنە سايكەس 1 ستۋدەنتتى وقىتۋعا بولىنەتىن قاراجاتتىڭ ورتاشا مولشەرى 437 مىڭ تەڭگەنى قۇراسا, ەندى ول ورتا ەسەپپەن 912 مىڭ تەڭگەنى قۇرايتىن بولادى.
«جاڭا قارجىلاندىرۋ ءنورماتيۆى نەگىزگى جانە ىنتالاندىرۋ بولىكتەرىنەن تۇرادى, بۇل رەتتە ىنتالاندىرۋشى تولەمدەر ناقتى كورسەتكىشتەرگە قول جەتكىزگەن كوللەدجدەرگە بەرىلەدى. قارجىلاندىرۋدىڭ جاڭا جۇيەسى باسەكەگە قابىلەتتى ماماندار دايارلاۋعا, ءبىلىم بەرۋ ۇيىمدارىن زاماناۋي ماتەريال-تەحنيكالىق قۇرالدارمەن جابدىقتاۋعا جانە پەداگوگتەردىڭ بىلىكتىلىگىن ارتتىرۋ كۋرستارىن ۇيىمداستىرۋعا مۇمكىندىك بەرەدى», دەدى عاني بەيسەمباەۆ.
سونىمەن قاتار بيىل تەحنيكالىق جانە كاسىپتىك ءبىلىم بەرۋ جۇيەسىن دامىتۋ ءۇشىن بيزنەس-قۇرىلىمدار مەن ينۆەستورلاردى تارتۋ جوسپارلانعان.
مينيستر بۇل دۋالدى وقىتۋ جۇيەسىن دامىتۋعا جانە كاسىپورىنداردىڭ تاپسىرىسى نەگىزىندە ەكونوميكاعا قاجەتتى مامانداردى ماقساتتى تۇردە دايارلاۋعا مۇمكىندىك بەرەتىنىن اتاپ ءوتتى.
ايتا كەتەيىك, بۇگىندە نەبارى 518 كاسىپورىن كوللەدجدەرگە شەفتىك قامقورلىق كورسەتىپ وتىر. الداعى ۋاقىتتا كوللەدجدەرمەن ىنتىماقتاستىق ورناتىپ, ولاردىڭ قىزمەتىنە قولداۋ كورسەتەتىن كاسىپورىندار سانىن 4000-عا جەتكىزۋ جوسپارلانىپ وتىر.
«بيىل كوللەدجدەر جۇمىس بەرۋشىلەرمەن بىرگە 2 مىڭنان استام ءبىلىم بەرۋ باعدارلاماسىن ازىرلەيدى, 1,5 مىڭ پەداگوگ ءوندىرىس بازاسىندا تاعىلىمدامادان وتەدى. ناتيجەسىندە بيزنەسپەن ىنتىماقتاستىق جاڭا دەڭگەيگە كوتەرىلىپ, كوللەدجدەر ناقتى ەكونوميكا سالالارى ءۇشىن جۇمىسشى مامان دايارلاۋدىڭ نەگىزگى بۋىنىنا اينالادى», دەدى عاني بەيسەمباەۆ.
