كوللاجدى جاساعان – قونىسباي شەجىمباي, «EQ»
سونداي-اق بيىل پيتچينگتەن وتكەن 17 جوبانىڭ ءتۇسىرىلىم جۇمىسى باستالادى. ولاردىڭ قاتارىندا الەۋمەتتىك ماڭىزى جوعارى, كەڭ اۋقىمدى كورەرمەن اۋديتورياسىنا ارنالعان فيلمدەر, وقيعالى, بىرلەسىپ شىعارىلاتىن, انيماتسيالىق, دەرەكتى جانە دەبيۋتتىك فيلمدەر دە بار.
ماسەلەن, «كەنجەم قايدا؟» كوركەم تۋىندىسىندا كەنجە بالانىڭ تاعدىرى باياندالىپ, وتباسى قۇندىلىعى سۋرەتتەلەدى. اتالعان فيلم بالالارىن جالعىز ءوزى اسىراپ وتىرعان گۇلنازدىڭ تاعدىرىن قوزعايدى. كينوكارتينانىڭ پروديۋسەرى – انار ءجۇنىسوۆا, اننا چاكيرتوۆا. رەجيسسەرى – دياس قۇلماقوۆ.
ءتۇسىرىلىم جۇمىسى وسى جىلعا جوسپارلانعان تاعى ءبىر تۋىندى – «اقجەلەڭ». ماحابباتقا ادالدىق, قازاق ايەلىنىڭ قايراتكەرلىگى, باۋىرمالدىق, اناعا دەگەن سۇيىسپەنشىلىك سۋرەتتەلەتىن فيلم نازىك ءبىر يىرىمگە تولى بولماق. پروديۋسەرى – باعاشار ارىقباەۆ, رەجيسسەرى – بەكزات سمادياروۆ.
قازاق كينوسى تاريحىنداعى ورمانشىلار تۋرالى تۇڭعىش جەكە كينوكارتينا دا بيىل تۇسىرىلەدى. رەجيسسەر راشيد سۇلەيمەنوۆتىڭ «38» ءفيلمى قاراپايىم ەڭبەك ادامىنىڭ ەرلىگىن اشىپ كورسەتۋدى ماقسات ەتىپ وتىر. سونداي-اق دەتەكتيۆ جانرىنداعى «بۇركىتشى» فيلمىندە اۋىلداعى جۇمباق جاعدايدىڭ سىرى اشىلادى. شىتىرمان وقيعاعا نەگىزدەلگەن كينوكارتينانىڭ پروديۋسەرى – ءمادينا دۇيسەمباەۆا, رەجيسسەرى – قۋانىش ستاحانوۆ.
ميۋزيكل جانرىنداعى «ار مەن سەزىم» كارتيناسى دا بيىل تۇسىرىلمەك. تۋىندى كورەرمەندى ار-نامىس قاسيەتىن جوعارى قويۋعا, ادالدىققا, ادامگەرشىلىككە ۇندەيدى. جاستاردىڭ بويىنا ۇلتتىق قۇندىلىقتاردى ءسىڭىرۋدى ماقسات ەتىپ, ۇلتتىق مادەنيەتىمىز بەن ونەرىمىزدى ناسيحاتتايدى. قازاقتىڭ اتبەگىلىك ونەرىن جاڭعىرتۋ, ۇلتتىق مۋزىكاسىن جاڭا قىرىنان كورسەتۋگە نەگىزدەلگەن فيلم بولماق. پروديۋسەرى – باقىتجان قۇلجاباەۆ, رەجيسسەرى – باتىرحان داۋرەنبەكوۆ.
وسى جىلعا جوسپارلانعان دەبيۋتتىك فيلمدەر دە كينووندىرىس سالاسىنا ءوز داۋسىمەن, ءوز قولتاڭباسىمەن كەلمەك. ءامىر امەنوۆتىڭ «ساعىندىم سەنى», ايانا نۇردينوۆانىڭ «مۇعالىم» كوركەم كارتينالارى ادامگەرشىلىك, ىزگىلىك, ۇستازعا قۇرمەت سىندى ادامزاتتىق مۇراتتاردى تاقىرىپ ەتەدى.
سونداي-اق شۆەيتساريالىق ساياحاتشى, جازۋشى ەللا ماياردىڭ تۇركىستان دالاسىنا ساپارى سۋرەتتەلەتىن قانات تورەبايدىڭ «تۋركەستان-سولو» دەرەكتى ءفيلمىنىڭ ءتۇسىرىلىم جۇمىسى دا ءوز كەزەگىن كۇتىپ تۇر.
بالالار اۋديتورياسىنا ارنالعان كونتەنتكە دە ەرەكشە ءمان بەرىلىپ وتىر. جانات جايلىبايدىڭ «ادامزاتقا ىزدەۋ سالامىن» انيماتسيالىق ءفيلمى جاساندى ينتەللەكتىنىڭ مۇمكىندىكتەرىن كورسەتپەك. تۋىندى كىشكەنتاي كورەرمەنگە ادامدار اراسىنداعى جىلى قارىم-قاتىناستى, تابيعاتقا ىڭكارلىكتى كورسەتكىسى كەلەدى. ال ءامىرجان قازيەۆتىڭ «جىبەك» انيماتسيالىق فيلمىندە شىعىس پەن باتىس اراسىنداعى مادەني بايلانىس باياندالادى.
سونداي-اق دەبيۋتتىك فيلمدەر قاتارىندا تاتيانا شيشكينانىڭ «باتىل بول» انيماتسياسى دا تۇسىرىلمەك. بۇل فيلمدە ءتىل ماسەلەسى قاۋزالىپ, ەلىمىزدەگى بەرەكە-بىرلىك سىندى ۇلتتىق ۇعىمدار كوتەرىلەدى.
ءيا, بۇل ءتۇسىرىلىم جۇمىسى بيىل وتەتىن تۋىندىلاردىڭ ءبىر بولىگى عانا. ەكرانعا شىعاتىن باسقا دا جاڭا فيلمدەر قوعامدى تولعاندىرعان تاقىرىپتاردى قامتيدى.
