Almaty.tv دەرەگىنشە, ءتورت كۇن بۇرىن 51 جاستاعى ارىستاي ازاماتىن جەرلەگەن بەكپاەۆتار اۋلەتى بۇگىن 47 جاستاعى كەلىندى جوقتاپ وتىر. ال اتا-اناسىنان ايرىلعان بالالارمەن قوسا, وسى ۇيگە قوناققا كەلگەن قىز بالا دا قازىر اۋرۋحانادا. بالالاردىڭ بىرەۋى بولسا, ءالى دە جانساقتاۋ بولىمىندە جاتىر. دارىگەرلەردىڭ ايتۋىنشا, 16 جاستاعى ءجاسوسپىرىمنىڭ دەنەسىنىڭ 38-40 پايىزىن كۇيىك شالعان.
- بالالار اۋىر دارەجەدەگى كۇيىك جاراقاتىن العان. بىرەۋىنىڭ دەنەسىن 25, ەكىنشىسىنىكىن 15 پايىز كۇيىك شالعان. ولار جانساقتاۋ بولىمىندە ەم قابىلدادى. بۇگىنگى تاڭدا ولاردىڭ جاعدايى تۇراقتالىپ, ەكەۋى دە بولىمشەگە اۋىستىرىلدى. قاجەتتى ءدارى-دارمەكتەر مەن مەديتسينالىق قۇرالدار جەتكىلىكتى. جاعدايى تولىق جاقسارعاننان كەيىن وتا جاسايمىز, – دەدى وبلىستىق بالالار اۋرۋحاناسىنىڭ دارىگەرى باتىرجان بورامباەۆ
قايعىلى جاعداي 31 جەلتوقساندا تاڭەرتەڭ بولعان. جارىلىستىڭ كۇشتى بولعانى سونشالىق, ءۇيدىڭ ەكىنشى قاباتىن كۇل-تالقان ەتىپ, شاتىرى مەن قابىرعالارىن لاقتىرىپ جىبەرگەن. مارقۇمداردىڭ تۋىستارىنىڭ ايتۋىنشا, ولار گاز شىعىپ تۇرعانىن ايتىپ بىرنەشە رەت اپاتتىق قىزمەتتى دە شاقىرعان.
- ماماندار قايتا-قايتا تەكسەرىپ, ء«بارى جاقسى» دەپ كەتكەن ەكەن. بۇرىنعى قوسىلعان گاز كوشەدەن ۇيگە كىرگەن. تاڭعى ساعات 7:00-دە ويانعاندا, ەلەكتر جارىعىن جاققان. قىسىمنان ءۇي جارىلىپ وتىر, – دەدى مارقۇمنىڭ تۋىسى قايرات بايسالاقوۆ.
- ارىستاي ۇلىمنان ايرىلدىم, ول از بولعانداي جاساندى اپپاراتىڭ كومەگىمەن دەم الىپ جاتقان كەلىنىم دە كوز جۇمدى. ءتورت بالاعا نە دەيمىز؟ اۋىر قازاعا تاپ بولدىق. گازدىڭ ءيىسى شىعىپ جاتقاندا بالام شاقىرعان, تەكسەرىپ, ۇندەمەي كەتىپ قالدى. سالعىرتتىقتان وسىنداي وقيعا بولدى, – دەدى مارقۇمنىڭ اناسى كۇلاش بەكپاەۆا.
توتەنشە جاعدايلار باسقارماسىنىڭ الدىن الا بولجامى بويىنشا, ءورت تابيعي گازدان بولعان. بىراق جاۋاپتى كومپانيا جەلىلەردە ەش اقاۋ جوق دەپ مالىمدەمە جاسادى.
- قاۋىپسىزدىك تەحنيكاسى جونىندەگى نۇسقاۋلىقتارعا سايكەس, گاز جەلىلەرىن پايدالانۋ جانە جوندەۋ قىزمەتىنىڭ ماماندارى تومەن قىسىمدى جەراستى گاز قۇبىرلارىنىڭ گەرمەتيكالىعىن تەكسەردى. رەسمي تەكسەرۋلەر ناتيجەلەرى بويىنشا, ءبىز قىزمەت كورسەتەتىن گاز جەلىلەرىندە گاز اعۋى جوق جانە ولار قالىپتى جاعدايدا جۇمىس ىستەپ تۇر, – دەلىنگەن «QazaqGaz Aimaq» اق حابارلاماسىندا.
جەتىسۋ وبلىسى اكىمىنىڭ ءباسپاسوز قىزمەتى اپاتتىڭ سەبەبىن انىقتاۋ ءۇشىن ارنايى جۇمىس توبىنىڭ قۇرىلعانىن جەتكىزدى. سونداي-اق جارىلىستان زارداپ شەككەندەرگە 200 ايلىق ەسەپتىك كورسەتكىش كولەمىندە ءبىر رەتتىك كومەك بەرىلەتىنى دە ءمالىم بولدى. اسىراۋشىسىنان ايىرىلعان وتباسىنداعى كامەلەتكە تولماعان بالالاردىڭ ارقايسىسىنا دا اي سايىنعى الەۋمەتتىك جاردەماقى تاعايىندالادى.
ايتا كەتەيىك, وقيعانىڭ ءمان-جايى انىقتالىپ جاتىر. پوليتسيا بۇل دەرەككە قاتىستى قىلمىستىق ءىس قوزعادى.
