فوتو: Polisia.kz
ينتەرنەت-الاياقتار رەسپۋبليكا اۋماعىندا ءتۇرلى مەسسەندجەرلەر ارقىلى ەل ازاماتتارىنا قوڭىراۋ شالۋ ءۇشىن sim-box قۇرىلعىلارىن پايدالانعان.
قر ءىىم اتاپ وتكەندەي, ادامداردى الداۋ ءۇشىن قىلمىسكەرلەردىڭ بەلگىلى ءبىر ەلدە بولۋى مىندەتتى ەمەس. Sim-box قۇرىلعىلارىنىڭ بولۋى جەتكىلىكتى. ولار جەرگىلىكتى ۇيالى بايلانىس وپەراتورلارىنىڭ ينتەرنەت-ترافيگىن قولدانا وتىرىپ, جالعان نومىرلەرمەن بايلانىس ورناتۋعا مۇمكىندىك بەرەدى.
«جاڭا جىل قارساڭىندا ءىىم كيبەرقىلمىسقا قارسى ءىس-قيمىل دەپارتامەنتىنىڭ ۇيلەستىرۋىمەن الماتى پد پوليتسيا قىزمەتكەرلەرى جالدامالى پاتەردە sim-box قۇرىلعىسىنىڭ ۇزدىكسىز جۇمىسىن قامتاماسىز ەتكەن 25 جاستاعى ەكى جىگىتتى ۇستادى. جەدەل ۋاكىلدەر پاتەردى ءتىنتۋ كەزىندە ارقايسىسى 32 سلوتتىق ءتورت sim-box قۇرىلعىسىن جانە قازاقستاندىق ۇيالى بايلانىس وپەراتورلارىنىڭ 190 sim-كارتاسىن, بىرنەشە تەلەفون مەن نوۋتبۋكتاردى تاركىلەدى», دەلىنگەن حابارلامادا.
تەرگەۋ امالدارى جۇرگىزىلىپ جاتىر. ۇستالعاندارعا قاتىستى «قاماۋدا ۇستاۋ» بۇلتارتپاۋ شاراسى تاڭدالدى.
