مەملەكەت باسشىسى ينۆەستيتسيا جانە بيزنەس سالاسىنداعى احۋالدى جاقسارتۋعا, كاسىپكەرلىك باستامالاردى قولداۋعا ايرىقشا نازار اۋدارىپ كەلەدى.
«كۇزدەگى جولداۋىمدا ۇكىمەتكە وسىعان قاتىستى ناقتى تاپسىرمالار بەردىم. بىلتىر ساۋىردە كاسىپكەرلەرگە قولايلى جاعداي جاساۋ ءۇشىن بيزنەستى جۇرگىزۋ ماسەلەسىنە قاتىستى زاڭ قابىلدادىق. قازىر مەملەكەتتىك باقىلاۋ جۇيەسىن رەتكە كەلتىرىپ جاتىرمىز. بۇرىنعىداي زاڭسىزدىقتاردى تەكسەرۋگە ەمەس, ونىڭ الدىن الۋعا كوبىرەك باسىمدىق بەرىلىپ وتىر. «باسىنان باستاپ رەتتەۋ» ءتاسىلى ەنگىزىلىپ جاتىر. كەيبىر ەكونوميكالىق قىلمىستار قىلمىس ساناتىنان شىعارىلدى, ەكونوميكالىق قۇقىق بۇزۋشىلىقتىڭ 29 ءتۇرى بويىنشا قاماۋعا الۋ جازاسىن قولدانۋعا تىيىم سالىندى. مۇنىڭ ءبارى كاسىپكەرلەردىڭ مۇددەسى ءۇشىن جاسالدى», دەدى پرەزيدەنت.
مەملەكەت سۋبسيديا, جەڭىلدەتىلگەن نەسيە جانە كەپىلدەندىرىلگەن قارىز بەرۋ ارقىلى شاعىن جانە ورتا بيزنەسكە قولداۋ كورسەتىپ وتىر. شاعىن جانە ورتا بيزنەستىڭ ەل ەكونوميكاسىنداعى ۇلەسى ۇزدىكسىز ارتىپ كەلەدى. بۇگىندە وسى بيزنەستىڭ وكىلدەرى 4,3 ميلليون ادامعا, ياعني ەڭبەك ەتىپ جۇرگەن ازاماتتاردىڭ تەڭ جارتىسىنا جۋىعىنا جۇمىس تاۋىپ بەرىپ وتىر. سوندىقتان كاسىپكەرلىك باستامالار ەل ەكونوميكاسىنىڭ نەگىزگى قوزعاۋشى كۇشىنە اينالىپ كەلەدى دەپ سەنىممەن ايتۋعا بولادى.
«قازاقستاندا ءوز جۇمىسىنا جاڭا تەحنولوگيالاردى ەنگىزىپ جۇرگەن وزىق ويلى كاسىپكەرلەردىڭ جاڭا بۋىنى پايدا بولدى. مۇنداي كاسىپكەرلەر الەمدىك باسەكەگە تۇسۋگە دە قابىلەتتى. قازىر شەتەلدىك بيزنەستىڭ قازاقستاندا ءوز وكىلدىگىن اشىپ جاتقانى دا كوڭىل قۋانتادى. بۇل جاعداي وتاندىق نارىققا حالىقارالىق سيپات بەرۋگە, ءادىل باسەكەنى كۇشەيتۋگە جانە ەكونوميكانى ارتاراپتاندىرۋعا ىقپال ەتەدى. وسى ورايدا, ۇكىمەت جانىنان قۇرىلعان ينۆەستيتسيالىق شتاب ء«بىر تەرەزە» قاعيداتىنا ساي ارەكەت ەتىپ, شەشىمدەر قابىلداپ, وزىنە جۇكتەلگەن مىندەتتى تولىق اتقارىپ جاتقانىن اتاپ وتكەن ءجون», دەدى قاسىم-جومارت توقاەۆ.
پرەزيدەنتتىڭ ايتۋىنشا, مەملەكەتتىڭ ينۆەستيتسيالىق احۋالدى جاقسارتۋ جولىنداعى جۇمىسى جەمىسىن بەرىپ جاتىر. جاقىندا بىرىككەن ۇلتتار ۇيىمىنىڭ ازيا مەن تىنىق مۇحيت ەلدەرىنە ارنالعان ەكونوميكالىق جانە الەۋمەتتىك كوميسسياسى ينۆەستيتسيا جونىندەگى بايانداماسىن جاريالادى. وندا قازاقستاننىڭ 2024 جىلى جاڭا جوبالارعا 15,7 ميلليارد دوللار كولەمىندە تىكەلەي شەتەل ينۆەستيتسياسىن تارتقانى كورسەتىلگەن. بۇل ونىڭ الدىنداعى جىلمەن سالىستىرعاندا 88 پايىزعا ارتىق.
ء«بىز سولتۇستىك جانە ورتالىق ازياداعى ەڭ جوعارى كورسەتكىشكە قول جەتكىزىپ وتىرمىز. ايماقتاعى شەتەل ينۆەستيتسيالارىنىڭ ۇشتەن ەكىسىنە جۋىعى, ياعني 63 پايىزى قازاقستاننىڭ ەنشىسىندە.
مەن بيزنەس وكىلدەرىمەن, ينۆەستورلارمەن الداعى ۋاقىتتا دا كەزدەسەتىن بولامىن. ولاردىڭ جاسامپاز باستامالارىن قولدايمىن. ۇكىمەت پەن بارلىق مەملەكەتتىك ورگانداردان دا وسىنى, ياعني بيزنەسكە قۇلاق اسىپ, ونىمەن ۇيلەسىمدى جۇمىس جۇرگىزۋدى, بولاشاعى زور جوبالارعا قارجى سالاتىن كاسىپكەرلەر مەن ينۆەستورلارعا قولداۋ كورسەتۋدى تالاپ ەتەمىن. بيزنەسكە مۇلدە قىسىم كورسەتىلمەۋى كەرەك. شەنەۋنىكتەر مەن كۇشتىك قۇرىلىمداردىڭ قىزمەتكەرلەرىن مۇنداي ارەكەتتەرى ءۇشىن جازالاپ جاتىرمىز, الداعى ۋاقىتتا دا جاۋاپكەرشىلىككە تارتاتىن بولامىز. ال كاسىپكەرلەر الاياقتىق جاساماي, زاڭ اياسىندا جۇمىس ىستەۋگە ءتيىس», دەدى مەملەكەت باسشىسى.
