فوتو: اشىق دەرەككوز
«قازاقستان تۇركى مەملەكەتتەرى ۇيىمىنىڭ باستاۋىندا بولدى. وسى ۇيىمعا مۇشە ەلدەر – ءبىزدىڭ كورشىلەرىمىز ءارى ماڭىزدى گەوساياسي سەرىكتەستەرىمىز.
ءبىز توراعالىق ەتكەن كەزدە ساياسي جانە ساۋدا-ەكونوميكالىق, كولىك-لوگيستيكالىق, مادەني-گۋمانيتارلىق سالالارداعى ىنتىماقتاستىقتى كەڭەيتۋگە باسا ءمان بەردىك. بىرقاتار اۋقىمدى جوبانى جۇزەگە اسىردىق, 80-نەن استام ءىس-شارا ۇيىمداستىرىپ, ناقتى ناتيجەگە قول جەتكىزدىك. استانادا V دۇنيەجۇزىلىك كوشپەلىلەر ويىندارى ءوتتى. وقۋ ورىندارى مەن اكادەميالىق قۇرىلىمداردىڭ, شىعارماشىلىق زيالى قاۋىم وكىلدەرىنىڭ اراسىندا تىعىز بايلانىس ورنادى. 2021 جىلى تۇركى الەمىنىڭ رۋحاني استاناسى بولىپ جاريالانعان كونە تۇركىستان قالاسى حالىقتارىمىزدىڭ دوستىعىن نىعايتۋ ىسىندە ايرىقشا ءرول اتقارادى», دەدى قاسىم-جومارت توقاەۆ.
سونىمەن قاتار مەملەكەت باسشىسى سوڭعى 10 جىلداعى تۇركى مەملەكەتتەرى ۇيىمىنا مۇشە ەلدەردىڭ اراسىنداعى الىس-بەرىس ايتارلىقتاي ارتقانىن باياندادى.
«2024 جىلى ءوزارا ساۋدا-ساتتىق كولەمى 45 ميلليارد دوللاردان استى. ەلدەرىمىز ترانسكاسپي حالىقارالىق كولىك دالىزىندە ماڭىزدى ءرول اتقارادى. ءبىز ەنەرگەتيكا, ونەركاسىپ, اۋىل شارۋاشىلىعى, تسيفرلاندىرۋ سالالارىنداعى ىقپالداستىقتى كۇشەيتۋدى كوزدەپ وتىرمىز», دەدى ول.
بۇعان قوسا قاسىم-جومارت توقاەۆ تۇركى مەملەكەتتەرى ۇيىمىنا ۇسىنعان «TURKTIME!» ۇرانى تۋرالى ايتىپ, ونىڭ ءمان-ماڭىزىنا توقتالدى. ايتا كەتەيىك, بۇل اببرەۆياتۋرا ءوزارا قارىم-قاتىناستىڭ ءداستۇر (Traditions), ۋنيفيكاتسيا (Unification), رەفورمالار (Reforms), ءبىلىم (Knowledge), سەنىم (Trust), ينۆەستيتسيا (Investments), مەدياتسيا (Mediation) جانە ەنەرگيا (Energy) سياقتى سەگىز باسىمدىعىن بىلدىرەتىن سوزدەردەن قۇرالعان.
«وسى باسىمدىقتاردى تۇركى مەملەكەتتەرى ۇيىمى عانا ەمەس, بۇكىل تۇركى الەمى قىزىعۋشىلىقپەن قابىل الدى. قازاقستان تۇركى دۇنيەسىن بىرىكتىرۋدى كوزدەيتىن بارلىق جاسامپاز باستامانى قولدايدى, رەسەيدىڭ «التاي – تۇركىلەردىڭ التىن بەسىگى» اتتى تۇجىرىمداماسىنا دا جاقسى قارايدى. ەلىمىز تۇركى حالىقتارى اراسىنداعى بايلانىستى نىعايتۋ, سونداي-اق ورتاق تاريحي-مادەني باي مۇرامىزدى ناسيحاتتاۋ ىسىنە الداعى ۋاقىتتا دا اتسالىسا بەرەدى», دەدى مەملەكەت باسشىسى.
