فوتو: gov.kz
«بىلتىرعى تاسقىن ەلىمىز ءۇشىن زور سىناق بولدى. مۇنداي الاپات تاسقىن قازاقستاندا بۇرىن بولماعان. مەملەكەت وراسان زور قاۋىپتىڭ بەتىن قايتارۋ ءۇشىن شۇعىل شارالار قابىلدادى. ادامدار دەر كەزىندە قاۋىپسىز جەرگە كوشىرىلدى, ولاردىڭ ۋاقىتشا پانالايتىن ورىندارى ازىرلەندى, ماتەريالدىق رەزەرۆتى پايدالانۋعا رۇقسات بەرىلدى. اپاتتان قۇتقارۋ جۇمىستارىنا توتەنشە جاعدايلار مينيسترلىگىنىڭ عانا ەمەس, ىشكى ىستەر جانە قورعانىس مينيسترلىكتەرىنىڭ, ۇلتتىق ۇلاننىڭ جانە باسقا دا قۇرىلىمداردىڭ قىزمەتكەرلەرى, جالپى سانى 63 مىڭعا جۋىق ادام جۇمىلدىرىلدى. سونىڭ ارقاسىندا كوپتەگەن ازاماتتى قۇتقارىپ, امان ساقتاپ قالدىق. ەڭ باستىسى – وسى», دەدى پرەزيدەنت.
مەملەكەت باسشىسىنىڭ ايتۋىنشا, ءبىر ەل, ءبىر حالىق بولىپ, جۇدىرىقتاي جۇمىلا بىلسەك قانا مۇنداي اپاتتاردى ەڭسەرە الاتىنىمىزعا بارلىعى كوز جەتكىزدى. ودان بولەك, سۋ تاسقىنى كەزىندە ۆولونتەرلەر قوزعالىسىنىڭ الەۋەتى زور ەكەنى بايقالدى. سەبەبى, ەلىمىزدىڭ تۇكپىر-تۇكپىرىنەن كەلگەن ەرىكتىلەر قۇتقارۋشىلارعا جاردەمدەستى, گۋمانيتارلىق كومەك ۇيىمداستىرىپ, زارداپ شەككەندەرگە قولداۋ كورسەتتى.
«قارعىن سۋدىڭ قارقىنى شىنىمەن دە قاتتى بولدى: ۇيلەر, جولدار, كوپىرلەر, الەۋمەتتىك جانە كوممەرتسيالىق نىساندار ءب ۇلىندى, ءبىراز مال قىرىلدى. بوگەتتەر مەن گيدروتەحنيكالىق قوندىرعىلار سالۋعا ونداعان جىل بويى جەتە كوڭىل بولىنگەندە, اپاتتىڭ سالدارى سونشالىقتى اۋىر بولماس ەدى. مۇنى مويىنداۋ كەرەك. قازىر قاتەلىكتى تۇزەپ, ولقىلىقتىڭ ورنىن تولتىرۋعا كىرىستىك. پارلامەنتتە جاڭا سۋ كودەكسىنىڭ جوباسى قارالىپ جاتىر. سۋ رەسۋرستارىن باسقارۋ تۇجىرىمداماسى جانە ونىڭ كەشەندى جوسپارى بەكىتىلدى. وندا 2030 جىلعا دەيىن 40-تان استام سۋ قويماسىن سالۋ جانە 37 سۋ قويماسىن جوندەۋ قاراستىرىلعان. سونداي-اق جالپى ۇزىندىعى 14 مىڭ شاقىرىمنان اساتىن يرريگاتسيا كانالدارىن جاڭعىرتۋ كوزدەلگەن», دەپ قوستى پرەزيدەنت.
اڭگىمە بارىسىندا ەلىمىزدە توتەنشە جاعدايلاردى بولجاۋ جانە ونىڭ الدىن الۋ جۇيەسىن جاڭعىرتۋعا قاتىستى اۋقىمدى جۇمىستار باستالعانى ايتىلدى. قاسىم-جومارت توقاەۆ سۋ ماماندارىنىڭ تاپشىلىعى ماسەلەسىن شەشۋ جانە زەرتتەۋ جۇمىستارىن جانداندىرۋ ءۇشىن قازاق ۇلتتىق سۋ شارۋاشىلىعى جانە يرريگاتسيا ۋنيۆەرسيتەتى قۇرىلعانىن ەسكە سالدى.
«بىلتىر جەلتوقسان ايىنىڭ باسىندا ساۋد ارابياسىندا One Water Summit اتتى باسقوسۋ ءوتتى. قازاقستان مەن فرانتسيا توراعالىق ەتكەن وسى القالى جيىنعا قاتىسىپ, ءسوز سويلەدىم. وندا سۋعا بايلانىستى اپاتتارعا توتەپ بەرۋ مۇمكىندىگىن ارتتىرۋ قاجەتتىگىنە ارنايى توقتالدىم. شىن مانىندە, حالىقارالىق قاۋىمداستىق سۋ قاۋىپسىزدىگىن قامتاماسىز ەتۋ جانە كليماتتىڭ وزگەرۋىنە قارسى كۇرەسۋ ءۇشىن بىرلەسە ارەكەت ەتۋى كەرەك. قازاقستان وسى ماسەلەگە باسىمدىق بەرەدى.
كۇردەلى ساتتەردە قوعامداعى قوردالانعان كەلەڭسىزدىكتەردىڭ بەتى اشىلاتىنىن ءومىردىڭ ءوزى كورسەتىپ وتىر. بىراق ءار قيىندىقتىڭ قايىرى بار. سوندىقتان داعدارىس كەزىندە بايبالام سالماي, بايىپتى بولعان ءجون. ءبىز وزەكتى ماسەلەلەرگە قاتىستى دۇرىس شەشىم قابىلداپ, ءىستىڭ كوزىن تابا ءبىلۋىمىز قاجەت.
ادەتتە مەملەكەتتىك قىزمەتشىلەردى ورىنسىز سىناپ-مىنەيتىن اڭگىمەلەر ءجيى ايتىلادى. الايدا ءبارى دە سالىستىرعاندا كورىنەدى. اسىرەسە باسقا ەلدەرمەن سالىستىرۋ ارقىلى سارالانادى. ءبىز كوروناۆيرۋس ىندەتىنەن باستاپ قازىرگە دەيىن داعدارىستى جاعدايلاردىڭ بارىنەن ويداعىداي ءوتىپ كەلەمىز», دەدى پرەزيدەنت.
