جالپى, «Disney» كومپانياسىندا فيلمدەردى ءتۇرلى ەلدەرگە بەيىمدەپ, دۋبلياجداۋ – بۇرىننان بار ءۇردىس. «Disney» جىل سايىن ءار ءفيلمنىڭ ءتۇرلى تىلدەردەگى 30-عا جۋىق نۇسقاسىن دايىندايدى. قازاق ءتىلىنىڭ وسىنداي تاڭداۋلى تىلدەر قاتارىنا قوسىلىپ, الەمگە ايگىلى كەيىپكەرلەردىڭ قازاق كورەرمەنىمەن ءبىر تىلدە سويلەۋى, ارينە, ايتۋلى وقيعا.
ەسكە سالساق, كىشكەنتاي كورەرمەننىڭ كوڭىلىنەن شىققان «ويجۇمباق 2» انيماتسيالىق ءفيلمىنىڭ باستى كەيىپكەرى ءرايليدى اقەركە ەستايقىزى, قۋانىشتى – گۇلنار تلەبالدى, مۇڭدى – الما قىلمۇقان, قورقىنىشتى – رۇستەم جانىامانوۆ دىبىستاعان بولاتىن. «Ninety One» بويز-بەندىنىڭ سوليستەرى – ازامات اشماقىن مەن باتىرحان ماليكوۆ, دۋبلياج رەجيسسەرى شاح-مۇرات ورداباەۆ تا جوباعا ۇلەس قوسقان ەدى.
ال كوپتەن كۇتكەن شىتىرمان وقيعالارعا تولى «موانا 2» انيماتسيالىق ءفيلمىنىڭ رەجيسسەرى – كىشى دەيۆ دەرريك, مۋزىكا اۆتورى – «گرەممي» سىيلىعىنىڭ جۇلدەگەرلەرى ەبيگەيل بارلوۋ مەن ەميلي بەار, «گرەممي» نومينانتى وپەتايا فوايا مەن ءۇش دۇركىن «گرەممي» جۇلدەسىنىڭ يەگەرى مارك مانچينا.
قازاق تىلىندە كورسەتىلگەن كەلەسى تۋىندى – «مۋفاسا: ارىستان پاتشا». 2019 جىلعى «ارىستان پاتشا» فيلمىندە قولدانىلعان زاماناۋي تەحنولوگيالاردىڭ كومەگىمەن تۇسىرىلگەن بۇل كارتينا مۋفاسانىڭ بالالىق جانە جاستىق شاعىن, باۋىرى شراممەن اراداعى وشپەندىلىكتىڭ تۇپكى تاريحىن باياندايدى. فيلم رەجيسسەرى – بارري دجەنكينس («اي ساۋلەسى»), ستسەناريىن دجەفف ناتانسون («تەرمينال») جازعان.
ۇسىنىلعان فيلمدەردىڭ قازاق تىلىندەگى دۋبلياجى وتاندىق «Movie Dalen» ستۋدياسىندا جاسالدى.
مادەنيەت جانە اقپارات مينيسترلىگى مەن حالىقارالىق «قازاق ءتىلى» قوعامى «Disney» ستۋدياسىنىڭ بۇل باستاماسىنا قولداۋ ءبىلدىردى. جالپى, حالىقارالىق «قازاق ءتىلى» قوعامىنىڭ نەگىزگى جۇمىس باعىتى «Disney» كومپانياسىنىڭ ۇستانىمىمەن ۇندەس كەلەدى. «قازاق ءتىلى» قوعامى مەملەكەتتىك تىلدەگى كونتەنت قورىن, اتاپ ايتقاندا, بالا ءتىلىن قازاقشا شىعارۋعا قاجەت قۇرالداردان باستاپ, ءار ادامنىڭ قازاق ءتىلى اياسىندا تۇلعا ءارى مامان بولىپ قالىپتاسۋىنا كەرەك مازمۇن قورىن ارتتىرۋعا باسىمدىق بەرەدى.
