اسقات بەكقالي ۇلى – مىقتى گرافيك سۋرەتشى. ونىڭ لينوگراۆيۋرا تەحنيكاسىندا ورىندالعان شىعارمالارىندا تۋعان جەر تاقىرىبى, ۇلتتىق ناقىشتى قازاقى بولمىس, بالالىق شاق بەينەلەنگەن. قىلقالامىنان شىققان كومپوزيتسيالار اسقان شەبەرلىگىمەن باۋراپ الادى. قاراپايىم سىزىقتار ءتىزىلىپ كەلىپ قىم-قۋىت وقيعاعا, پلاستيكاسى مەن كوركەمدىگى كەرەمەت قيۋلاسقان عاجايىپ ونەر تۋىندىسىنا اينالادى.
شىعارمالارى كوپشىلىك كوڭىلىنەن شىعىپ, ونەرتانۋشىلاردىڭ وڭ باعاسىن العان. ول رەسپۋبليكالىق, وبلىستىق, قالالىق كورمە-بايقاۋلاردىڭ لاۋرەاتى. حالىقارالىق, رەسپۋبليكالىق كورمەلەرگە قاتىسىپ كەلەدى. سۋرەتشىنىڭ جۇمىستارى ەلورداداعى ۇلتتىق مۋزەيدىڭ, رەسەيدەگى «ليبەروۆ-تسەنتر» مەملەكەتتىك كوركەمسۋرەت مۋزەيىنىڭ, اتىراۋ قالاسىنداعى «اق جەلكەن» شىعارماشىلىق ورتالىعىنىڭ, اقتوبە وبلىسىنداعى ش.بەرسيەۆ اتىنداعى ويىل اۋداندىق ونەر جانە ولكە تاريحى مۋزەيىنىڭ قورىندا, يسپانيادا (ۆالەنسيا قالاسى), تاتارستاندا (قازان), ەلىمىزدەگى جەكە جيناقتاردا ساقتاۋلى.
جاقىندا اسقات باتىس قازاقستان وبلىسىنىڭ مەملەكەتتىك ارحيۆىنەن تابىلعان «جاسكەلەڭ-قوڭىرشا» اتتى ليريكالىق-قاھارماندىق جىرىنا ارناپ تسيكلدى شىعارمالار سالدى. بۇل گرافيكالىق يلليۋستراتسيالار بقو حالىق شىعارماشىلىق ورتالىعىنىڭ 80 جىلدىق مەرەيتويى اياسىندا جارىققا شىققان «جاسكەلەڭ-قوڭىرشا» جىرى كىتابىندا جاريالاندى.
– بۇل جىردى كىتاپ ەتىپ شىعاراردا بۇرىنعى داستۇرگە بوي ۇرعىمىز كەلدى. ياعني جىردىڭ كوركەم ەپيزودتارىن كوركەم يلليۋستراتسيالاۋ ۇيعارىلدى. ول ءۇشىن جاس تا بولسا تانىمال, دارىندى سۋرەتشى اسقات ابدەشەۆكە قولقا سالدىق. اسقات بەكقالي ۇلى بۇل مىندەتتى ابىرويمەن اتقاردى. ونىڭ شەبەرلىكپەن, شىنايى ىقىلاسپەن سالعان گرافيكالىق تۋىندىلارى جىرداعى ونسىز دا شىتىرمان ەپيزودتاردى ودان بەتەر قۇلپىرتىپ, قوسىمشا رەڭ بەرىپ بايىتىپ جىبەردى. مۇنداي قىرۋار ۋاقىت پەن ەڭبەكتى تالاپ ەتەتىن گرافيكالىق سۋرەتتەردى سوڭعى رەت كەڭەس كەزەڭىندە شىققان ەرتەگى, ەپوستاردان كورگەن شىعارمىز, – دەيدى وسى جيناقتى قۇراستىرۋشى نۇرلان ءسادىر.
ءبىز بۇگىن «Egemen Qazaqstan» گازەتىنىڭ وقىرماندارىنا اسقات ابدەشەۆتىڭ «جاسكەلەڭ-قوڭىرشا» جىرىنا ارناپ سالعان تسيكلدى گرافيكالىق تۋىندىلارىن ۇسىندىق.
باتىس قازاقستان وبلىسى
