قازاقستاندا عىلىمدى قارجىلاندىرۋ كولەمى ۇلعايادى

ونىڭ ىشىندە باعدارلامالىق-نىسانالى قارجىلاندىرۋعا – 211 ملرد تەڭگە, گرانتتىق قارجىلاندىرۋ پروتسەسىنە – 198 ملرد تەڭگە, كوممەرتسيالاندىرۋدى گرانتتىق قارجىلاندىرۋعا – 67,9 ملرد تەڭگە باعىتتالادى.

بيىل عىلىمي قىزمەتكەرلەر سانى 25,4 مىڭ ادامعا جەتكەن. بۇل كورسەتكىش وتكەن جىلمەن سالىستىرعاندا 13 پايىزعا كوپ. 

جاستاردى عىلىمعا تارتۋ ماقساتىندا عىلىم جانە جوعارى ءبىلىم مينيسترلىگى مەن «وتباسى بانكى» اق اراسىندا جاس عالىمدارعا 2023-2027 جىلدارعا ارنالعان جەڭىلدەتىلگەن نەسيە بەرۋ باعدارلاماسى بويىنشا ىنتىماقتاستىق تۋرالى كەلىسىمگە قول قويىلدى. «وتباسى بانكى» اق كەلىسىم شەڭبەرىندە 2023 جىلعى 1 جەلتوقساندا جاس عالىمدارعا ارنالعان يپوتەكالىق نەسيە بەرۋ باعدارلاماسىن ىسكە قوستى.

نەسيەنىڭ ەڭ كوپ سوماسى - 20 ملن تەڭگە, قارىز مەرزىمى – 19 جىل. 2024 جىلدىڭ 8 ايىنىڭ قورىتىندىسى بويىنشا جاس عالىمدارعا 290 پاتەر بەرىلگەن. بۇل ولاردى قازاقستاندا قالۋعا ءارى ەلىمىزدە عىلىمدى دامىتۋعا قوسىمشا ىنتالاندىرادى. تاعى 20 جاس عالىمعا وتەۋسىز نەگىزدە پاتەر كىلتى تابىستالعان.

2023 جىلى 809 عالىمعا الەمنىڭ جەتەكشى ورتالىقتارىندا عىلىمي تاعىلىمدامادان وتۋگە گرانتتار ۇسىنىلعان. قازىرگى ۋاقىتتا رەسپۋبليكالىق كوميسسيانىڭ ەكىنشى وتىرىسىنىڭ قورىتىندىسى بويىنشا 80 ۇمىتكەردىڭ عىلىمي تاعىلىمدامادان ءوتۋى ماقۇلداندى.

عىلىمي كادرلاردى (PhD دوكتورلارىن) دايارلاۋعا دا ەرەكشە كوڭىل ءبولىنىپ, دوكتورانتۋراعا مەملەكەتتىك تاپسىرىس 1,9 مىڭ ورىنعا دەيىن ۇلعايتىلعان.