زاماناۋي ورتالىقتىڭ ارقاسىندا كەنشىلەر شاھارىندا بوس ۋاقىتىن ءتيىمدى وتكىزۋگە مۇمكىندىك العان بالالار سانى 16 مىڭنان استام وقۋشىعا ۇلعايدى.
جوبانىڭ جالپى قۇنى – 5,3 ملرد تەڭگە, «ERG» جانە «KazMineralsBozshakol» توپتارىنىڭ دەمەۋشىلىك قاراجاتى ەسەبىنەن تۇرعىزىلدى. جالپى اۋدانى 7200 شارشى مەتردى قۇرايتىن زاماناۋي ورتالىقتا 9 مىڭنان استام بالا, ونىڭ ىشىندە ەرەكشە قاجەتتىلىگى بار بالالار 12 باعىت بويىنشا قوسىمشا ءبىلىم الۋعا, ۋاقىتتارىن قىزىقتى وتكىزۋگە, وزدەرىن دامىتۋعا مۇمكىندىك الدى. ورتالىق ەرەكشە قاجەتتىلىكتەرى بار بالالارعا تولىقتاي بەيىمدەلگەن, ليفت جانە كوتەرگىش قۇرىلعىلارمەن, تيفلو جانە سۋردوقۇرىلعىلارمەن جابدىقتالعان.
– مەن بۇگىن مەملەكەت باسشىسى قاسىم-جومارت توقاەۆتىڭ تىكەلەي تاپسىرماسىمەن سالىنعان يننوۆاتسيالىق «سامعاۋ» بالالار شىعارماشىلىعى ورتالىعىنىڭ اشىلۋ سالتاناتىنا قاتىسقانىما وتە قۋانىشتىمىن. «سامعاۋ» كەنشىلەر قالاسىنىڭ بالالارى مەن جاستارىن تارتاتىن ورتالىق بولاتىنىنا سەنىمدىمىن, – دەدى ءوڭىر باسشىسى اسايىن بايحانوۆ. اكىم جاس ۇرپاقتىڭ ۇيلەسىمدى دامۋى ءۇشىن اسا قاجەتتى جوبانى ىسكە اسىرۋعا جانە نىساننىڭ قۇرىلىسىنا قاتىسقانداردىڭ بارلىعىنا العىسىن ءبىلدىردى.
عيماراتتىڭ ءبىرىنشى قاباتىندا بي زالى, تەاترلىق جاتتىعۋ زالى, جەكە ۆوكال مەن مۋزىكا ساباقتارىنا ارنالعان بولمەلەر جانە 275 ورىندىق ۇلكەن اۋديتوريا ورنالاسقان. بالالار ورتالىق جۇمىسىنىڭ شىعارماشىلىق باعىتتارىنان حورەوگرافيا (حالىقتىق, زاماناۋي جانە كلاسسيكالىق بيلەر), تەاتر ونەرى, ۆوكال جانە حور ءانى نەمەسە اسپاپتىق شەبەرلىك (دومبىرا, قوبىز, گيتارا, ماندولينا, داۋىلپاز, اساتاياق, شەرتپە) بويىنشا ساباقتاردى تاڭداي الادى.
ەكىنشى قاباتتا جاسىل تەحنولوگيالار ورتالىعىنىڭ عىلىمي-بيولوگيالىق زەرتحاناسى (گيدرو جانە ەكوپونيكا) مەن لاندشافتتىق ساۋلەت جانە فلوريستيكالىق ديزاين ستۋديالارى, سونداي-اق, پىكىرتالاس ورتالىعى, مەديا ورتالىق (دىبىس جازۋ ستۋدياسى, تەلەستۋديا, فوتوگرافيا اكادەمياسى, جاس بلوگەر ستۋدياسى, كوۆوركينگ ورتالىعى), ءسان ستۋدياسى (ماكياج بەن كوستيۋم سۋرەتشىسى, ينتەرەر ديزاينى) ورنالاسقان. ال ءۇشىنشى قابات تولىعىمەن روبوت-تەحنيكا جانە كومپيۋتەرلىك مودەلدەۋ, عارىشتىق راديوبايلانىس جانە راديوتەحنيكا كلۋبتارىن, ستەم جانە لەگو زەرتحانالارىن, ۇۇا (ۇشقىشسىز ۇشۋ اپپاراتى) كلۋبىن قوسا العاندا IT تەحنولوگيالارعا, سونداي-اق بالالار ءپىشىم مەن تىگىندى, مودەلدەۋدى, كەراميكانى, بەينەلەۋ ونەرى مەن اسپازدىق ونەردى ۇيرەنۋگە مۇمكىندىك بەرەتىن كوركەمدىك-قولدانبالى بلوكقا بەرىلدى. بۇعان قوسا اتا-انالار مەن بالالارعا ارنالعان پسيحولوگيالىق-پەداگوگيكالىق قولداۋ كابينەتى, ۇستەل تەننيسىنە ارنالعان ايماقتار, ەمدىك دەنە شىنىقتىرۋ جانە جاتتىعۋ زالى جۇمىس ىستەيتىن بولادى.
اتا-انالار ۇيىرمەلەرىنىڭ بارلىعىن تەگىن تۇردە ۇسىنىپ وتىرعان ورتالىقتىڭ اشىلعانىنا ريزاشىلىقتارىن جەتكىزدى.
«بالالارىمىز جاڭا دۇنيەلەردى ۇيرەنىپ, ءبىلىم الۋلارى ءۇشىن قالامىزدا وسىنداي ورتالىقتىڭ اشىلعانى قۋانتارلىق. وسىنداي زاماناۋي عيماراتتى سالۋعا تاپسىرما بەرگەن پرەزيدەنتىمىزگە ريزامىز. شىعارماشىلىق ۇيىرمەگە جازىلۋدى جوسپارلاعانبىز, بىراق, مۇندا كوپتەگەن قىزىقتى ۇيىرمەلەر بار ەكەن, ەندى باسقا دا باعىتتارعا قاتىسۋدى ويلاپ وتىرمىز», دەيدى قالا تۇرعىنى ايانا سماعۇلوۆا.
بۇگىندە ورتالىقتا جۇمىس ىستەۋگە 50-دەن استام قوسىمشا ءبىلىم بەرۋ پەداگوگتەرى تارتىلدى.
ەرتىس-بايان وڭىرىندە وسكەلەڭ ۇرپاقتىڭ ۇيلەسىمدى دامۋى ءۇشىن بارلىق جاعداي جاسالىپ وتىر. بۇعان دەيىن 800 بالاعا ارنالعان شىعارماشىلىق ورتالىق ەرتىس اۋدانىندا اشىلسا, پاۆلودار قالاسىندا «التىن ساقا» بالالار شىعارماشىلىعى جانە دەمالىس ورتالىعى ەسىگىن ايقارا اشتى. ال الداعى ءۇش جىلدا ۋسپەن, شارباقتى جانە پاۆلودار اۋداندارىندا وقۋشىلاردىڭ قىزىعۋشىلىقتارى مەن تالانتتارىن دامىتۋعا جول اشاتىن ونەر مەكتەپتەرىن سالۋ جوسپارلانعان.
پاۆلودار وبلىسى,
ەكىباستۇز قالاسى
