وقيعا ورنىنا الدىمەن جەتكەن «مرەك» كەشەنىنىڭ قىزمەتكەرلەرى مەن كۋا بولعان جەرگىلىكتى تۇرعىندار ءتىرى قالعان جولاۋشىلاردى ۇشاق قيراندىسىنان شىعارۋ جۇمىسىن دەرەۋ باستاپ كەتتى. ولار ارنايى ورگان قىزمەتكەرلەرى كەلگەنشە, 15 ادامدى ۇشاقتان شىعارىپ ۇلگەردى. ارتىنشا جەتكەن توتەنشە جاعداي, جەدەل جاردەم قىزمەتكەرلەرى شۇعىل ىسكە كىرىستى.
ءوڭىر باسشىسى نۇرداۋلەت قيلىباي وقيعا ورنىنا بارىپ, وبلىس اكىمىنىڭ توراعالىعىمەن جەدەل شتاب قۇرىلدى. اپات ورنىندا تجد, ءىىد, جەرگىلىكتى اكىمدىك قۇتقارۋ جۇمىسىنا قاجەتتى جاعدايدىڭ بارلىعىن جاساۋعا جۇمىلدىرىلدى. تجم-نىڭ 52 قىزمەتكەرى مەن 11 تەحنيكاسى اۋە كەمەسىنەن شىققان ءورتتى ءسوندىردى.
ماڭعىستاۋ وبلىستىق دەنساۋلىق ساقتاۋ باسقارماسىنىڭ باسشىسى بەكبولات ءىزباساروۆتىڭ ايتۋىنشا, جەدەل جاردەمگە 1-دارەجەلى شاقىرتۋ تۇسكەن سوڭ وقيعا ورنىنا جەدەل جاردەمنىڭ 22 بريگاداسى, مەديتسينالىق اپات ورتالىعى مەكەمەسىنەن 6 بريگادا, 4-دارەجەدەگى 2 جەدەل بريگادا بىردەن جەتتى. ماڭعىستاۋ وبلىستىق ورتالىق اۋرۋحاناسى حيرۋرگيالىق, تراۆموتولوگيالىق باعىتتا 30 ورىن, رەانيماتسيالىق باعىتتا 10 ورىن دايىنداپ ۇلگەردى. وبلىستىق بالالار اۋرۋحاناسى قوسىمشا 20 ورىن, جانساقتاۋ بولىمىنەن 20 ورىن دايىنداسا, «نەيرون», «سوفيمەد», «ياسين-اتامەكەن» جەكەمەنشىك كلينيكالارى بارلىعى 60 ورىن, جانساقتاۋ بولىمىنەن 26 ورىن ۇسىندى. استانا قالاسىنان كومەك كەلىپ جەتكەنشە, ماڭعىستاۋ وبلىستىق ونكولوگيالىق ديسپانسەردىڭ رەانيماتولوگ دارىگەرى مەن 2 مەدبيكەسى دە وقيعا ورنىندا جارالىلارعا شۇعىل كومەك كورسەتتى. وقيعا ورنىندا بارلىق توتەنشە جاعدايلار قىزمەتتەرى, كريميناليست-ساراپشىلار, پروكۋراتۋرا ورگاندارى توتەنشە جاعداي رەجىمىندە جۇمىس ىستەدى. جالپى, وپەراتسياعا ازاماتتىق قورعاۋ قىزمەتىنىڭ جەكە قۇرامىنان 701 ادام, 82 بىرلىك تەحنيكا جۇمىلدى.
– بارلىق زارداپ شەگۋشىلەردىڭ سانى – 29. ولاردىڭ 27-ءى وبلىستىق اۋرۋحاناعا جەتكىزىلگەن بولسا, قازىرگى تاڭدا 11 جولاۋشى اۋىر جاعدايدا جانساقتاۋ بولىمىندە جاتىر, – دەدى ب.ءىزباساروۆ.
سوڭعى دەرەكتەر بويىنشا, اپاتتان 32 ادام امان قالىپ, قالعاندارى قازا تاپقان. امان قالعاندار اراسىندا ەكى ەكيپاج مۇشەسى, ەكى ستيۋاردەسسا بار.
ۇشاق اپاتىنا بايلانىستى ماڭعىستاۋ وبلىسىنا پرەمەر-ءمينيستردىڭ ورىنباسارى قانات بوزىمباەۆ باستاعان ۇكىمەتتىك كوميسسيا مەن باكۋدەن ازەربايجاننىڭ توتەنشە جاعدايلار ءمينيسترى باستاعان ارنايى قۇرىلعان كوميسسيا مۇشەلەرى, سونداي-اق سانيتارلىق اۆياتسيا جەلىسى بويىنشا استانا قالاسىنان ۇلتتىق شۇعىل مەديتسينا ۇيلەستىرۋ ورتالىعىنىڭ, جەتەكشى رەسپۋبليكالىق ورتالىقتاردىڭ جوعارى بىلىكتى ماماندارى, ازەربايجان رەسپۋبليكاسىنىڭ دەنساۋلىق ساقتاۋ مينيسترلىگى مەن تجم ارنايى كەڭەسى, ساناۆياتسيا بريگاداسى كەلدى. كوميسسيا مۇشەلەرى شتاب وتىرىسىن وتكىزدى, اۋرۋحاناعا جەتكىزىلگەن زارداپ شەككەندەرگە بارىپ شىقتى.
تەرگەۋ ورگاندارى 2 پاتسيەنتتىڭ جەكە باسىن انىقتاۋعا قاتىستى جۇمىس جۇرگىزدى. ولاردىڭ بىرەۋى ازەربايجان ازاماتى ەكەنى انىقتالدى. بارلىق زارداپ شەككەندەرمەن, ولاردىڭ تۋىستارىمەن پسيحولوگتەر توبى جۇمىس ىستەپ جاتىر. 26 جەلتوقسان كۇنى رەسەي فەدەراتسياسىنىڭ تجم ورتالىق اپپاراتىنىڭ سانيتارلىق اۆياتسيا بورتىندا رەسەيدىڭ 9 ازاماتى ەۆاكۋاتسيالاندى.
اقتاۋ اۋرۋحانالارىنداعى 20 ناۋقاستىڭ جاعدايى قاتاڭ باقىلاۋدا, 5 ادام ماڭعىستاۋ وبلىستىق اۋرۋحانادا, 1 ادام ماڭعىستاۋ وبلىستىق بالالار اۋرۋحاناسىنىڭ جانساقتاۋ بولىمىندە جاتىر. ماڭعىستاۋ وبلىستىق اۋرۋحاناسىنان 2 پاتسيەنت تراۆماتولوگيا بولىمشەسىنە اۋىستىرىلدى.
وبلىس اكىمى ن.قيلىباي باستاعان جەرگىلىكتى بيلىك, ماڭعىستاۋلىق تۇرعىندار ۇشاق اپاتىنان زارداپ شەككەندەرگە جۇمىلا كومەك كورسەتتى. جەرگىلىكتى حالىق ازەربايجان ەلشىلىگى الدىنا گۇل شوقتارىن قويىپ, قان ورتالىعىندا قان تاپسىرۋعا كەزەككە تۇردى.
قازىرگى تاڭدا وبلىستا پرەمەر-ءمينيسترىنىڭ ورىنباسارى قانات بوزىمباەۆ باستاعان ۇكىمەتتىك كوميسسيا جۇمىس ىستەپ جاتىر. ۇشاق اپاتىنىڭ سەبەبىن الداعى ۋاقىتتا ارنايى ورىندار انىقتايدى.
ماڭعىستاۋ وبلىسى
