فوتولار: ءماجىلىستىڭ ءباسپاسوز قىزمەتى
ءسوز باسىندا ءماجىلىس سپيكەرى, «AMANAT» پارتياسىنىڭ توراعاسى ەرلان قوشانوۆ ەل پرەزيدەنتى قاسىم-جومارت توقاەۆتىڭ تاپسىرماسى بويىنشا ارنايى مەملەكەتتىك كوميسسيا قۇرىلىپ, بارلىق قاجەتتى كومەك ۇيىمداستىرىلعانىن اتاپ ءوتتى.
«بۇگىن باۋىرلاس ازەربايجان ەلىنىڭ جولاۋشىلار ۇشاعى اقتاۋ ماڭىندا اپاتقا ۇشىرادى. بۇل قارالى حابار بارشامىزدىڭ قابىرعامىزدى قايىستىردى. جولاۋشىلار اراسىندا ازەربايجان, قىرعىزستان, رەسەي جانە قازاقستان ازاماتتارى بار. وسىعان بايلانىستى, ءماجىلىس دەپۋتاتتارى قازا تاپقان ادامداردىڭ تۋىستارى مەن جاقىندارىنا كوڭىل ايتادى. ال زارداپ شەككەن ازاماتتاردىڭ تەزىرەك ساۋىعىپ كەتۋىن تىلەيمىز. «AMANAT» پارتياسى امان قالعاندار مەن ولاردىڭ جاقىندارىنا قولداۋ كورسەتەدى. قاجەت بولعان جاعدايدا دونورلىق قان تاپسىرۋ جۇمىسىن ۇيىمداستىرۋعا دايىن», دەدى ول.
ءماجىلىستىڭ ءباسپاسوز قىزمەتىنىڭ ءمالىم ەتۋىنشە وتىرىس بارىسىندا حالىق قالاۋلىلارى بيىل اتقارىلعان جۇمىستى قورىتىندىلادى. زاڭ شىعارۋ جۇمىسىندا دەپۋتاتتار مەملەكەتتىڭ حالىق الدىنداعى الەۋمەتتىك مىندەتتەمەلەرىن, ونىڭ ىشىندە جالاقى مەن زەينەتاقىنى يندەكستەۋ, جاردەماقى مولشەرىن ارتتىرۋ, مەديتسينالىق كومەكتى قامتاماسىز ەتۋ جانە وزگە دە باسىمدىقتاردى ورىنداۋعا باسا نازار اۋداردى. ناشاقورلىق پەن لۋدومانيا سياقتى قوعام دەرتىمەن كۇرەسۋدى كوزدەيتىن زاڭدار ازىرلەنگەنىن ەرەكشە اتاپ وتكەن ءجون. سوڭعى ءۇش سەسسيادا بارلىعى 247 زاڭ جوباسى قارالدى. ونىڭ 169-ى ماقۇلدانىپ, سەناتقا جىبەرىلدى. بۇل رەتتە, اتالعان قۇجاتتاردىڭ 59-ىنا «AMANAT» پارتياسى فراكتسياسىنىڭ مۇشەلەرى باستاماشىلىق ەتتى. سونداي-اق, دەپۋتاتتار زاڭ جوبالارىنا 3,5 مىڭ وزگەرىس پەن تۇزەتۋ ەنگىزدى. سونىمەن قاتار, پلەنارلىق وتىرىستاردا 460 دەپۋتاتتىق ساۋال جولداندى.
«پرەزيدەنت جولداۋلارىندا جانە ونىڭ سايلاۋالدى باعدارلاماسىندا قامتىلعان مىندەتتەردى زاڭنامالىق تۇرعىدان قامتاماسىز ەتۋ بويىنشا ۇلكەن جۇمىس اتقارىلدى. مەملەكەت باسشىسى قاسىم-جومارت توقاەۆ جۋىردا وتكەن بارلىق دەڭگەيدەگى دەپۋتاتتار فورۋمىندا «AMANAT» پارتياسىنىڭ قىزمەتىنە جوعارى باعا بەردى. جىل باسىندا پرەمەر-ءمينيستردىڭ كانديداتۋراسىن بەكىتۋ راسىمىندە دە ماجىلىسكە ارنايى ريزا ەكەنىن ءبىلدىردى. بۇل جەتىستىكتەر – دەپۋتاتتاردىڭ قاجىرلى ەڭبەگىنىڭ ناتيجەسى. «AMANAT» فراكتسياسى – ماجىلىستەگى نەگىزگى ساياسي كۇش. ءبىز بيلىك پەن حالىق اراسىنداعى كوپىرمىز. ازاماتتاردىڭ سەنىم ۇدەسىنەن شىعىپ, وسى باعىتتاعى جۇمىستى جالعاستىرۋ ماڭىزدى», دەدى ەرلان قوشانوۆ.
«AMANAT» پارتياسىنىڭ توراعاسى ءماسليحات دەپۋتاتتارىمەن جانە اۋىل اكىمدەرىمەن جۇيەلى جانە دايەكتى بىرلەسكەن جۇمىس جۇرگىزۋدىڭ ماڭىزىنا توقتالدى. سەبەبى ولاردىڭ باسىم كوپشىلىگى – پارتيا وكىلدەرى. ءماجىلىس جانىنداعى زاڭ شىعارۋ جۇمىسىنا تارتىلاتىن ءماسليحات دەپۋتاتتارىنىڭ بەلسەندىلىگىن ارتتىرۋ ماڭىزدى. سونداي-اق, اۋىل اكىمدەرىنىڭ جۇمىسىن كۇشەيتۋ ءۇشىن «AMANAT» فراكتسياسى بىرقاتار ۇسىنىس ازىرلەدى.
جيىن سوڭىندا ءماجىلىس سپيكەرى پارلامەنتشىلەردىڭ الداعى ۋاقىتتا وڭىرلەرگە جاسايتىن ساپارى كەزىندە دەپۋتاتتارعا جۇكتەلەتىن بىرقاتار مىندەتتى ايقىنداپ بەردى. كەلەر جىلى قاڭتاردا دەپۋتاتتاردىڭ سايلاۋشىلارمەن ءداستۇرلى كەزدەسۋلەرى باستالادى. ساپار بارىسىندا ماجىلىسمەندەر وندىرىستىك جانە الەۋمەتتىك نىسانداردى ارالاپ, ەڭبەك ۇجىمدارىمەن جۇزدەسەدى. سونداي-اق ازاماتتاردى جەكە ماسەلەلەرى بويىنشا قابىلداۋ وتكىزەدى. ەرلان قوشانوۆ ازاماتتارمەن كەزدەسۋلەر جەرگىلىكتى جەرلەردەگى ناقتى ماسەلەلەردى تالقىلاي وتىرىپ, اشىق پىكىرتالاس فورماتىندا وتۋگە ءتيىس ەكەنىن ەرەكشە اتاپ ءوتتى.
