ءبىلىم ساپاسىن ارتتىرۋداعى ماڭىزدى قادام: جاڭا مەكتەپتەر مەن بالاباقشالار

جاڭا ءبىلىم وبەكتىلەرىءنىڭ اشىلۋى

ءار وڭىردە, سونىڭ ىشىندە ەلوردامىز استانادا, سونداي-اق تۇركىستان, قوستاناي, قىزىلوردا, اقتوبە, پاۆلودار, باتىس قازاقستان وبلىستارىندا جاڭا بالاباقشالار, مەكتەپتەر مەن شىعارماشىلىق ورتالىقتار بوي كوتەردى.

اتاپ ايتساق, تاۋەلسىزدىك كۇنى قارساڭىندا تۇركىستان وبلىسىنداعى ساۋران اۋدانىنىڭ ەڭبەكشى ديحان اۋىلىندا ءبىر اۋىسىمدا 600 وقۋشىعا شاقتالعان جاڭا جايلى مەكتەپ اشىلدى. نىسان مەملەكەت باسشىسى قاسىم-جومارت توقاەۆتىڭ تاپسىرماسىمەن جۇزەگە اسىرىلىپ جاتقان «جايلى مەكتەپ» ۇلتتىق جوباسى اياسىندا بوي كوتەردى. بۇل اۋىل تۇرعىندارى ءۇشىن كوپتەن كۇتكەن وقيعا بولدى. جاڭا مەكتەپ زاماناۋي قاۋىپسىزدىك تالاپتارىنا سايكەس كەلەتىن بارلىق قاجەتتى قۇرال-جابدىقتارمەن قامتىلعان.

ال ەلوردادا ەكى اۋىسىمدا 4 مىڭ وقۋشىعا ارنالعان 11-ءشى «جايلى مەكتەپ» اشىلدى. بۇل مەكتەپ ۇركەر تۇرعىن الابىندا ورنالاسقان, ول ورىن تاپشىلىعى ماسەلەسىن شەشۋگە سەپتىگىن تيگىزدى.

ءبىلىم سالاسىنداعى تاعى ءبىر ماڭىزدى وقيعالاردىڭ ءبىرى - باتىس قازاقستان وبلىسىنىڭ ورال قالاسىندا 400 وقۋشىعا ارنالعان جاڭا مەكتەپتىڭ پايدالانۋعا بەرىلۋى. مەكتەپتە بالالار شىعارماشىلىعىن دامىتۋ مەن دەمالۋعا ارنالعان كەڭىستىكتەر, سونداي-اق جەكە شكافتار قاراستىرىلعان. سونىمەن قاتار سپورت جانە اكت زالدارى, كىتاپحانا, اسحانا, شەبەرحانا جانە 36 پاندىك كابينەت بار.

سونداي-اق قوستاناي وبلىسىنىڭ قوستاناي جانە ارقالىق قالالارىندا ەكى جاڭا مەملەكەتتىك بالاباقشا اشىلدى. بۇل مەكتەپكە دەيىنگى ۇيىمدار بارلىق زاماناۋي ستاندارتتارعا ساي. ولار جاتىن بولمەلەرىمەن, ويىن بولمەلەرىمەن, حورەوگرافيالىق, گيمناستيكالىق, مۋزىكالىق جانە سپورت زالدارىمەن, پەداگوگ-پسيحولوگ, لوگوپەد, مەديتسينالىق, قوسىمشا ءبىلىم بەرۋ كابينەتتەرىمەن قامتىلعان.

ايتا كەتەيىك, وسى جىلدىڭ باسىنان بەرى ەلىمىزدە 560-تان استام مەكتەپكە دەيىنگى ۇيىم اشىلعان.

ەلىمىزدىڭ ءتورت وڭىرىندە قوسىمشا ءبىلىم بەرۋ نىساندارى پايدالانۋعا بەرىلگەن. مىسالى, اقتوبە وبلىسى قارعالى اۋدانىنىڭ بادامشا اۋىلىندا ونەر مەكتەبى اشىلدى. وندا 550-گە جۋىق بالا ءبىلىم الىپ جاتىر.

قىزىلوردا وبلىسىنىڭ جاڭاقورعان اۋدانىندا ەكى قوسىمشا ءبىلىم بەرۋ ۇيىمى – وقۋشىلار سارايى مەن ونەر مەكتەبى اشىلدى. بۇل مەكەمەلەردە 19 قوسىمشا ءبىلىم بەرۋ باعىتى بويىنشا 250-دەن استام بالا ءبىلىم الادى.

سونداي-اق پاۆلودار وبلىسىنىڭ ەكىباستۇز قالاسىندا مەملەكەت باسشىسىنىڭ تاپسىرماسىمەن سالىنعان «سامعاۋ» بالالاردىڭ زامانۋي شىعارماشىلىق ءۇيى اشىلدى. ول «بالالارعا قوسىمشا ءبىلىم بەرۋ جۇيەسىنىڭ جاڭا ۇلگىسى» عىلىمي-تەحنيكالىق باعدارلامالارى اياسىندا 12 باعىت بويىنشا بالالاردى وقىتۋعا ارنالعان جوعارى تەحنولوگيالارمەن جابدىقتالعان. ورتالىق كۇنىنە 3000-عا دەيىن بالانى قابىلدايدى. ونىڭ ىشىندە ەرەكشە ءبىلىم بەرۋدى قاجەت ەتەتىن وقۋشىلار دا بار.

2024-2025 وقۋ جىلىنىڭ باسىنان بەرى ەلىمىزدە بارلىعى 500-دەن استام جاڭا ءبىلىم بەرۋ ۇيىمى اشىلعان.

 جاڭا نىسانداردىڭ ايماقتىق دامۋعا اسەرى

بىلىمگە قولجەتىمدىلىكتى تەڭەستىرۋ. جاڭا وقۋ ورىندارىنىڭ اشىلۋى قالا مەن اۋىلدىق ايماقتار اراسىنداعى ءبىلىم بەرۋدەگى ديسپروپورتسيانى ازايتۋعا ۇلكەن كومەگىن تيگىزەدى. بۇل شالعاي ەلدى مەكەندەردىڭ بالالارىنا ۇلكەن قالالارعا بارماي-اق ساپالى ءبىلىم الىپ, تالانتتارىن دامىتۋعا مۇمكىندىك بەرە الادى.

سونىمەن قاتار جاڭا وقۋ ورىندارىنىڭ اشىلۋى مۇعالىمدەرگە, اكىمشىلىك قىزمەتكەرلەرگە جانە ماماندارعا قوسىمشا جۇمىس ورىندارىن اشادى. بۇل وڭىرلەردىڭ ەكونوميكالىق جاعدايىن جاقسارتۋعا ىقپال ەتەدى.

وقىتۋدىڭ زاماناۋي ادىستەرىن قولدانۋ ارقىلى وقۋعا جانە ساباقتان تىس جۇمىستاردى وتكىزۋگە قولايلى جاعداي تۋعىزادى. مەكتەپتەردە ينتەراكتيۆتى تاقتالار, كومپيۋتەرلىك زەرتحانالار ورناتىلىپ, ال شىعارماشىلىق ورتالىقتاردا ونەر, مۋزىكا جانە بي ساباقتارىنا ارنالعان ستۋديالار بولۋى ايماقتىڭ دامۋىنا ەداۋىر اسەر ەتپەك.

بۇل باستامالار ەلىمىزدەگى ءبىلىم بەرۋدى جاڭعىرتۋ جانە ينفراقۇرىلىمدى دامىتۋ جونىندەگى مەملەكەتتىك باعدارلامانىڭ ءبىر بولىگى. ولار ءبىلىم ساپاسىن ارتتىرۋعا جانە تۇرعىلىقتى جەرىنە قاراماستان بارلىق ازاماتتارعا تەڭ مۇمكىندىكتەردى قامتاماسىز ەتۋگە باعىتتالعان ستراتەگيالىق ماقساتتارعا سايكەس كەلەدى. وسىلايشا, جاڭا وقۋ ورىندارىنىڭ اشىلۋى قازاقستاننىڭ ءبىلىم بەرۋ سالاسىن دامىتۋداعى, حالىقتىڭ بارلىق توبى ءۇشىن ءبىلىم بەرۋ قىزمەتىنىڭ قولجەتىمدىلىگى مەن ساپاسىن ارتتىرۋداعى ماڭىزدى قادام بولدى.