فوتو: تۋريزم جانە سپورت مينيسترلىگى
- ەلدوس باقتىباي ۇلى, پاريج وليمپياداسىنداعى جارقىن جەڭىسىڭىز ارقىلى قازاق ەلىن قۋانىشقا كەنەلتتىڭىز. تورتجىلدىقتىڭ باستى باسەكەسىندەگى وسى جەڭىستەن كەيىن ەلگە ورالعاندا كەلەسى وليمپياداعا قاتىسۋعا نيەتتى ەكەنىڭىزدى ايتتىڭىز. قازىر دايىندىققا كىرىستىڭىز بە؟
- لوس-اندجەلەستەگى وليمپياداعا الدا ءالى 3 جىل بار. سوندىقتان دايىندىق ايتارلىقتاي دەڭگەيدە باستالعان جوق. قازىر كىشىگىرىم جاراقاتتارىمدى ەمدەپ ءجۇرمىز. اعزانى, دەنەنى دەمالدىرىپ, قالىپقا كەلۋ پروتسەسى ءجۇرىپ جاتىر. 2025 جىلدىڭ سوڭى مەن 2026 جىلدىڭ باسىندا ناقتى دايىندىقتى باستايمىز, بۇيىرسا. دەسە دە, فورمامىزدى ساقتاۋ ءۇشىن كۇن سايىن جاتتىعۋ زالىنان تابىلامىز.
- ءۇش وليمپيادا قاتارىنان جوعارى دارەجەلى 3 مەدالدى قانجىعالاپ, «وليمپ شىڭىنان» كورىنۋ ءۇشىن سىزگە جىگەر بەرىپ, العا جەتەلەگەن قانداي كۇش؟
- مەن 5 جاسىمنان باستاپ دزيۋدومەن اينالىسىپ كەلە جاتىرمىن. بالا شاقتان جانىما جاقىن سپورتتان ناتيجە شىعارعىم كەلەدى. سپورتتىڭ شىڭىن باعىندىرعان تۇلعالاردىڭ ءار قادامىن ءاردايىم باقىلاپ وتىراتىنمىن. ۇقساپ باعۋعا تىرىستىق. چەمپيونداردىڭ جەڭىس جولىن زەرتتەدىم. جاتتىعۋ زالىندا جىلدار بويى تەر توگىلگەنى دە ءسوزسىز. تورتجىلدىقتىڭ ەڭ بيىك تۇعىرىندا تۇرۋ مارتەبەسى بۇيىرعان وسى جىلعا ريزامىن. دۇنيەدەگى باستى ماقساتىم - اتاق-دۇنيە جيناۋ ەمەس, ادام بولىپ قالۋ.
- جانىنا سپورتتى سەرىك ەتكەن ازاماتتىڭ ارمانىنا اينالعان وليمپيادا چەمپيونىن الداعى ۋاقىتتا مەملەكەتتىك مانساپ مىنبەرىنەن كورۋىمىز مۇمكىن بە؟
- قازىر مەنىڭ الدىمدا بۇل مازمۇنداعى ماقسات جوق. مەن ءالى دە سپورتتان الىستاماعانىم انىق. جاقسى كورەتىن دزيۋدومەن مۇمكىندىگىم بار تۇستا سارقىلماي, كىدىرمەي اينالىسقىم كەلەدى. قازىر جاسىم 32-دە, لوس-اندجەلەستەگى بايراقتى باسەكە كەزەڭىندە 35-36 جاستا بولامىز. پاريج وليمپياداسىندا 36 جاستاعى دەمەۋ جادىراەۆ قاعيدالاردى بۇزىپ, ءدۇبىرلى دودانىڭ فينالىندا باق سىنادى. الدىمىزدا وسىنداي ۇلگى بار. ءبىر قازاق شىققان بيىكتى, ەكىنشى قازاق تا ەڭسەرە الادى دەپ ويلايمىن. جاس – اۋىسىپ جاتقان جاي كورسەتكىش, تسيفر. مەن دە وسى قادام ارقىلى جاستارعا مۇمكىن ەمەس نارسە بولمايتىنىن دالەلدەپ, ولاردىڭ دا تالماي ەڭبەك ەتۋى ءۇشىن ستيمۋل بولعىم كەلەدى. سپورتتىق مانسابىمداعى جوعارى جەڭىسىمنەن كەيىن ەل ىشىندە دزيۋدوعا نازار ارتا ءتۇستى, ءتىپتى, كۇرەسپەن اينالىسۋدى توقتاتقان كەي ازاماتتاردىڭ بەلىن بۋىپ, جاتتىعۋ زالىنا ورالعان وقيعالاردى دا قۇلاعىمىز شالىپ جاتىر. باپكەرلەر بالدىرعان بالالار اراسىندا دزيۋدومەن اينالىسقىسى كەلەتىندەردىڭ قاتارى قالىڭداعانىن دا حاباردار ەتىپ جاتىر. قازاق تانىمدا «ەكى كەمەنىڭ باسىن ۇستاعان سۋعا كەتەدى» دەگەن اتالى ءسوز بار. سوندىقتان قازىر سپورتتان ىرگەمدى الىس سالمايمىن.
- ەلدوس, الداعى جىلدىڭ باسىندا لوندونعا اتتانباقسىز. قاي باعىتتا ءبىلىم الۋدى جوسپارلاپ وتىرسىز؟
- شەتەل اسىپ, وقۋعا اتتانۋىما اعىلشىن ءتىلىن مەڭگەرۋ ماقساتى تۇرتكى بولدى. قاڭتار ايىنان باستاپ لوندوندا 4 اي وقۋ, ءتىل ۇيرەنۋدى مەجەلەدىم. سەبەبى 2028 جىلى لوس-اندجەلەس وليمپياداسى كۇتىپ تۇر, 2027 جىلى ەلوردامىز دزيۋدودان الەم چەمپيوناتىن قابىلدايدى. ءىرى باسكەلەردە سپورتشىلارمەن تىلدەسىپ, تاجىريبە الماسۋدا اعىلشىن ءتىلىن ءبىلۋ جاڭا مۇمكىندىكتەرگە جول اشاتىنىنا سەنەمىن.
- ەلدوس باقتىباي ۇلى, اڭگىمەڭىزگە راقمەت!
