فوتو: ەرلان ومار
تۋريستىك قىزمەت كورسەتۋ, قالاداعى كەڭسە جانە كليەنتتىك بازا بويىنشا تاجىريبەسى بار قاراعاندى تۇرعىنى جشس قۇرىپ, ونى باسقارعان.
كليەنتتەرمەن تۋريستىك قىزمەت كورسەتۋگە شارت جاساسىپ, جاقىن جانە الىس شەتەلدەرگە ساپارعا شىعۋعا جولداما ساتقان.
وسىلايشا, جابىرلەنۋشىلەرمەن جاسالعان شارتتار بويىنشا جشس ديرەكتورى ولاردىڭ 24 ملن تەڭگەدەن استام اقشاسىن جىمقىرعان.
«2023 جىلدىڭ 4-10 تامىزى ارالىعىندا وتباسىمەن تۇركياعا دەمالۋعا ۇشۋعا شەشىم قابىلداعان استانا تۇرعىنى جشس شوتىنا 2,5 ملن تەڭگە اۋدارىپ, 5 ادامعا جولداما العان. اقىرى رەيستەرى تىركەلمەگەنىن جانە بروندالماعانىن بىلگەن ول قاراعاندىعا بارىپ, جشس ديرەكتورىمەن كەزدەسكەن. ديرەكتور اقشانى قايتارۋعا ۋادە بەرگەن, بىراق تەك 380 مىڭ تەڭگەسىن قايتارعان. جشس-دەن ونىڭ پايداسىنا 2,2 ملن تەڭگە ءوندىرۋ تۋرالى بەكىتىلگەن مەدياتسيالىق كەلىسىمگە قاراماستان, وعان قاتىستى ازاماتتىق تالاپ قويۋدى تولىق كولەمدە قاناعاتتاندىرۋدى تالاپ ەتكەن. سوتتالۋشىنىڭ الاياقتىق بويىنشا كىناسى قىلمىستىق ءىس ماتەريالدارىمەن, جابىرلەنۋشىلەردىڭ, كۋالاردىڭ ايعاقتارىمەن, اقشا اۋدارىلعانى تۋرالى مالىمەتتەرمەن, تۋروپەراتورلاردىڭ جاۋاپتارىمەن دالەلدەندى», دەلىنگەن حابارلامادا.
پروكۋرور سوتتالۋشىنى 6 جىلعا باس بوستاندىعىنان, 5 جىلعا بەلگىلى ءبىر قىزمەتپەن اينالىسۋ قۇقىعىنان ايىرۋدى سۇراعان. ال جابىرلەنۋشىلەر قاتاڭ جازا قولدانۋدى تالاپ ەتكەن.
سوتتالۋشى كىناسىن مويىنداماي, ءوزىن اقتاۋدى سۇراعان.
قىلمىستىق كودەكستىڭ 190-بابىنىڭ 3-بولىگىنىڭ سانكتسياسىندا مۇلكى تاركىلەنىپ, بەلگىلى ءبىر لاۋازىمدى اتقارۋ نەمەسە بەلگىلى ءبىر قىزمەتپەن اينالىسۋ قۇقىعىنان 6 جىلعا دەيىنگى مەرزىمگە ايىرا وتىرىپ نەمەسە ونسىز 3 جىلدان 7 جىلعا دەيىن شەكتەۋ نەمەسە باس بوستاندىعىنان ايىرۋ جازاسى قاراستىرىلعان.
قاراعاندى قالاسى, قازىبەك بي اۋداندىق سوتى الاياقتىق جاسادى دەپ ايىپتالعان سوتتالۋشىعا قاتىستى قىلمىستىق ءىستى قاراپ (قك-ءنىڭ 190-بابىنىڭ 3-بولىگى, 3,4-تارماقتارى), اسىراۋىندا قارت اتا-اناسىنىڭ بولۋىن جانە بۇرىن سوتتىلىعىنىڭ جوقتىعىن مويىندادى, اۋىرلاتاتىن ءمان-جايلار انىقتالماعان.
«سوتتالۋشى 4 جىل 6 ايعا باس بوستاندىعىنان, 3 جىلعا تۋريستىك قىزمەتپەن اينالىسۋ قۇقىعىنان ايىرىلدى. جابىرلەنۋشىلەردىڭ ازاماتتىق تالاپ قويۋلارى قاناعاتتاندىرىلدى», دەلىنگەن حابارلامادا.
سوتتىڭ ۇكىمى زاڭدى كۇشىنە ەنگەن جوق.
