ەلوردادان جول تارتقان پويىز جۇيتكىگەن كۇيى بۋرابايعا بارىپ ءبىر-اق توقتايدى. تۋريستىك پويىز اپتانىڭ سەيسەنبى مەن سارسەنبىدەن باسقا كۇندەرى كۇن سايىن قاتىنايدى. جاڭا ترانسپورت 574 جولاۋشىعا ارنالعان. جايلى ورىندىقتار «كومفورت +» ەۋروپالىق ستاندارتىنا سايكەس جاسالعان.
مەملەكەت باسشىسى ەلىمىزدە تۋريستىك سالانى دامىتۋ بويىنشا كۇش-جىگەردى جانداندىرۋدى, جاڭا مارشرۋتتار قۇرىپ, ينفراقۇرىلىمدى جاقسارتۋدى تاپسىرعان بولاتىن. بۇل تۇرعىدا جايلى ءارى زاماناۋي كولىك تۋريست تارتۋدا ۇلكەن مانگە يە. العاشقى ساپارىنا شىققان بۇل پويىز وسى باعىتتا اتقارىلعان جۇمىستاردىڭ ناتيجەسى. سالاتاناتتى شارا بارىسىندا «قتج» ۇك» اق باسقارما توراعاسىنىڭ ترانسفورماتسيا جانە تسيفرلاندىرۋ جونىندەگى ءبىرىنشى ورىنباسارى ءانۋار احمەتجانوۆ ۇلتتىق كومپانيا تۋريزم سالاسىن دامىتۋعا ۇلكەن ءمان بەرىپ وتىرعانى جونىندە اڭگىمەلەدى.
«بيىل الاكول تۋريستىك باعىتىندا ونداعان پويىزدى ىسكە قوستىق. ونداعى ۆاگونداردىڭ بارلىعى سالقىنداتقىش, اۋا باپتاعىشپەن قامتىلعان. سونىڭ ناتيجەسىندە بيىل تۋريستىك ورىندارعا باراتىن جولاۋشىلار تاراپىنان بىردە ءبىر ارىز-شاعىم بولعان جوق. ودان بولەك, وسى جىلدىڭ قاراشا ايىندا كولىك جانە تۋريزم كوميتەتتەرىنىڭ قولداۋىمەن الماتى – تۇركىستان – تاشكەنت باعىتىندا العاشقى تۋريستىك پويىزدى جولعا شىعاردىق. بۇل – تەمىرجول مەن تۋريستىك سالانىڭ بىرىگىپ جاساعان جوباسى. ونىڭ ەرەكشەلىگى سول – جولاۋشىلار تۇنگى ۋاقىتتا جول ءجۇرىپ, كۇندىز كورىكتى جەرلەردى تاماشالايدى. كەلەسى جىلدىڭ 2 قاڭتارىنان باستاپ تۋريستىك پويىز قايتادان جولعا شىعىپ, تولىققاندى بەس كۇندىك تۋر ۇيىمداستىرىلادى. بۇل جولى قالالار قاتارىنا سامارقاند تا قوسىلدى. وسىعان ۇقساس پويىز وزبەكستان تاراپىنان بىزگە قاراي باعىت الادى. كورشى ەل تۇرعىندارىنا دا ەلىمىزدىڭ مادەنيەتىمەن, كورىكتى جەرلەرىمەن تانىسۋىنا مۇمكىندىك تۋادى», دەيدى ءانۋار احمەتجانوۆ.
العاشقى ساپارىنا شىققان №7515/7516 تۋريستىك ەلەكتر پويىزى وتاندىق «زيكستو» زاۋىتىندا وندىرىلگەن. پويىز ساپا مەن قاۋىپسىزدىكتىڭ بارلىق زاماناۋي ستاندارتىنا ساي كەلەدى. جولاۋشىلاردىڭ جايلىلىعى ءۇشىن پويىزدا ميكروكليمات جۇيەسى, جىلدام قۋاتتاۋ ءۇشىن USB-روزەتكالار, ويىن-ساۋىق كونتەنتىنە قولجەتىمدى Wi-Fi جەلىسى جانە ۆەلوسيپەدتەرگە ارنالعان بەكىتكىشتەر ورناتىلعان. مۇمكىندىگى شەكتەۋلى جولاۋشىلارعا ارنايى كوتەرگىشتەر مەن ارباعا ارنالعان ورىندار قاراستىرىلعان. ەلەكتر پويىز 6 زاماناۋي ۆاگوننان تۇرادى. جوبانى «ونەركاسىپتى دامىتۋ قورى» اق قارجىلاندىردى.
تۋريستىك پويىزدىڭ ديزاينى استانانىڭ كورىكتى جەرلەرى مەن بۋرابايدىڭ اسەم تابيعاتىن بەينەلەيدى. جوبانى جۇزەگە اسىرۋ ماقساتىندا «قتج» ۇك» اق, كولىك مينيسترلىگى, تۋريزم جانە سپورت مينيسترلىگى, استانا مەن اقمولا وبلىسى اكىمدىكتەرى, سونداي-اق «Visit Aqmola» مەن «استانا دامۋ ورتالىعى» جشس بىرلەسە جۇمىس ىستەگەن.
جاڭا پويىزدىڭ بيلەت قۇنى «نۇرلى جول» ستانساسىنان – 2 770 تەڭگە, «استانا» ستانساسىنان – 2 548 تەڭگە.
