«اسسامبلەيا قۇراماسى» – ساحنادا مەملەكەتتىك تىلدە عانا ونەر كورسەتەمىز دەگەن ماقساتپەن قۇرىلعان. بۇل – اسسامبلەيانىڭ «مەملەكەتتىك ءتىل – ەتنوسارالىق قاتىناس ءتىلى» جوباسىنىڭ ءبىر بولىگى.
ءتۇرى باسقا بولعانىمەن ءتىلى ءبىر, تىلەگى ورتاق ەتنوس وكىلدەرىنەن قۇرالعان كوماندانىڭ قاتارىندا وزبەك, كورەي, سلاۆيان جانە قىرعىز جاستارى بار. ولار ءبىر ساحنادا قوعامداعى تۇيتكىلدى ماسەلەلەردى استارلى ازىلمەن جەتكىزەدى. ونەرپازدارى – ەلىمىزدىڭ ءار وڭىرىنەن جينالعان جاستار.
«اسسامبلەيا قۇراماسى» كومانداسىنىڭ كاپيتانى رەتىندە «قازاقستان كۆن وداعى» رەسپۋبليكالىق جاستار قوعامدىق بىرلەستىگىنىڭ استانا قالاسى كۆن وكىلدىگىنىڭ باسشىسى فۋرحات كۋربانوۆتىڭ تاڭدالۋى دا بەكەر ەمەس. قايبىر ءىستى باستاۋدىڭ وزىندىك قيىندىعى بار. وزىنە ارتقان ءۇمىتتى اقتاعان فۋرحات كۋربانوۆ ىسكەرلىگىمەن كوزگە ءتۇسىپ, اسسامبلەيانىڭ قۇراماسىن جاساقتاۋعا اتسالىسىپ كەلەدى. ول جان-جاقتان كوزگە ءتۇسىپ جۇرگەن قابىلەتتى جاستاردى كومانداعا شاقىرىپ, ءبىر شاڭىراق استىنا جينادى, ءالى دە تالانتتى قىز-جىگىتتەردى ىرىكتەپ, جول سىلتەپ ءجۇر.
«استانادان دەنيس رومانوۆ, راحات باتىرحان, قىزىلوردادان ءالىبي باساروۆ, اقتاۋدان اندرەي پەرەدەلسكي, جەتىسۋدان ەكاتەرينا پودگورنوۆا, تۇركىستاننان بەكسۇلتان جولدىقوجاەۆ «اسسامبلەيا قۇراماسىنىڭ» ايناسىنا اينالدى. ونەرىمەن قاتار بارلىعى دا مەملەكەتتىك ءتىلدى جەتىك مەڭگەرگەن. ەڭ باستىسى قۇرمەتپەن قارايدى. وسى قاسيەتتەرى كوماندانى العا جەتەلەپ, وزگەلەردەن ەرەكشەلەندىرىپ تۇرادى», دەيدى كوماندا كاپيتانى.
ءاربىر جەڭىس پەن قۋانىشقا كوماندا مۇشەلەرىنىڭ ۇلەسى بار. كوماندانىڭ جەتەكشىسى ءالىبي باساروۆ قىزىلوردا وبلىسى قوعامدىق دامۋ باسقارماسى «جاستار رەسۋرستىق ورتالىعىنىڭ» ديرەكتورى بولا ءجۇرىپ, ءاربىر ويىنعا جاناشىرلىقپەن قاتىسىپ, بارىن سالىپ وينايدى. ساحنادا 15 جىلدىق تاجىريبەسى بار ونەرپازدىڭ «اسسامبلەيا قۇراماسىنا» كەلۋى دە كەزدەيسوقتىق ەمەس.
«كۇلكى ءومىردىڭ ءبىر بولشەگى عوي. اسىرەسە ول قوعامداعى كۇردەلى ماسەلەلەردى ازىلمەن بەرە بىلسە... دەگەنمەن ول شەبەرلىك پەن جوعارى بىلىكتىلىكتى قاجەت ەتەدى. ەڭ باستىسى كۇلدىرەمىن دەپ ءبۇلدىرىپ الماۋ كەرەك», دەيدى ءا.باساروۆ.
ال «Spectrum حالىقارالىق مەكتەبىنىڭ» قازاق ءتىلى مۇعالىمى قىزمەتىن اتقاراتىن دەنيس رومانوۆ وقۋشى كەزىندە «مىڭ ءبىر ەل» ءىس-شاراسى اياسىندا ەتنوس وكىلدەرى اراسىندا «جايدارمان» ويىنى ءوتىپ, سول باسەكەدە ۇزدىك ويىنشى اتانادى. كوزگە تۇسكەن تالانتتى جىگىتتى بىردەن «اسسامبلەيا قۇراماسى» شاقىرادى.
«مەنىڭ ءومىرىم كوڭىلدى تاپقىرلار كلۋبىمەن بايلانىستى سەكىلدى. 10-سىنىپتا العاش رەت كوڭىلدى تاپقىرلار كلۋبىندا وينادىم. سودان بەرى قول ۇزگەن ەمەسپىن. 2019-2024 جىلدار ارالىعىندا پاۆلودار ءبىلىم-يننوۆاتسيا ليتسەيىندە ەڭبەك ەتىپ جۇرگەنىمدە وقۋشىلاردان كوماندا جيناپ, ولاردىڭ اۆتورى-جەتەكشىسى بولدىم. وسى جىلى «Spectrum» مەكتەبىندە ءتۇرلى ەتنوستاردان قۇرالعان كوماندا جاساقتادىم. ولار ايماقتىق كوڭىلدى تاپقىرلار ليگاسىندا ونەر كورسەتتى», دەيدى ءوز جەتىستىكتەرىمەن بولىسكەن د.رومانوۆ.
كومانداداعى «ارپا ىشىندەگى ءبىر بيداي», ساحنالىق لاقاپ اتى «سارى قىز» اتانىپ كەتكەن ەكاتەرينا پودگورنوۆا – تالدىقورعان قالاسىنىڭ تۋماسى. قازىر ءىلياس جانسۇگىروۆ اتىنداعى جەتىسۋ ۋنيۆەرسيتەتى جانىنداعى كوللەدج ستۋدەنتى. 2022 جىلى جەزقازعان قالاسىندا وتكەن «جايدارمان» ويىندارىندا جەتىسۋ وبلىسىنىڭ «اسسامبلەيا جاستارى» مۇشەلەرى ءبىرىنشى ورىن الادى. «سارى قىز» سول ويىندا كوزگە ءتۇسىپ, «اسسامبلەيا قۇراماسىنا» قابىلدانادى.
«مەن جەتىسۋ وبلىسىنداعى كىشكەنە عانا اباي اۋىلىندا ءوستىم. قازاق مەكتەبىندە وقىدىم, دوستارىم, كورشىلەرىم, تانىستارىم تۇگەل قازاقتار بولدى. سوندىقتان مەنىڭ قازاقشا سويلەمەۋىم مۇمكىن ەمەس ەدى», دەيدى ە.پودگورنوۆا مەملەكەتتىك تىلگە دەگەن سۇيىسپەنشىلىگىن ءبىلدىرىپ.
قۇراما ىشىندە «مالوي» ساحنالىق ءازىل اتىمەن تانىلعان اندرەي پەرەدەلسكيدىڭ دە وزىندىك ورنى مەن كورەرمەنى بار.
«قازاق ءتىلىنىڭ ازىلدەسۋگە ىڭعايلى ءسوز ورامدارى جەتەرلىك. ماعان ساحنادا ويناۋ دا, كورەرمەندى كۇلكىمەن قۋانتۋ دا ۇنايدى», دەيدى ول.
الدا تالاي الامان بار. «جايدارمان» ۇزدىكتەرى «اسسامبلەيا قۇراما» كومانداسىنىڭ قاتارىن تولىقتىرۋدى جوسپارلاپ وتىر. «ەل ءىشى – ونەر كەنىشى» دەگەن ماتەلدى نەگىزگە العان كوماندا وڭىرلەرگە شىعىپ, تالانتتى جاستار اراسىندا ويىندار ۇيىمداستىرىپ, بولاشاق كوماندا مۇشەلەرىن ىرىكتەمەك.
ء«ازىل الەمىنە ۇكىلەپ دارابوزدارىن قوسقان اسسامبلەيا مەملەكەتتىك ءتىلدى ەتنوس وكىلدەرى اراسىندا دامىتۋعا كۇش سالا بەرەدى. ال «اسسامبلەيا قۇراماسىنىڭ» جەڭىستى دە جەمىستى كۇندەرى ءالى الدا!», دەيدى كوماندا جەتەكشىسى ءا.باساروۆ.
راسىندا, كۇلكىنىڭ قوعام ومىرىندە اتقارار پايداسى كوپ. ماسەلەن, قازىرگى ۋاقىتتا ازىلقويلار مەن تاپقىرلاردىڭ ورداسىنا اينالعان «جايدارمان» ناعىز جاس دارىندىلاردىڭ مەكەنى بولىپ كەلەدى. جوبا جاستار اراسىندا كرەاتيۆتى پلاتفورمالاردىڭ بىرىنە اينالعان.
