فوتو: ult.kz
دەپۋتاتتىڭ ايتۋىنشا, جىلجىمالى قۇرامدى جاڭارتۋ قارقىنى ونىڭ قىزمەت ەتۋ مەرزىمى مەن تەحنيكالىق جاي-كۇيى بويىنشا پايدالانۋدان شىعىپ قالۋ قارقىنىنا ىلەسە الماي وتىر.
«2014 - 2023 جىلدار كەزەڭىندە 928 جاڭا جولاۋشى ۆاگونى كەلىپ تۇسسە, فيزيكالىق تۇرعىدان توزۋ سەبەبىنە بايلانىستى 969 ۆاگون پايدالانۋدان شىققان (ونىڭ ىشىندە
2020 - 2023 جىلدار كەزەڭىندە 319 بىرلىك كەلىپ تۇسكەن بولسا, 412 بىرلىك پايدالانۋدان شىعارىلعان). ارينە, مۇنىڭ ءبارى تەمىرجول كولىگىن دامىتۋدىڭ نەگىزگى كورسەتكىشتەرىنە اسەر ەتەدى. سونىمەن قاتار, تەمىرجول جەلىلەرىنىڭ – 54 %-عا, لوكوموتيۆتەردىڭ – 61 %-عا, ۆاگونداردىڭ – 56 %-عا جوعارى دارەجەدە توزۋى بايقالادى. قاناعاتتانارلىقسىز دەپ باعالانعان جولدار ۇزىندىعىنىڭ ۇلەسى جىل سايىن ارتىپ كەلەدى (2020 جىلى – جالپى ۇزىندىقتىڭ 16 %-ى, 2023 جىلى – 28 %-ى)», دەدى ن.سابيليانوۆ.
تەمىرجول قۇرىلىسى سالاسىندا پرەزيدەنتتىڭ تاپسىرماسى بويىنشا 4 ءىرى تەمىرجول جوباسى ىسكە اسىرىلىپ جاتىر. ولار: «دوستىق – مويىنتى», «باقتى – اياگوز», «داربازا – ماقتاارال» جانە الماتى قالاسىن اينالىپ وتەتىن تەمىرجول جەلىسى. ن.سابيليانوۆ بۇگىنگى تاڭدا 3 جوبا بويىنشا بەلگىلەنگەن مەرزىمدە جۇمىستار جۇرگىزىلىپ جاتقانمەن, حالىقارالىق تاسىمالدا اسا زور ماڭىزعا يە «باقتى – اياگوز» باعىتىنداعى تەمىرجولدىڭ قۇرىلىسى باياۋ ەكەنىن تىلگە تيەك ەتتى.
«ۇزىندىعى 297 كم بولاتىن ماڭىزدى ينفراقۇرىلىمدىق تەمىرجول جوباسىنىڭ ءبىرى «باقتى – اياگوز» جوباسىنىڭ قۇرىلىسى وتە باياۋ, وندا گەولوگيالىق جۇمىستاردى باستاۋعا دايىندىق قانا جۇرگىزىلۋدە. بۇل جوبانىڭ ماڭىزى وتە زور, ويتكەنى ول قىتاي مەن قازاقستان اراسىنداعى وتكىزۋ قابىلەتىن قوسىمشا 20 ملن. تونناعا ارتتىرۋعا مۇمكىندىك بەرەدى. سوندىقتان وسى جوبانىڭ قۇرىلىس قارقىنىن جەدەلدەتىپ, ونى بەلگىلەنگەن مەرزىمدە اياقتاۋ جونىندە شارالار قابىلداۋ قاجەت», دەدى دەپۋتات.
