حالىقارالىق دزيۋدو فەدەراتسياسى (IJF) جاڭا وليمپيادالىق ماۋسىمعا ارنالعان ەرەجەلەردىڭ جاڭارتىلعان نۇسقاسىن جاريالادى. بۇل وزگەرىستەر سپورتشىلاردىڭ الەۋەتىن اشىپ, دزيۋدونىڭ نەگىزگى قۇندىلىقتارىن ساقتاي وتىرىپ, ونىڭ دامۋ دەڭگەيىن جاڭا بيىككە كوتەرۋگە ارنالعان.
تەحنيكالىق سەميناردىڭ قورىتىندىسى بويىنشا «يۋكو» ۇپايى, بەلدەن تومەن ۇستاۋ جانە «ايۋشا» ۇستاۋ ءادىسى قايتارىلدى. دەگەنمەن, ەرەجەلەر قولدانىسقا ەنگەندە سپورتشىلاردىڭ جاڭا قاعيدالارعا بەيىمدەلۋى ءبىراز ۋاقىتتى الارى ءسوزسىز. بۇل تۋرالى دزيۋدودان قازاقستان ۇلتتىق قۇراماسىنىڭ باس باپكەرى نۇربول سۇلەيمەنوۆ ءوز پىكىرىن ءبىلدىردى.
«ەرەجەلەر جاقسى جاققا وزگەرگەن. بارلىق ءادىس-تاسىلدەردىڭ قايتا ەنگىزىلۋىن دۇرىس دەپ ەسەپتەيمىن. دەگەنمەن, «يۋكو» ۇپايى كەرەك ەمەس سەكىلدى. ۆازاري مەن يپپوننىڭ ءوزى جەتكىلىكتى بولار دەپ ويلايمىن. ارينە, باستاپقى ۋاقىتتا جاڭا قاعيدالار سپورتشىلارعا قيىندىق تۋعىزارى انىق. دەگەنمەن باپكەرلەر شتابى وسى ەرەجەلەرگە ساي جاتتىعۋ جيىندارىن وتكىزەدى. بالۋانداردىڭ بەيىمدەلۋىنە بار كۇش جىگەرىمىزدى سالامىز», دەيدى باس باپكەر.
ەكى كۇندىك سەمينار قورىتىندىسى بويىنشا جوعارىدا اتالعان ەرەجەلەر 2025 جىلدان باستاپ قولدانىسقا ەنەدى.
