«Kazunite» كومپانياسىنىڭ «تۇلعا ينجەنەرياسى» جوباسى شەڭبەرىندە جارىققا شىققان جۋرنال 6-12 جاس ارالىعىنداعى بالالارعا ارنالعان ەكەن.
بالالاردىڭ ويلاۋ جۇيەسىن دامىتىپ, ءوزىن جانە ءومىردى تۇسىنۋگە, ايقىن ماقساتتار قويا بىلۋگە جانە سوعان ۇمتىلۋعا باۋليتىن موتيۆاتسيالىق اڭگىمەلەر مەن پسيحولوگيالىق جاتتىعۋلار قامتىلعان ەڭبەك «مەنىڭ ارماندارىم» دەپ اتالادى. جۋرنالدى قولىنا العان بالا ءوزىنىڭ ارمان-ماقساتىن جازىپ, بەرىلگەن سۇراقتارعا جاۋاپ بەرە وتىرىپ, تاپسىرمالاردى بويايدى.
اۆتورلارى وتاندىق جۋرناليستيكا سالاسىندا وزىندىك ورنى بار, بىرنەشە تانىمدىق كىتاپتاردىڭ اۆتورى, بۇگىندە اقش-تا ءبىلىمىن جالعاستىرىپ جۇرگەن تانىمال جۋرناليست ءنازيرا بايىربەك پەن «استانا اقشامى» گازەتىنىڭ شولۋشىسى گۇلميرا ايماعانبەت.
«جۋرنالدى دايىنداعان ەكى اۆتور, ءبىرىمىز – قازاقستاندا, ءبىرىمىز – امەريكادا ءجۇرىپ, جۇمىس ىستەپ, وقىپ, ءوزىمىزدى دامىتىپ ءجۇرىپ, قازاقتىڭ بوتاقاندارى دا قازىرگىدەن دە دامىعان, جاقسى ومىرگە لايىق بولسا دەپ وسى جۋرنالدى اق تىلەكپەن دايىندادىق. جۋرناليستيكادا 20 جىلداي قىزمەت ەتىپ, الەم ەلدەرىنىڭ ءبىرازىن كورىپ, ءبىرىمىز 5, ءبىرىمىز 6 بالا ءوسىرىپ, «قالاي بالالارىمىزدى مىقتى ادام ەتىپ وسىرسەك ەكەن؟» دەگەن سۇراقپەن 20 جىلداي ىزدەنگەن انامىز. جۋرنالدى دامىعان ەلدەردەگى جوعارى دەڭگەيلى قوعامعا لايىق بالا تاربيەلەۋ تاجىريبەلەرىن كورىپ وتىرىپ, جاسادىق. وعان, البەتتە ءوز بالالارىمىزعا قولدانعان ەكسپەريمەنتتەر ۇلەس قوستى», دەيدى اۆتورلار.
