«التىن قالام» بايقاۋىنان قاناتتانعان قانشاما اقىن-جازۋشىلار وقىرمانعا تانىلىپ, توپجارعان تۋىندىلار ۇلت ادەبيەتىنىڭ وزىق شىعارمالارىنىڭ قاتارىنا قوسىلىپ كەلەدى. ەلىمىزدىڭ جاس دارىندارى مەن جاڭا ەسىمدەرىن قالىڭ جۇرتقا تانىستىرۋعا سەپتىگىن تيگىزىپ كەلە جاتقان بايقاۋ بيىل نۇرلان سماعۇلوۆ قورىنىڭ قولداۋىمەن ءوتتى.
مەرەيلى داتاعا تۇسپا-تۇس كەلگەن بايقاۋعا 115 اۆتوردان 202 شىعارما كەلىپ تۇسكەن. ءوز كەزەگىندە وقىرماندار وزىنە ۇناعان تۋىندىعا ونلاين تۇردە داۋىس بەرگەن. بايگە قورىتىندىسىنا سايكەس, «جىلدىڭ ۇزدىك بالالار شىعارماسى» اتالىمىندا نۇربەك نۇرجان ۇلى, «جىلدىڭ ۇزدىك پوەزياسى» اتالىمىندا التىنبەك مەرسادىق, «جىلدىڭ ۇزدىك پروزاسى» اتالىمىندا بەكەن ىبىرايىم, «جىلدىڭ ۇزدىك ساتيراسى» اتالىمىندا اسحات ومىرباەۆ, «جىلدىڭ ۇزدىك فانتاستيكا جانە دەتەكتيۆ شىعارماسى» اتالىمىندا باقىت جاماليەۆا, «جىلدىڭ ۇزدىك كينوستسەناريى جانە دراماتۋرگياسى» اتالىمىندا شاريديار ءۋاليحانوۆ جەڭىمپاز اتاندى.
ۇيىمداستىرۋشىلار القاسى بايگەدە باعى جانعان ۇزدىكتەرگە ەستەلىك سىيلىقتار مەن اقشالاي سىياقى تابىستادى. جەڭىمپازدار اراسىنان 1 ملن تەڭگەلىك باس جۇلدە «ۋران كەنىشى» اتتى تۋىندىسى ءۇشىن بەكەن ىبىرايىمعا بۇيىردى. بۇعان قوسا, جىل سوڭىندا قاتىسۋشىلاردىڭ ۇزدىك ادەبي شىعارمالارى جەكە جيناق تۇرىندە وقىرمانعا جول تارتپاق.
«ادەبيەت – ۇلتتىڭ جانى. قازىرگى جاعدايدا قالامگەرلەردىڭ شىعارماشىلىعىن ىنتالاندىرىپ, ءتۇرلى تۋىندىلاردىڭ ساپاسى مەن دەڭگەيىن ىرىكتەيتىن وسىنداي بايقاۋلار مىندەتتى تۇردە قاجەت. بۇل بايقاۋدىڭ ءبىر ەرەكشەلىگى كوپشىلىككە بەلگىسىز جاس جازۋشىلاردىڭ اتىن شىعارىپ, ولارعا مەتاريالدىق جانە مورالدىق قولداۋ كورسەتۋىندە. سوندىقتان دا ءبىز «التىن قالام» بايقاۋىنىڭ ۇيىمداستىرۋشىلارى مەن قولداۋشىلارىنا العىسىمىزدى جەتكىزەمىز», دەدى بايقاۋ لاۋرەاتى بەكەن ىبىرايىم.
ايتا كەتۋ كەرەك, «التىن قالام» – ۇسىنىلعان تۋىندىلارعا تاعايىندالعان قازىلار ەمەس, وقىرمان قاۋىم وزدەرى تىكەلەي باعا بەرە الاتىن قازاقستانداعى العاشقى ادەبي جۇلدە. وسى ورايدا شاراعا قولداۋ بىلدىرگەن نۇرلان سماعۇلوۆ قورىنىڭ ديرەكتورى ايدىن سۇلتانوۆ: «كىتاپ بۇل رۋxاني بايلىقتىڭ كىلتى. كىتاپ وقىعان ادام ءبىلىم كوكجيەگى كەڭ, ءتىلى باي, مادەنيەتتى, جان-جاقتى جانە پىكىرىن ەركىن جەتكىزە الىتىنى بەلگىلى. جالپى جاقسى كىتاپ وقۋ ومىردە جەكە تۇلعا بولىپ قالىپتاسۋعا كومەكتەسەدى. سوندىقتان دا ءبىز وسى باعىتتاعى «التىن قالام» سەكىلدى مادەني-اعارتۋشىلىق باستامالاردى قاشاندا قولدايمىز», دەپ اتاپ ءوتتى.
ءۇش ايعا سوزىلعان داۋىس بەرۋ قورىتىندىسىنا ساي ءار اتالىم بويىنشا التى شىعارما تاڭداپ الىنىپ, وقىرماندار تاراپىنان ەڭ كوپ ۇپاي جيناعان شىعارمالار جانە قازىلار نازارىنا ىلىنگەن تۋىندىلار سايىستىڭ ەكىنشى كەزەڭىنە وتكەن. اقتىق ىرىكتەۋ ساتىسىندا قازىلار القاسى ءاربىر نوميناتسيا بويىنشا جەڭىمپازداردى جاسىرىن داۋىس بەرۋ ارقىلى انىقتاعاندارىن ايتادى.
«سايىس بارىسىندا ادەبي شىعارمالاردىڭ اۆتورلارى كورسەتىلگەن جوق. بۇل بايقاۋدىڭ بارىنشا ءادىل وتۋىنە سەپتيگىن تيگىزەدى. مەملەكەت باسشىسى: «كىتاپ وقۋ – رۋحاني كەمەلدەنۋدىڭ كوزى. قازىرگى ۋاقىت – سەكۋند سايىن جاڭارعان اقپارات زامانى. التىن ۋاقىتىمىزدى پايدالى ىستەرگە جۇمساعانىمىز ءجون», دەپ كوپشىلىكتى كىتاپ وقۋعا ىنتالاندىرۋ كەرەك ەكەنىن سونداي-اق, قازاق ءتىلىن دامىتۋ ارقاشان مەملەكەتتىك ساياساتتىڭ باسىم باعىتى بولىپ قالا بەرەتىنىن اتاپ وتكەن ەدى. «التىن قالام» ادەبي بايقاۋى بۇل باستامانى بارىنشا قولدايدى. سوندىقتان بيىل ءبىز قازاق ءتىلدى اۆتورلاردىڭ شىعارمالارىن كوپكە تانىستىرۋدى ءجون كوردىك. ونەردىڭ ىشىندەگى ەڭ ءبىر قادىرلى دە قاسيەتتىسى – كوركەم ادەبيەت. قازاق ادەبيەتىنىڭ تۇعىرىن بيىكتەتە تۇسەتىن وسىنداي ىزگى شارالار كوبەيە بەرسىن», دەيدى ادەبي بايقاۋدى ۇيىمداستىرۋشىلاردىڭ ءبىرى كەنجە جۇمان ۇلى.
الماتى
