سۋرەت: alm.kgd.gov.kz
ءار سىبايلاس جەمقورلىق ارەكەتىنىڭ جاۋاپسىز قالمايتىنىن ءاربىر قىزمەتكەردىڭ ءبىلۋى ءبىز ءۇشىن ماڭىزدى. ءبىز سىبايلاس جەمقورلىققا قارسى كومپلاەنس-قىزمەتتى ەنگىزىپ, مۇددەلەر قاقتىعىسىن بولدىرماۋعا جانە سىبايلاس جەمقورلىق تاۋەكەلدەرىن بارىنشا ازايتۋعا باعىتتالعان ىشكى ساياساتتى ازىرلەدىك. تەرەڭ تالداۋ جۇرگىزىپ, ناتيجەسىندە سىبايلاس جەمقورلىق كورىنىستەرىنىڭ ىقتيمالدىلىعى جوعارى لاۋازىمدار ءتىزىلىمىن قۇرىپ, سىبايلاس جەمقورلىققا قارسى نورمالاردىڭ ساقتالۋىن ۇنەمى قاداعالايتىن جانە ادالدىق مادەنيەتىن نىعايتۋعا كومەكتەسەتىن كومپلاەنس-وفيتسەرلەر لاۋازىمدارىن ەنگىزدىك.
تجم جۇيەسىندەگى سىبايلاس جەمقورلىققا قارسى كۇرەس تەك ارنايى قىزمەتتەردىڭ ءىسى عانا ەمەس, سونداي-اق ءاربىر باسشىنىڭ جەكە جاۋاپكەرشىلىگى ەكەنىن اتاپ وتكىم كەلەدى. جەكە جاۋاپكەرشىلىك قاعيداتىنا سايكەس قىزمەتكەرلەر اراسىنداعى كەز كەلگەن سىبايلاس جەمقورلىق كورىنىستەرى ءۇشىن جۇمىستان شىعارۋعا دەيىنگى ەڭ قاتاڭ شارالار قولدانىلۋى مۇمكىن. وسىنى ارىپتەستەرىمىزدىڭ ءتۇسىنۋى ماڭىزدى: ادالدىق پەن اشىقتىق – جۇمىسىمىزدىڭ نەگىزى.
2023 جىلى سىبايلاس جەمقورلىققا قارسى قىزمەتپەن بىرلەسە وتىرىپ, ۆەدومستۆو «Integrity check» جوباسىن – قىزمەتكەرلەردىڭ پاراساتتىلىعىن تەكسەرۋ جۇيەسىن باستادى. بۇل جوبا پروفيلاكتيكا مەن ءار قىزمەتكەرگە نازار اۋدارۋ جاعىمسىز قۇبىلىستاردىڭ الدىن الۋعا كومەكتەسەتىنىن دالەلدەپ, وڭ ناتيجە كورسەتتى. تەك 2023 جىلى پارا بەرۋ ارەكەتتەرى تۋرالى 45 حابارلاما كەلىپ ءتۇستى جانە بۇل جاعدايلاردىڭ بارلىعى ودان ءارى تەرگەپ-تەكسەرۋ ءۇشىن سىبايلاس جەمقورلىققا قارسى قىزمەتكە جىبەرىلدى.
بيىل بۇل باعىتتاعى جۇمىستى جالعاستىردىق. 1 200-دەن اسا ءىس-شارا, ونىڭ ىشىندە قىزمەتكەرلەردىڭ تۇزەۋ مەكەمەلەرىنە بارۋى ۇيىمداستىرىلدى. بۇل جەردە ولار سىبايلاس جەمقورلىقتىڭ سالدارىن ءوز كوزىمەن كورە الدى. قىزمەتكەرلەرىمىزدى سىبايلاس جەمقورلىق ىستەرى بويىنشا سوت ءىسىن جۇرگىزۋگە بەلسەندى تۇردە تارتامىز, وسىلايشا ولار ءىس جۇزىندە وسى ز ۇلىمدىقپەن كۇرەسۋدىڭ ماڭىزدىلىعىن كورەدى.
تجم كورسەتەتىن بارلىق 12 مەملەكەتتىك قىزمەت ەندى «ە-ليتسەنزيالاۋ» پورتالى ارقىلى ەلەكتروندىق فورماتتا قولجەتىمدى. بۇل شەشىم قىزمەتكەرلەر مەن ءوتىنىش بەرۋشىلەر اراسىنداعى جەكە بايلانىستاردى بولدىرمايدى, ءوز كەزەگىندە سىبايلاس جەمقورلىق تاۋەكەلدەرىن ازايتادى.
سونىمەن قاتار باقىلاۋ جانە قاداعالاۋ ۇدەرىستەرىن اۆتوماتتاندىرۋ جۇمىسى جالعاسىپ جاتىر. «Smart Data Ukimet» پلاتفورماسى پروفيلاكتيكالىق تەكسەرۋلەر ءۇشىن وبەكتىلەر ءتىزىمىن جاساۋ كەزىندە ادام فاكتورىنىڭ اسەرىن جويادى, بۇل ۇدەرىستى اشىق جانە وبەكتيۆتى ەتەدى.
ءورت باقىلاۋ سالاسىنداعى جۇمىستىڭ اشىقتىعىن ارتتىرۋ ءۇشىن دەپارتامەنتتەردى ۆيدەو تىركەۋ قۇرىلعىلارىمەن جابدىقتادىق. بۇل قىزمەتكەرلەردىڭ كەز كەلگەن بۇزۋشىلىقتارى مەن ءىس-ارەكەتتەرىن ناقتى ۋاقىتتا تىركەۋگە مۇمكىندىك بەرەدى. قازىرگى ۋاقىتتا 1 142 ۆيدەو تىركەۋ قۇرىلعىسىن ساتىپ الدىق. بۇل ستاندارتتاردىڭ ساقتالۋىن باقىلاۋدى ەداۋىر جاقسارتادى.
جۇمىسىمىزدىڭ العاشقى ناتيجەلەرى قازىردىڭ وزىندە بايقالىپ جاتىر. 2024 جىلدىڭ 10 ايىندا ءبىز سىبايلاس جەمقورلىق قۇقىق بۇزۋشىلىقتار سانىنىڭ 20 جاعدايدان 7-گە دەيىن ايتارلىقتاي تومەندەۋىنە قول جەتكىزدىك.
جۇيەدەگى سىبايلاس جەمقورلىقتى جويۋعا بولاتىنىنا سەنىمدىمىن. ءبىز ادال جانە اشىق جۇمىس ىستەيمىز. شىنىندا دا قاتاڭ باقىلاۋ مەن جالپى شەشىمنىڭ ارقاسىندا ازاماتتاردىڭ قاۋىپسىزدىگى مەن سەنىمىن قامتاماسىز ەتە الامىز, ال جۇمىسىمىز باسقا سالالاردا ۇلگى بولادى.
شىڭعىس ءارىنوۆ,
توتەنشە جاعدايلار ءمينيسترى, گەنەرال-مايور
