جىل سايىنعى «اسكەر تارلانى» بايقاۋى اسكەري قىزمەتشىلەردىڭ شەبەرلىگىن جەتىلدىرۋگە, جاۋىنگەرلىك تاجىريبەنى تاراتۋعا جانە ارميانىڭ ءيميدجىن ارتتىرۋعا باعىتتالعان. ماراپاتتاۋ راسىمىندە گەنەرال-پولكوۆنيك رۋسلان جاقسىلىقوۆ قارۋلى كۇشتەر ءۇشىن 2024 جىل كوپتەگەن ماڭىزدى وقيعامەن ەرەكشەلەنگەنىن مالىمدەدى. ولاردىڭ قاتارىندا مينيستر بۇۇ-نىڭ بىتىمگەرلىك ميسسياسىن ءوز بەتىنشە ورنالاستىرۋعا جانە ورىنداۋعا ماندات الۋىن, سونداي-اق اسكەري قىزمەتشىلەردىڭ كوكتەمگى سۋ تاسقىنىنا قارسى كۇرەسكە قاتىسۋىن اتاپ ءوتتى.
– بۇگىن ءبىز ءداستۇرلى «اسكەر تارلانى» بايقاۋىنىڭ قورىتىندىسى بويىنشا ۇزدىك مامانداردى ماراپاتتاپ وتىرمىز. اسكەري شەبەرلىك فلاگماندارىن باعالاۋ كەزىندە جاۋىنگەرلىك جانە مەملەكەتتىك-قۇقىقتىق دايىندىق بويىنشا اي سايىنعى ساباقتاردىڭ ناتيجەلەرى, باقىلاۋ جانە قورىتىندى تەكسەرۋلەردىڭ قورىتىندىلارى, وقۋ-جاتتىعۋلارعا, ءتۇرلى كونكۋرستارعا قاتىسۋ, اسكەري ءتارتىپ جانە مورالدىق-ىسكەرلىك قاسيەتتەرى ەسكەرىلدى, – دەدى قورعانىس ءمينيسترى.
جارىس قورىتىندىسى بويىنشا دەسانتتىق-شابۋىلداۋ اسكەرلەرى كوماندالىق پۋنكتىنىڭ قىزمەت باستىعى پودپولكوۆنيك نۇرجان قۇلمانجانوۆ «ۇزدىك جەدەل كەزەكشى» اتاندى. اتالعان وفيتسەر جۇكتەلگەن تاپسىرمالاردى ورىنداۋعا جاۋاپتىلىعىمەن ءوز ءىسىنىڭ ۇزدىگى دەپ تانىلىپ وتىر.
27943 اسكەري ءبولىمى بارلاۋ روتاسىنىڭ بولىمشە كومانديرى سەرجانت رۋسلان ماقسۇت «جاۋىنگەرلىك ماشينانىڭ ۇزدىك كومانديرى» اتاندى. ول باسقارعان ەكيپاج «ايبالتا-2024», «دوستارىم-2023» وقۋ-جاتتىعۋلارىندا ۇيلەسىمدى ءارى ناتيجەلى قيمىل جاساي الدى.
ال «ارتيللەريالىق ەسەپتوپتىڭ ۇزدىك كومانديرى» اتاعىنا 28738 اسكەري ءبولىمىنىڭ اسكەري قىزمەتشىسى اعا سەرجانت ەركەبۇلان تىلەۋكەن يە بولدى. ول باسقارعان اسكەري بولىمشە اتىس كەزىندە ارقاشان جوعارى ناتيجەلەرگە قول جەتكىزىپ كەلەدى.
31775 اسكەري ءبولىمى جاياۋ اسكەر جاۋىنگەرلىك ماشيناسىنىڭ مەحانيگى سەرجانت ديدار مۋسين «تەمىر تۇلپار جۇرگىزۋشى» اتالىمى بويىنشا جەڭىمپاز اتاندى. ەكى جاقتى شتابتىق وقۋ-جاتتىعۋدا ول جاۋىنگەرلىك ماشينانى ءمىنسىز ۇستاعانى جانە موتواتقىشتار باتالونىنىڭ قۇرامىندا تاپسىرمالاردى ساۋاتتى ورىنداعانى ءۇشىن ەرەكشە اتاپ ءوتىلدى.
رەسپۋبليكالىق جانە حالىقارالىق وقۋ-جاتتىعۋلاردا ەرەكشەلەنگەن 44736 اسكەري ءبولىمىنىڭ اعا بارلاۋشى-اتقىشى ەفرەيتور ەراسىل تىلەۋحانوۆ «مەرگەن» اتالىمىن يەلەندى.
50185 اسكەري ءبولىمى اۆياتسيالىق بۋىنىنىڭ ۇشقىش-شتۋرمانى لەيتەنانت نۇربولات مولدابەك جاۋىنگەرلىك دايىندىقتاعى ۇزدىك كورسەتكىشتەرى ءۇشىن «كوك قىرانى» اتالىمىنىڭ يەگەرى بولدى. جاس ۇشقىشتار اراسىندا ەكيپاج كومانديرى ن.مولدابەك ءبىرىنشى بولىپ سۋ-30 سم ۇشاعىن ءوز بەتىنشە باسقارۋ قۇقىعىنا يە بولعان.
ەلىمىزدىڭ اۋە شەبىن قورعاۋدى ۇيىمداستىرۋدا جوعارى كورسەتكىشتەرگە قول جەتكىزگەن 31767 اسكەري ءبولىمى كومانديرىنىڭ ورىنباسارى مايور ەۆگەني سپيجارسكي «اسپان قورعانى» اتاعىنىڭ جەڭىمپازى اتاندى.
ارميا حالىقارالىق ويىندارىنىڭ «تەڭىز كۋبوگى» كونكۋرسىنا جانە «بىرلەستىك-2024» حالىقارالىق جەدەل-تاكتيكالىق كوماندالىق-شتابتىق وقۋ-جاتتىعۋىنا بەلسەندى قاتىسقانى ءۇشىن 21814 اسكەري ءبولىمى «ورال» زىمىران-ارتيللەريالىق كەمەسىنىڭ كومانديرى ءىىى دارەجەلى كاپيتان شاحرۋح ابدۋرازاكوۆ «تەڭىز تارلانى» اتالىمىنىڭ جەڭىمپازى دەپ تانىلدى.
22750 اسكەري ءبولىمىنىڭ قارۋ-جاراق جونىندەگى مامانى اعا لەيتەنانت اقجول مولداقاش «جاۋجۇرەك» اتالىمىنىڭ جەڭىمپازى اتاندى. قورعانىس مينيسترلىگى كومانداسىنىڭ قۇرامىندا ول 100 Sarbaz اسكەري-پاتريوتتىق رەاليتي-جوباسىندا ءبىرىنشى ورىنعا يە بولدى, وندا ول تەك كۇش-قۋات جاعىنان عانا ەمەس, سونىمەن قاتار رۋحتىڭ كۇشىن دە كورسەتە ءبىلدى.
ۇزدىكتەر قاتارىندا جوندەۋ تسەحىنىڭ تەحنيگى 3-سىنىپتى سەرجانت ەرالى اينەكباەۆ, گوسپيتال مەدبيكەسى 2-سىنىپتى سەرجانت ايميرا شالاباەۆا, اسكەري-سپورت كەشەنىنىڭ كوپسايىس جانە اسكەري ءۇشسايىس بويىنشا قارۋلى كۇشتەر سپارتاكياداسىنىڭ چەمپيونى اعا سەرجانت اسىلبەك قاراباي, بىتىمگەرلىك وپەراتسيالار ورتالىعىنىڭ نۇسقاۋشىسى 2-سىنىپتى سەرجانت دىنمۇحامەد بايدۋللاەۆ, قاسىم قايسەنوۆ اتىنداعى مەحانيكالاندىرىلعان بريگادا كومانديرىنىڭ تاربيە جانە يدەولوگيالىق جۇمىستار جونىندەگى ورىنباسارى پودپولكوۆنيك ازامات جۇماعازيەۆ بار.
جارىس جەڭىمپازدارىنىڭ ساپىندا قاراساي باتىر اتىنداعى وقۋ ورتالىعىنىڭ ۆزۆود كومانديرى 2-سىنىپتى سەرجانت مارات توعىزباەۆ «ۇلگىلى وتباسى» اتالىمىن يەلەندى. ەرلى-زايىپتىلار بۇگىندە ءۇش قىز, ءبىر ۇل تاربيەلەپ وتىر.
اسكەري جارىستىڭ جەڭىمپازدارى قاتارىندا 3-سىنىپتى سەرجانت دارحان اسلان, وقىتۋشى پولكوۆنيك كيريلل لوجكين, بايلانىسشى سەرجانت الماز تاشكەنباەۆ, ساپەر-مامان كىشى سەرجانت مۇحامەديار بوتەنباەۆ, اسكەري پوليتسيا مايورى ەرجان ديحانباەۆ, بارلاۋ بولىمشەسىنىڭ كومانديرى 3-سىنىپتى سەرجانت دۋمان قوجانوۆ, زاڭگەر ادىلەت پولكوۆنيگى ۆياچەسلاۆ كراسنوۆ, اعا لەيتەنانت جەڭىسبەك دانەبەكوۆ جانە پودپولكوۆنيك نازار بوزاباەۆتار دا بار.
