فوتو سەناتتىڭ ءباسپاسوز قىزمەتى
مەملەكەت باسشىسىنىڭ ۇسىنۋىن قاراۋ ناتيجەسىندە سەناتورلار وتستاۆكاعا كەتۋلەرىنە بايلانىستى بوتاگوز ەراليەۆا مەن قامبار نۇرىشەۆتى جوعارعى سوت سۋدياسى قىزمەتىنەن بوساتۋ تۋرالى شەشىم قابىلدادى. ۇسىنىلعان كانديداتۋرالار الدىن-الا كونستيتۋتسيالىق زاڭناما, سوت جۇيەسى جانە قۇقىق قورعاۋ ورگاندارى كوميتەتىندە تالقىلاندى.
سونىمەن قاتار پالاتا وتىرىسىندا پارلامەنت سەناتى تاعايىنداعان قازاقستان رەسپۋبليكاسى جوعارى اۋديتورلىق پالاتاسى مۇشەسىنىڭ وكىلەتتىگىن توقتاتۋ جانە قىزمەتىنەن بوساتۋ تۋرالى ماسەلە قارالدى. بۇعان دەيىن راشيت احمەتوۆتىڭ اتىنان ءوزىن جوعارى اۋديتورلىق پالاتانىڭ مۇشەلىگىنەن بوساتۋ تۋرالى ءوتىنىش كەلىپ تۇسكەن ەدى. رەگلامەنتكە سايكەس بۇل ماسەلە قارجى جانە بيۋدجەت كوميتەتىندە الدىن الا تالقىلاندى. اشىق داۋىس بەرۋ ارقىلى دەپۋتاتتار اتالعان شەشىمدى قولدادى.
سەنات وتىرىسىندا «قازاقستان رەسپۋبليكاسىنىڭ ۇكىمەتى مەن فرانتسۋز رەسپۋبليكاسىنىڭ ۇكىمەتى اراسىنداعى قازاقستان رەسپۋبليكاسىندا فرانتسۋز دامۋ اگەنتتىگى توبىنىڭ جۇمىس ىستەۋى تۋرالى كەلىسىمدى راتيفيكاتسيالاۋ تۋرالى», ء«بىر تاراپتان ەۋرازيالىق ەكونوميكالىق وداق پەن وعان مۇشە مەملەكەتتەر جانە ەكىنشى تاراپتان يران يسلام رەسپۋبليكاسى اراسىنداعى ەركىن ساۋدا تۋرالى كەلىسىمدى راتيفيكاتسيالاۋ تۋرالى» جانە ء«بىر تاراپتان ەۋرازيالىق ەكونوميكالىق وداق پەن وعان مۇشە مەملەكەتتەر جانە ەكىنشى تاراپتان سينگاپۋر رەسپۋبليكاسى اراسىنداعى جان-جاقتى ەكونوميكالىق ىنتىماقتاستىق تۋرالى نەگىزدەمەلىك كەلىسىمدى جانە ءبىر تاراپتان ەۋرازيالىق ەكونوميكالىق وداق پەن وعان مۇشە مەملەكەتتەر جانە ەكىنشى تاراپتان سينگاپۋر رەسپۋبليكاسى اراسىنداعى ەركىن ساۋدا تۋرالى كەلىسىمدى راتيفيكاتسيالاۋ تۋرالى» زاڭدار قارالىپ, راتيفيكاتسيالاندى.
وتىرىس كەزىندە اتاپ وتىلگەندەي, بۇل زاڭداردى ماقۇلداۋ – حالىقارالىق قاتىناستاردى نىعايتۋ جانە بىرلەسكەن ەكونوميكالىق جوبالاردى ىسكە اسىرۋ ءۇشىن تۇراقتى جاعداي جاساۋ جولىنداعى ماڭىزدى قادام. سونداي-اق اتالعان قۇجاتتاردى راتيفيكاتسيالاۋ ىنتىماقتاستىقتى ودان ءارى دامىتۋعا, وتاندىق بيزنەستى حالىقارالىق دەڭگەيدە ىلگەرىلەتۋ ءۇشىن ساۋدا كەدەرگىلەرىن جويۋعا جانە قازاقستاننىڭ ساۋدا-ەكونوميكالىق دامۋىن ارتتىرۋعا ىقپال ەتەدى.
سونىمەن بىرگە سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ديپلوماتيالىق قىزمەت, حالىقارالىق شارتتار جانە دامۋعا رەسمي كومەك ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» تۋرالى زاڭدى قاراپ, ماقۇلدادى. زاڭ ەل پرەزيدەنتىنىڭ «مەملەكەتتىك اپپاراتتىڭ قىزمەتىن بيۋروكراتيادان ارىلتۋ جونىندەگى شارالار تۋرالى» جارلىعىن ورىنداۋ ماقساتىمەن ازىرلەندى.
«ماقۇلدانعان زاڭ ديپلوماتيالىق قىزمەت زاڭناماسىن ودان ءارى جەتىلدىرۋگە باعىتتالعان. اتاپ ايتقاندا, زاڭ اياسىندا ديپلوماتيالىق قىزمەتكە تۇرۋ, ەڭبەك ەتۋ جانە بىلىكتىلىكتى ارتتىرۋعا قاتىستى جەكەلەگەن ماسەلەلەر ناقتىلانىپ وتىر. سونداي-اق ديپلوماتتاردىڭ ەڭبەك جانە الەۋمەتتىك قۇقىقتارىن قورعاۋ تەتىكتەرى جەتىلدىرىلگەن. زاڭنىڭ ماقۇلدانۋى ديپلوماتيالىق قىزمەت ورگاندارىنىڭ جۇمىسىن دامىتۋعا جانە حالىقارالىق شارتتار جاساسۋ پروتسەسىن وڭتايلاندىرۋعا مۇمكىندىك بەرەدى دەپ سەنەمىز», دەدى ماۋلەن اشىمباەۆ.
