فوتو: اقوردا
مەملەكەت باسشىسى مارتەبەلى مەيمانعا ءىلتيپات بىلدىرە وتىرىپ, ەكىجاقتى ىقپالداستىقتىڭ دامۋىنا تىڭ سەرپىن بەرۋ تۇرعىسىنان بۇل ساپاردىڭ ماڭىزى زور ەكەنىنە نازار اۋداردى.
ء«سىز قازاقستانعا گۆينەيا-بيساۋدىڭ پرەزيدەنتى رەتىندە العاش رەت كەلىپ تۇرسىز. مۇنى تاريحي ساپار دەۋگە بولادى. جوعارى دەڭگەيدەگى وسى كەزدەسۋ ەكى ەل اراسىنداعى قارىم-قاتىناستىڭ جاڭا كەزەڭىنە جول اشادى دەپ سەنەمىن», دەدى پرەزيدەنت.
قاسىم-جومارت توقاەۆ بىلتىر قازاقستان مەن گۆينەيا-بيساۋ اراسىندا ديپلوماتيالىق قارىم-قاتىناستىڭ ورناعانىنا 10 جىل تولعانىن اتاپ ءوتتى. پرەزيدەنتتىڭ ايتۋىنشا, بۇگىنگى تاريحي كەزدەسۋ ءوزارا ءتيىمدى سەرىكتەستىكتى ودان ءارى تەرەڭدەتۋگە نەگىز بولادى.
«وسى كەزەڭ ىشىندە ءبىز ءوزارا قولداۋ مەن بەرىك دوستىققا نەگىزدەلگەن ىنتىماقتاستىق ورناتتىق. سەرىكتەستىگىمىزدى ودان ءارى دامىتۋعا مول مۇمكىندىك بار. اسىرەسە, ەكونوميكا جانە ساۋدا-ساتتىق سالالارىنىڭ الەۋەتى جوعارى. مەن بۇگىنگى ساپارىڭىزدى ەكى ەلدىڭ ىنتىماقتاستىعىن نىعايتۋعا باعىتتالعان ماڭىزدى قادام دەپ قاراستىرامىن», دەدى مەملەكەت باسشىسى.
ۋمارۋ سيسوكۋ ەمبالو قوناقجايلىق كورسەتكەنى ءۇشىن قاسىم-جومارت توقاەۆ پەن قازاقستان حالقىنا العىس ايتتى.
«مەنىڭ بۇگىنگى ساپارىم بيساۋ مەن استانا اراسىنداعى دوستىق بايلانىستار مەن ىنتىماقتاستىقتى نىعايتۋعا قوس تاراپتىڭ دا نيەتتى ەكەنىن ايعاقتايدى», دەدى ۋمارۋ سيسوكۋ ەمبالو.
گۆينەيا-بيساۋ پرەزيدەنتى ەكى ەل كوپجاقتى قۇرىلىمدار, سونىڭ ىشىندە بۇۇ اياسىندا تابىستى ىقپالداستىق ورناتقانىنا توقتالدى. ول قاسىم-جومارت توقاەۆتىڭ بۇۇ مەن وزگە دە حالىقارالىق ۇيىمداردى رەفورمالاۋعا قاتىستى ۇستانىمىن قولدايتىنىن جەتكىزدى.
تاراپتار اۋىل شارۋاشىلىعى, كولىك-لوگيستيكا, تاۋ-كەن مەتاللۋرگياسى, قارجى, تسيفرلاندىرۋ جانە تەلەكوممۋنيكاتسيالىق تەحنولوگيالار سياقتى پەرسپەكتيۆتى سالالاردا ىقپالداستىق ورناتۋ ماسەلەلەرىن قاراستىردى.
