بيىل كوكتەمدەگى سۋ تاسقىنىنان قاتتى زارداپ شەككەن وڭىرلەردىڭ ءبىرى – اقتوبە وبلىسى. ءوڭىر باسشىسىنىڭ ايتۋىنشا, تابيعات اپاتىنىڭ سالدارىنان ءۇي-كۇيسىز قالعان تۇرعىنداردىڭ بارلىعى بۇگىندە باسپانامەن قامتىلعان. سۋ تاسقىنىنان ءبىر عانا ىرعىز اۋدانىندا نۇرا, جايساڭباي, بەلشەر, قۇيىلىس, مامىر اۋىلدارىندا 170-كە جۋىق تۇرعىن ءۇي زارداپ شەككەن. نۇرا اۋىلى تۇرعىندارىنىڭ وتىنىشىمەن جاڭا ۇيلەر اۋىلدان ون ەكى شاقىرىم قاشىقتا ورنالاسقان سارىوبا جەرىندە سالىنعان. جالپى, وبلىستا تاسقىن سۋ 4 مىڭنان استام ۇيگە زالال كەلتىرىپ, الەۋمەتتىك نىسانداردى دا شايىپ كەتكەن. تەحنيكالىق تەكسەرۋ قورىتىندىلارىندا 1 013 ءۇي اپاتتى دەپ تانىلعان. ءىرى بيزنەس وكىلدەرىنىڭ قاراجاتى ەسەبىنەن جالپى سوماسى 25 ملرد تەڭگەگە 500 ءۇي سالىنىپ, 513 دايىن ءۇي ساتىپ الىنعان. سونداي-اق 3 مىڭ تۇرعىن ءۇيدى جوندەۋگە, قالپىنا كەلتىرۋگە 9,8 ملرد تەڭگە وتەماقى بەرىلگەن.
– بۇل قيىن كەزەڭدى ۇكىمەت پەن حالىقتىڭ بىرلەسكەن كۇش-جىگەرىنىڭ ارقاسىندا عانا ەڭسەردىك. تۇرعىن ۇيلەردەن بولەك, مەملەكەت تاراپىنان بۇگىنگى تاڭدا 13 ءبىلىم بەرۋ, 2 سپورت, 1 دەنساۋلىق ساقتاۋ نىساندارىن جوندەۋگە, قۇرىلىسىن جۇرگىزۋگە, سونداي-اق 47 شاقىرىم اۆتوجولدى, 23 كوپىردى, 22 گيدروتەحنيكالىق قۇرىلىستى قالپىنا كەلتىرۋگە تولىق قارجى ءبولىندى, – دەدى وبلىس باسشىسى.
سونىمەن بىرگە سۋ تاسقىنى سالدارىنان زارداپ شەككەن 63 شاعىن جانە ورتا بيزنەس وكىلىنە, قيراعان 80 مال كەشەنى مەن مالشى ۇيلەرىنە, 493 شارۋاشىلىققا قاراستى 11 مىڭنان استام مال باسىنا وتەماقى تولەۋگە تولىق كومەك كورسەتىلدى.
بيىل وڭىردە 8 جاڭا مەكتەپ پايدالانۋعا بەرىلدى. جىل سوڭىنا دەيىن وڭىردە تاعى 2 مەكتەپتىڭ قۇرىلىسى اياقتالماق.
– الداعى جىلدارى 11,4 مىڭ وقۋشىعا ارنالعان 14 جايلى مەكتەپ قۇرىلىسىن اياقتاپ, ىسكە قوسامىز. بۇعان قوسا شالعاي اۋىلداردا جەرگىلىكتى بيۋدجەت, باسقا قارجى كوزدەرىنەن 4,6 مىڭ ورىندىق 15 مەكتەپ سالىنادى, – دەدى ا.شاحاروۆ.
«اۋىلدىق دەنساۋلىق ساقتاۋدى جاڭعىرتۋ» ۇلتتىق جوباسى اياسىندا وڭىردە 29 جوبا قولعا الىنعان. بۇگىندە 12 نىسان پايدالانۋعا بەرىلدى. ءوڭىر باسشىسى جىل سوڭىنا دەيىن تاعى 6 نىسان ىسكە قوسىلاتىنىن ايتتى.
بۇدان باسقا, جەكە ينۆەستيتسيالار ەسەبىنەن باتىس قازاقستان وڭىرلەرىن تولىعىمەن قامتيتىن ءىرى جوبا – يادرولىق مەديتسينا ورتالىعى بار «Orhun Med Limited» كلينيكاسىنىڭ قۇرىلىسى باستالدى. نىسان 2026 جىلى پايدالانۋعا بەرىلەدى.
ا.شاحاروۆتىڭ ايتۋىنشا, وڭىردە جاقىن ارادا ينۆەستيتسيا كولەمى 21,4 ملرد تەڭگەنى قۇرايتىن رەلس دانەكەرلەۋ زاۋىتى («پزتM LTD» جشس), ينۆەستيتسيا كولەمى 99,6 ملرد تەڭگە بولاتىن بيتۋم زاۋىتى («باتىس بيتۋم» جشس), 70 ملرد تەڭگە سوماسىندا قارجىلاندىرىلاتىن تسەمەنت زاۋىتى («Aqtobe Cem» جشس), باسقا دا ماڭىزدى جوبالار ىسكە اسىرىلادى. بۇل جوبالار جۇزەگە اسسا, وڭىردە جاڭا جۇمىس ورىندارى اشىلىپ, سالىق ءتۇسىمى ارتادى, سونداي-اق وبلىستىڭ ونەركاسىپتىك الەۋەتى دامىپ, ەكونوميكالىق نەگىزى نىعايادى.
قازىر ءاليا مولداعۇلوۆا اتىنداعى حالىقارالىق اۋەجايعا ينۆەستورلار تارتۋ, جالپى اۋدانى 858 گەكتار ارنايى ەكونوميكالىق ايماق (اەا) قۇرۋ جۇمىستارى جۇرگىزىلىپ جاتىر. سونداي-اق حرومتاۋ مونوقالاسىندا قۇنى 400 ميلليارد تەڭگەنى قۇرايتىن 20 جوبا جۇزەگە اساتىن يندۋستريالدى ايماق قۇرۋ جۇمىسى باستالدى.
وبلىستىڭ اۋىل شارۋاشىلىعى سالاسىن قولداۋعا 15,5 ملرد تەڭگە بولىنگەن. كورسەتىلگەن مەملەكەتتىك قولداۋدىڭ ناتيجەسىندە, وسى جىلدىڭ 11 ايىندا 333 ميلليارد تەڭگەنىڭ ءونىمى وندىرىلگەن. سونىمەن قاتار «اۋىل اماناتى» باعدارلاماسى اياسىندا 2900-دەن استام جوبا ماقۇلدانىپ, 2706 جوباعا 15 ملرد تەڭگە نەسيە بەرىلگەن.
اقتوبە وبلىسىنىڭ 2025 جىلعا ارنالعان جوسپارىنا توقتالعان اكىم كەلەر جىلى ءوڭىردىڭ ەكونوميكالىق ءوسىمى كەمىندە 103% دەڭگەيىندە بولادى دەپ مالىمدەدى.
– بۇل رەتتە ونەركاسىپ سالاسىندا 2 ترلن تەڭگە ءونىم وندىرەمىز. سونداي-اق وبلىسقا 1 ترلن تەڭگەگە جۋىق ينۆەستيتسيا تارتىپ, 1 مىڭنان استام جۇمىس ورنى قۇرىلادى. ءوڭىردىڭ ترانزيتتىك الەۋەتىن ودان ءارى دامىتۋ ماقساتىندا «قاندىاعاش – ەمبى – شالقار – ىرعىز» رەسپۋبليكالىق اۆتوجولى قۇرىلىسىنىڭ 110 شاقىرىمى اياقتالادى. نورماتيۆتىك جاعدايداعى اۆتوجولداردىڭ ۇلەسى 80% بولادى. اتالعان كورسەتكىشكە جەتۋ ماقساتىندا الداعى جىلى 46 جوبانى ىسكە اسىرۋ كوزدەلىپ وتىر, – دەدى ا.شاحاروۆ.
سونداي-اق رەسپۋبليكالىق «اقتوبە – قارابۇتاق –ۇلعايسىن» اۆتوجولىنىڭ 6 ۋچاسكەسىن قايتا جاڭارتۋ جوسپارلانعان. وبلىس اكىمىنىڭ ايتۋىنشا, كەلەر جىلى 5,5 مىڭنان استام حالقى بار 11 اۋىلعا اۋىزسۋ جۇرگىزىلەدى. ءسويتىپ وڭىردە تازا اۋىزسۋمەن جابدىقتاۋ ماسەلەسى تولىقتاي شەشىلەدى. سونداي-اق 9,8 مىڭ حالىق قونىستانعان 24 اۋىل گازبەن قامتىلماق.
– بۇدان وزگە, 2025 جىلى 975,0 مىڭ شارشى مەتر تۇرعىن ءۇيدى پايدالانۋعا بەرۋدى جوسپارلاپ وتىرمىز. «اقتوبە جاستارى» باعدارلاماسىمەن 70 جاس وتباسى باسپانالى بولادى. الداعى جىلى 27 اۋىلدى ينتەرنەتپەن جابدىقتاپ, قامتۋ دەڭگەيىن 98,8%-عا دەيىن جەتكىزەمىز. سونداي-اق رەسپۋبليكالىق ماڭىزى بار جولداردىڭ 340 شاقىرىمىندا ءموبيلدى بايلانىسپەن قامتيتىن 17 مۇنارا ورناتامىز, – دەدى ءوڭىر باسشىسى.
قازىر ءوڭىردىڭ الەۋمەتتىك-ەكونوميكالىق دامۋى, قوعامدىق-ساياسي احۋالى تۇراقتى. بارلىق وزەكتى ماسەلە وبلىس اكىمىنىڭ جەكە باقىلاۋىندا. ايماق باسشىسى باياندامادان سوڭ باق وكىلدەرىنىڭ سۇراقتارىنا جاۋاپ بەردى.
