فوتو: استانا قالاسى اكىمدىگى
ەلوردا اكىمى گازەت قاي كەزەڭدە دە حالىقتىڭ كوزى, قۇلاعى ءھام ءتىلى قىزمەتىنەن جاڭىلماي ۇلت مۇددەسى جولىندا مۇدىرمەي قىزمەت ەتىپ كەلە جاتقانىنا توقتالعان.
«ەگەمەننىڭ ارالاسۋىمەن شەشىلگەن وزەكتى ماسەلەلەردىڭ سانىندا شەك جوق. باسقاسىن ايتپاعاندا, وسىناۋ قارا شاڭىراقتا ەڭبەك ەتىپ, جازۋدىڭ قىر-سىرىنا قانىققان تالاي قالامگەرلەر كەيىننەن ءوزى دە ءبىر-ءبىر گازەت-جۋرنالدىڭ, شىعارماشىلىق ۇجىمنىڭ تىزگىنىن ۇستاپ, ابىرويمەن قىزمەت ەتىپ كەلەدى», دەپ گازەت ۇجىمى الداعى ۋاقىتتا دا ەلدىڭ ءسوزىن ايتىپ, جۇرتشىلىقتى اعارتۋمەن اينالىسا بەرەتىنىنە سەنىم بىلدىرگەن.
ال استانا قالالىق ءماسليحات توراعاسى ەرلان كاناليموۆ ۇلتتىق يدەولوگيا مەن مەملەكەتتىك ساياساتتى ناسيحاتتاۋ باعىتىنداعى گازەت قىزمەتىن ايرىقشا اتاپ وتكەن.
«گازەت ءوز پاراقتارىندا مەملەكەتىمىزدىڭ وتكەنى مەن بۇگىنىن, تاريح تاعلىمىن دا, جاڭا زامان تالابىن دا ۇيلەستىرە وتىرىپ, ۇرپاقتار اراسىن بايلانىستىراتىن باعا جەتپەس مۇرا. باسىلىم قوعامىمىزدىڭ رۋحاني ازىعىنا اينالىپ, جاس قالامگەرلەردىڭ شىعارماشىلىعىن شىڭدايتىن ابىرويلى الاڭعا اينالدى», دەپ جازدى ەرلان كاناليموۆ ۇجىمعا جولداعان قۇتتىقتاۋ حاتىندا.
قازاقستان رەسپۋبليكاسى ۇلتتىق ءارحيۆىنىڭ ديرەكتورى ساعيلا نۇرلانوۆا دا باس باسىلىمدى ميەرەيتويىمەن قۇتتىقتاۋدان قالىس قالمادى. ول كەشەگى ءباسپاسوز كوشىن بۇگىنگى كۇنى ورگە سۇيرەپ. ەل شەجىرەسىن قاعازعا قاتتاعان گازەتتىڭ ءار پاراعى ۇرپاق ءۇشىن قۇندى مۇرا ەكەنىن تىلگە تيەك ەتكەن.
«Egemen Qazaqstan» گازەتى العاش رەت 1919 جىلى «ۇشقىن» دەگەن اتپەن وقىرمان نازارىنا جول تارتقان ساتتەن بەرى ەل مۇددەسىن قورعاۋدان ەش اۋىتقىعان ەمەس. ەلىمىزدىڭ وركەندەۋى جولىندا قالامدارىڭىز مۇقالماي, قىزمەت ەتە بەرۋلەرىڭىزگە تىلەكتەسپىن, - دەلىنگەن قۇتتىقتاۋ حاتتا.
گازەت ۇجىمىن «Qazaqstan» رەسپۋبليكالىق تەلەراديوكورپوراتسياسىنىڭ باسقارما توراعاسى ءلاززات تانىسباي قۇتتىقتاپ, شىعارماشىلىق تابىس تىلەدى.
