كلۋبتىڭ العاشقى وتىرىسى

كەشە استاناداعى ۇلتتىق اكادەميالىق كىتاپحانادا ءباسپاسوز, تەلەۆيزيا جانە راديو كۇنى قارساڭىندا قازاقستان حالقى اسسامبلەياسى جانىنداعى ەتنوسارالىق قاتىناستار ماسەلەسىنە قاتىستى جەتەكشى جۋرناليست-ساراپشىلار كلۋبىنىڭ العاشقى وتىرىسى بولىپ ءوتتى. كۇن تارتىبىندە – ەل بىرلىگى دوكتريناسىن جۇزەگە اسىرۋ ماسەلەلەرى, سونىمەن قاتار, ءبىرتۇتاس اقپاراتتىق كەڭىستىكتىڭ قۇرىلۋى. كلۋب قازاقستان حالقى اسسام­بلەيا­سى جانىنداعى تۇراقتى جۇمىس ىستەيتىن كەڭەستىك-ساراپتىق جانە اقپاراتتىق ورگان بولىپ تابىلادى. قۇرامىنا ەتنوسارالىق تاقىرىپتى قوزعايتىن رەسپۋبليكالىق, جەرگى­لىك­تى بۇقارالىق اقپارات قۇرالدارى­نىڭ جەتەكشى جۋرناليستەرى جانە ەتنوسارالىق قارىم-قاتىناستار سالاسىنداعى ساراپشىلار كىرەتىن كلۋبتىڭ اشىلۋى اسسامبلەيانىڭ 15-سەسسياسى بارىسىندا قابىلدانىپ, ال تۇساۋكەسەرى وتكەن جىلدىڭ 17 قاراشاسىندا وتكەن بولاتىن. العاشقى وتىرىسقا اسسامبلەيا ءتور­اعاسىنىڭ ورىنباسارى, حاتشى­لىق مەڭگەرۋشىسى ەرالى توعجانوۆ, بايلانىس جانە اقپارات ۆيتسە-مي­نيسترى نۇراي ورازوۆ, ل.ن.گۋميلەۆ اتىنداعى ەۋرازيا ۇلتتىق ۋنيۆەر­سي­تەتى جۋرناليستيكا جانە ساياسات­تانۋ فاكۋلتەتىنىڭ كافەدرا مەڭ­گەرۋشىسى, پروفەسسور ع.شاياحمەتوۆ, سونداي-اق بىرقاتار باسىلىمداردىڭ باس رەداكتورلارى قاتىستى. الدى­مەن كەلە جاتقان جۋرناليستەر مە­رەكەسىمەن قۇتتىقتاعان ەرالى توعجانوۆ كوزگە كورىنبەيتىن, قولعا ۇستالمايتىن ەتنوستىق ماسەلەنىڭ وتە كىرپيازدىعىن ايتىپ ءوتتى. الىسقا بارماي-اق, كورشىلەس قىر­عىز ەلىن الىپ قارالىق. ەتنوستىق ماسەلە دەگەنىمىز وسى, دەدى ول. بۇدان سوڭ وتىرىس تاقىرىبى قازاقستاننىڭ ەل بىرلىگى دوك­تري­ناسىنا ويىستى. قازاقستاننىڭ ەل بىرلىگى دوكتريناسىنىڭ نەگىزگى ويى دا, ماعىناسى دا – تاۋەلسىزدىك. ون­داعى ءۇش ءبولىم سول تاۋەلسىزدىكتى ءارى قاراي نىعايتا تۇسۋگە باعىتتالعان. سوندىقتان قازاقستان ءۇشىن تاۋەل­سىزدىكتەن ارتىق قاسيەتتى, تەرەڭ قۇندىلىق بولۋى دا مۇمكىن ەمەس. ەلىمىزگە تاۋەلسىزدىك 1991 جىلى كەلگەنىمەن, ونىڭ قالىپتاسۋ كەزەڭى بەرتىنگە دەيىن بىرتىندەپ جۇزەگە استى. ال قازىرگى ۋاقىتتا ءبىز سول جىلدارى ەلىمىزدىڭ تاۋەلسىزدىك ىرگەتاسى مىقتى قالانعانىنىڭ كۋاسى بولىپ وتىرمىز. دوكترينا­دا­ ايتىلاتىن كوپ ماسەلە – جاڭا ۇعىم. تاۋەلسىزدىكتى ەل بىرلىگى ار­قى­لى نىعايتۋ ماسەلەسى – ەڭ ماڭىزدى ماسەلە. بۇرىن ءبىز جالپى قوعامدىق كەلىسىم تۋرالى ءسوز قوزعاپ كەلگەن بولساق, بۇگىنگى كۇنى ناقتى ەلدىڭ بىرلىگى تۋرالى ماسەلەنى العا شىعا­رىپ وتىرمىز, دەپ اتاپ ءوتتى قازاق­ستان حالقى اسسامبلەياسى توراعا­سىنىڭ ورىنباسارى. كلۋب مۇشەلەرى وتىرىسىنىڭ ەكىنشى جارتىسىندا “كازاحستانسكايا پراۆدا” رەسپۋبليكالىق گازەتىنىڭ باس رەداكتورى تاتيانا كوستينا وسى گازەتتەگى ەتنوستىق تاقىرىپتا جاريالاناتىن ماتەريالدار تۋرالى شەبەرلىك-سىنىپتارىن وتكىزدى. ۆەنەرا تۇگەلباي.